មេទ័ពជាន់ខ្ពស់អ៊ីរ៉ង់ម្នាក់ ស្លាប់ក្នុងការវាយប្រហារនៅអ៊ីរ៉ាក់

អន្តរជាតិ

មេទ័ពជាន់ខ្ពស់អ៊ីរ៉ង់ម្នាក់ ស្លាប់ក្នុងការវាយប្រហារនៅអ៊ីរ៉ាក់

03, Jan 2020 , 9:23 am

រូបភាព

ឧត្តមសេនីយ៍ Qasem Soleimani បាត់បង់ជីវិតក្នុងការវាយប្រហារនៅអ៊ីរ៉ាក់។ រូបភាព AFP

ដោយ: តន ចាន់រិទ្ធារ៉ា

មេបញ្ជាការជាន់ខ្ពស់នៃកងឆ្មាំបដិវត្តន៍អ៊ីរ៉ង់ Qasem Soleimani ត្រូវបានបញ្ជាក់ថា បានបាត់បង់ជីវិតក្នុងការវាយប្រហារដែនអាកាសមួយនៅព្រលានយន្តហោះទីក្រុងបាក់ដាដនៅព្រឹកថ្ងៃទី៣ ខែមករា។ នេះបើតាមការប្រកាសរបស់ក្រុមជីវពលស្និទ្ធអ៊ីរ៉ង់ Hashed al-Shaabi ដែលបន្តថា មេបញ្ជាការជាន់ខ្ពស់ម្នាក់របស់ខ្លួន ក៏បានស្លាប់ដែរ។ ក្រុម Hashed បានទម្លាក់ការទទួលខុសត្រូវលើអាមេរិក ខណៈអាមេរិក មិនទាន់ចេញមុខបកស្រាយអ្វីទេ។

លោក Abu Mahdi al-Muhandis មេបញ្ជាការរងរបស់ Hashed និងឧត្តមសេនីយ៍ Qasem Soleimani ប្រមុខកងកម្លាំង Qud នៃកងឆ្មាំបដិវត្តន៍ ត្រូវបានសម្លាប់ក្នុងការវាយប្រហារផ្លូវអាកាសរបស់អាមេរិកនៅព្រលានយន្តហោះទីក្រុងបាក់ដាដ។ នេះជាការប្រកាសរបស់ក្រុម Hashed al-Shaabi នៅថ្ងៃទី៣ ខែមករា ប៉ុន្មានម៉ោងក្រោយការវាយប្រហារដែលរ៉ុក្កែត Katushya បីគ្រាប់ ត្រូវបានបាញ់តម្រង់ក្បួនរថយន្តដែលធ្វើក្នុងបរិវេណអាកាសយានដ្ឋាន។

មនុស្ស៦នាក់ផ្សេងទៀត ក៏បានបាត់បង់ជីវិតក្នុងការវាយប្រហារនេះ ហើយរថយន្តពីរគ្រឿង បានឆេះខ្ទេច។ មិនទាន់មានក្រុមណាចេញមុខទទួលខុសត្រូវនៅឡើយទេ ប៉ុន្តែក្រុម Hashed បានប្រកាសឲ្យអាមេរិកទទួលខុសត្រូវទៅហើយ។ នេះបើតាមការផ្សាយរបស់ទីភ្នាក់ងារព័ត៌មាន AFP ។

លោក Soleimani គឺជាមន្ត្រីជាន់ខ្ពស់មួយរូបរបស់អ៊ីរ៉ង់ ហើយជាមន្ត្រីទទួលបន្ទុកកិច្ចនៅអ៊ីរ៉ាក់ផងដែរ។ គេមិនទាន់ដឹងច្បាស់ថាពីដំណើររបស់លោកទៅកាន់ទឹកដីអ៊ីរ៉ាក់នៅឡើយទេ។ ចំណែកលោក Muhandis វិញ ទោះជាមេបញ្ជាការរងក្ដី តែត្រូវបានចាត់ទុកជាជាមន្ត្រីកំពូលក្នុងជួរកម្លាំង Hashed ដែលជាបណ្ដាញអង្គភាពប្រយុទ្ធនិកាយស៊ីអ៊ីតមានទំនាក់ទំនងជាមួយអ៊ីរ៉ង់ ហើយដែលភាគច្រើនជាផ្នែកនៃកម្លាំងសន្តិសុខជាតិអ៊ីរ៉ាក់។

វត្តមានលោក Soleimani នៅអ៊ីរ៉ាក់អាចទាក់ទងនឹងស្ថានការណ៍ក្នុងរដ្ឋធានីបាក់ដាដជាទីដែលអ្នកគាំទ្រក្រុមសកម្មជនស្និទ្ធអ៊ីរ៉ង់អុកឡុកស្ថានទូតអាមេរិក។ អ្នកគាំទ្រក្រុម Hashed ដែលពោរពេញកំហឹងជាច្រើន បានឡោមព័ទ្ធស្ថានទូតអាមេរិក បន្ទាប់ពីការវាយប្រហារលើក្រុម Kataeb Hezbollah ដែលសិទ្ធអ៊ីរ៉ង់។ របងការពារស្ថានទូត និងច្រកចូលត្រូវបានបំផ្លាញធ្ងន់ធ្ងរក្នុងការតវ៉ាប៉ុន្មានថ្ងៃមកនេះ។ អាមេរិកក៏បានបញ្ជូនទ័ពបន្ថែមទៅការពារ និងទៅកូវ៉ែតដើម្បីតាមដានស្ថានការណ៍ផងដែរ។

ការស្លាប់របស់លោក Soleimani ទំនងជាធ្វើឲ្យអ៊ីរ៉ង់មិនសប្បាយចិត្តឡើយ ហើយទំនងចាត់វិធានការតបវិញផងដែរ បើពួកគេច្បាស់ក្នុងចិត្តថា អាមេរិកជាអ្នកនៅពីក្រោយ ឬក៏អាមេរិកចេញមុខទទួលខុសត្រូវដោយផ្ទាល់នោះ។ ស្ថានការណ៍នៅអ៊ីរ៉ាក់ ទំនងជាធ្លាក់ចុះកាន់តែខ្លាំងថែមទៀតនៅពេលខាងមុខ ដ្បិតអ៊ីរ៉ង់មិនអាចប្រឈមមុខដោយផ្ទាល់ជាមួយអាមេរិកឡើយ ដែលនេះធ្វើឲ្យអ៊ីរ៉ាក់ក្លាយជាទីលានប្រយុទ្ធរវាងទ័ពអាមេរិក និងកងកម្លាំងដែលស្និទ្ធអ៊ីរ៉ង់៕