កីឡាជាតិ
ជាតិ
អ្នកចាំទី Alex You ច្រានចោលព័ត៌មាន ដែលថា ខ្លួនចូលនិវត្តពីអាជីពបាល់ទាត់
រូបភាពពីហ្វេសប៊ុករបស់កីឡាករ Alex You
×![]()
អ្នកចាំទីខ្មែរបារាំង Alex You អះអាងថា ខ្លួនពុំបានប្រកាសចូលនិវត្តពីអាជីពបាល់ទាត់ឡើយ។ ការអះអាងនេះ ធ្វើឡើងក្រោយមានព័ត៌មានចុះផ្សាយថា រូបគេបានប្រកាសចូលនិវត្តពីអាជីពបាល់ទាត់។ ជាមួយការបង្ហាញអារម្មណ៍សោកស្តាយ Alex You ចាត់ទុកការចុះផ្សាយព័ត៌មានមិនពិតនេះថា ជាការសម្លាប់អាជីពរបស់ខ្លួនពាក់កណ្តាលទី។ 
ក្រោយមានព័ត៌មានចចាមអារ៉ាមចុះផ្សាយពីការចូលនិវត្តពីអាជីពបាល់ទាត់របស់ខ្លួន នៅថ្ងៃទី៣ ខែមករា ឆ្នាំ២០២០នេះ អ្នកចាំទី Alex You បានចេញមកច្រាលចោលចំពោះព័ត៌មាននេះ។ មិនត្រឹមតែប៉ុណ្ណោះ Alex You អះអាងថា រូបគេមិនបានប្រកាសផ្លូវការណាមួយពីការចូលនិវត្តពីអាជីពបាល់ទាត់នោះឡើយ។
កីឡាករខ្មែរបារាំងរូបនេះបានបង្ហោះរូបថតស្លៀកឯកសណ្ឋានរបស់បឹងកេតមួយសន្លឹកជាមួយការរៀបរាប់យ៉ាងដូច្នេះថា៖«បន្ទាប់ពីការឈប់សម្រាកនៃរដូវការឆ្នាំ២០១៩ ខ្ញុំបាទពុំទាន់ធ្វើបទសម្ភាស ក៏ដូចជាចេញជាផ្លូវការពីការប្រកាសលាឈប់ពីវិស័យបាល់ទាត់នោះទេ។ តែខ្ញុំពិតជាមានអារម្មណ៏សោកស្តាយ មិនអាចនឹងទទួលយកនឹងការចេញរបស់សារព័ត៍មានទាំងនោះ ហាក់បីដូចជាច្បាស់ការថា រូបខ្ញុំបានប្រកាសចូលនិវត្តជាផ្លូវការ»។
ជាមួយការស្នើឲ្យមានការចុះផ្សាយព័ត៌មានពិត អតីតីអ្នកចាំទីរបស់ក្លិបភ្នំពេញក្រោនរូបនេះ ចាត់ទុកការចុះផ្សាយព័ត៌មានមិនពិតខាងលើជាសម្លាប់អាជីពរបស់ខ្លួន។ «ចុងប៊ិចរបស់អ្នកអាចសម្លាប់ក្តីស្រមៃរបស់ខ្ញុំបាត់បង់យ៉ាងលឿនបំផុត ក៏ហាក់បីដូចជាឲ្យរូបខ្ញុំចាកចេញដោយមិនវិលត្រលប់ចូលវិស័យបាល់ទាត់វិញទាំងមិនទាន់ដល់ពេលវេលា»។ នេះជាការបន្ថែមរបស់ Alex You៕
Tag:
បាល់ទាត់
Alex You
© រក្សាសិទ្ធិដោយ thmeythmey.com
