អន្តរជាតិ
មន្ទីរបញ្ចកោណ៖ ការសម្លាប់មេទ័ពជាន់ខ្ពស់អ៊ីរ៉ង់ Qasem ជាបញ្ជាលោកត្រាំ
× មេបញ្ជាការជាន់ខ្ពស់នៃកងឆ្មាំបដិវត្តន៍អ៊ីរ៉ង់ Qasem Soleimani ត្រូវបានសម្លាប់ដោយការវាយប្រហារដែនអាកាសមួយនៅព្រលានយន្តហោះទីក្រុងបាក់ដាដនៅព្រឹកថ្ងៃទី៣ ខែមករា។ ទាក់ទិននឹងដំណឹងនេះ មន្ទីរបញ្ចកោណអាមេរិក បានបញ្ជាក់ថា ការសម្លាប់នេះ ធ្វើឡើងតាមបញ្ជារបស់លោកប្រធានាធិបតី ដូណាល់ ត្រាំ ។ ប៉ុន្មានម៉ោងប៉ុណ្ណោះក្រោយដំណឹងនេះ ប្រមុខដឹកនាំកំពូលអ៊ីរ៉ង់ បានប្តេជ្ញាសងសឹកប្រឆាំងសហរដ្ឋអាមេរិក។
ក្នុងសេចក្តីថ្លែងការណ៍មួយ មន្ទីរបញ្ចកោណអាមេរិក បានអះអាងថា តាមបញ្ជារបស់លោកប្រធានាធិបតីអាមេរិក យោធាអាមេរិក បានបើកប្រតិបត្តិការដើម្បីការពារទាហានអាមេរិកនៅបរទេស ដោយការសម្លាប់ Qasem Soleimani ។ នេះបើតាមការចុះផ្សាយរបសទីភ្នាក់ងារព័ត៌មាន Reuters ។
ទង្វើនេះ បានប្រព្រឹត្តិទៅដោយមានគោលដៅរំខានដល់ផែនការវាយប្រហាររបស់អ៊ីរ៉ង់នាពេលអនាគត។ សេចក្តីថ្លែងការណ៍ដដែល បញ្ជាក់បែបនេះដោយសង្កត់ធ្ងន់ថា សហរដ្ឋអាមេរិក នឹងបន្តធ្វើសកម្មភាពចាំបាច់ទាំងអស់ការពារប្រជាជន និងផលប្រយោជន៍អាមេរិក គ្រប់ទីកន្លែងទាំងអស់នៅជុំវិញពិភពលោក។
អ្វីគួរឲ្យភ្ញាក់ផ្អើល! សម្រាប់ការបញ្ជាឲ្យទៅសម្លាប់មេទ័ពជាន់ខ្ពស់អ៊ីរ៉ង់នេះ មេដឹកនាំអាមេរិករូបនេះ ពុំបានជូនដំណឹងជាមុនដល់សភាអាមេរិកឡើយ។ លោក Soleimani គឺជាមន្ត្រីជាន់ខ្ពស់មួយរូបរបស់អ៊ីរ៉ង់ ហើយជាមន្ត្រីទទួលបន្ទុកកិច្ចនៅអ៊ីរ៉ាក់ផងដែរ។ ហើយការស្លាប់របស់បុគ្គលសំខាន់រូបនេះ ទំនងជាធ្វើឲ្យអ៊ីរ៉ង់មិនសប្បាយចិត្តឡើយ ហើយទំនងចាត់វិធានការតបវិញផងដែរ។ លោកប្រធានាធិបតី ដូណាល់ ត្រាំ បានបង្ហោះរូបទង់ជាតិអាមេរិកលើបណ្តេញសង្គម Twitter ក្រោយព័ត៌មាននេះបានចុះផ្សាយសុះសាយ។
ដូចគេគិតទុកមែន នៅថ្ងៃសុក្រដដែលនេះ មេដឹកនាំកំពូលអ៊ីរ៉ង់ Ayatollah Ali Khamenei បានព្រមានសងសឹកធ្ងន់ធ្ងរប្រឆាំងសហរដ្ឋអាមេរិក។ ក្នុងសេចក្តីថ្លែងការណ៍លើកញ្ចក់ទូរទស្សន៍ជាតិអ៊ីរ៉ង់ លោក Khamenei ក៏ចាត់ទុកលោកឧត្ដមសេនីយ៍ Qasem ថាជា «បុគ្គលគំរូនៃតស៊ូអន្តរជាតិ» ហើយលោកបានប្រកាស ចូលរួមរំលែកទុក្ខជាសាធារណៈរយៈពេល៣ថ្ងៃសម្រាប់ការស្លាប់របស់មេទ័ពជាន់ខ្ពស់រូបនេះ។
ទន្ទឹមនេះ រដ្ឋមន្ត្រីក្រសួងការបរទេសអ៊ីរ៉ង់ ក៏បានប្រតិកម្មនឹងការវាយប្រហារដែនអាកាសរបស់អាមេរិកថាជា «ទង្វើល្ងីល្ងើនិងគ្រោះថ្នាក់បំផុត»។ ត្រង់នេះ លោក Mohammad Javad Zarif លើកឡើងថា សហរដ្ឋអាមេរិក នឹងទទួលខុសត្រូវចំពោះផលវិបាកទាំងអស់ដែលកើតចេញពីទង្វើរបស់ខ្លួន។
សូមបញ្ជាក់ថា ការវាយប្រហារពីសំណាក់កងទ័ពអាមេរិកដែលឈានដល់សម្លាប់មេទ័ពជាន់ខ្ពស់អ៊ីរ៉ង់នេះ កើតឡើងប៉ុន្មានថ្ងៃប៉ុណ្ណោះក្រោយពីមានការវាយប្រហារលើស្ថានទូតអាមេរិកប្រចាំទីក្រុងបាក់ដាដពីសំណាក់អ្នកគាំទ្រក្រុមសកម្មជនស្និទ្ធអ៊ីរ៉ង់។ មន្ទីរបញ្ចកោណអាមេរិក បានចេញបកស្រាយថា ឧត្តមសេនីយ៍ Soleimani គឺជាអ្នកនៅពីក្រោយការវាយប្រហារនេះ។ ខណៈស្ថានភាពនៅអ៊ីរ៉ាក់កាន់តែតានតឹង អាមេរិកក៏បានបញ្ជូនទ័ពបន្ថែមទៅការពារ និងទៅកូវ៉ែតដើម្បីតាមដានស្ថានការណ៍ផងដែរ៕
Tag:
សហរដ្ឋអាមេរិក
អ៊ីរ៉ង់
ដូណាល់ត្រាំ
© រក្សាសិទ្ធិដោយ thmeythmey.com