កីឡាជាតិ
ជាតិ
អ្នកជិះកង់អាជីព២០ប្រទេស ចូលរួមប្រណាំងកង់ពិភពលោកតំបន់ឆ្នេរសមុទ្រកម្ពុជា
×![]()
កីឡាករប្រណាំងកង់អាជីពមកពី២០ប្រទេស ត្រូវប្រជែងគ្នាដណ្តើមជើងឯកក្នុងព្រឹត្តិការណ៍ប្រណាំងកង់ពិភពលោកតំបន់ឆ្នេរសមុទ្រកម្ពុជា ដែលប្រព្រឹត្តទៅចន្លោះពីថ្ងៃទី៤-៦ មករា ឆ្នាំ២០១៩។ ការប្រកួតឆ្លងកាត់ខេត្តចំនួន៣នេះ ធ្វើឡើងក្នុងគោលបំណង ដើម្បីផ្សព្វផ្សាយពីតំបន់ទេសចរណ៍ឆ្នេរសមុទ្រកម្ពុជា និងទាក់ទាញភ្ញៀវទេសចរឲ្យមកកម្សាន្តនៅកម្ពុជា។ ការចម្រាញ់ និងពង្រឹងសមត្ថភាពកីឡាករកម្ពុជា សម្រាប់ត្រៀមព្រឹត្តិការណ៍កីឡាស៊ីហ្គេម ដែលកម្ពុជាធ្វើជាម្ចាស់ផ្ទះ ក៏ជាគោលបំណងមួយផងដែរ។ 
នៅសល់តែមួយថ្ងៃទៀតប៉ុណ្ណោះ ព្រឹត្តិការណ៍ប្រណាំងកង់ពិភពលោកតំបន់ឆ្នេរសមុទ្រកម្ពុជា ដែលឆ្លងកាត់ខេត្តកោះកុង កំពត កែប នឹងឈានមកដល់។ ព្រឹត្តិការណ៍នេះ បានទាក់ទាញកីឡាករកីឡាការិនីប្រណាំងកង់អាជីពជាង២០០នាក់មកពី២០ប្រទេសឲ្យចូលរួម។ កីឡាករទាំងនេះសុទ្ធសឹងជាកីឡាករប្រណាំងកង់អាជីពលំដាប់ពិភពលោក ខណៈកម្ពុជាដាក់កីឡាករពីរក្រុមឲ្យចូលរួមប្រកួតប្រជែង ដើម្បីដកស្រង់បទពិសោធ និងសិក្សាពីបច្ចេកទេសថ្មីៗក្នុងការអភិវឌ្ឍសមត្ថភាព។
ការប្រកួតធ្វើឡើងរយៈពេល៣ថ្ងៃចាប់ពីថ្ងៃទី៤-៦ ខែមករា ឆ្នាំ២០២០ ដោយបែងចែកជាបីដំណាក់កាល។ ក្នុងនោះដំណាក់កាលទី១រៀបចំនៅថ្ងៃទី៤ មករា ដោយចេញដំណើរពីរមណីយដ្ឋានតារាសាគរឆ្ពោះទៅទីរួមខេត្តកោះកុង ដែលមានចម្ងាយ១៥៣,៥គីឡូម៉ែត្រ។ ដំណាក់កាលទី២ធ្វើនៅថ្ងៃទី៥ មករា ដោយចេញដំណើរពីរង្វង់មូល សាយ ភូថង ទៅភ្នំបូកគោ ដែលមានចម្ងាយ ១៧២,៨គីឡូម៉ែត្រ។ ចំណែកដំណាក់កាលទី៣ធ្វើនៅថ្ងៃទី៦ មករា ចេញដំណើរពីភ្នំបូកគោឆ្ពោះទៅខេត្តកែប ដែលមានចម្ងាយ ១៤៧,៧គីឡូម៉ែត្រ។
រដ្ឋមន្ត្រីក្រសួងទេសចរណ៍លោក ថោង ខុន បានបញ្ជាក់កាលពីពេលកន្លងមកថា ព្រឹត្តិការណ៍នេះធ្វើឡើងក្នុងគោលបំណងដើម្បីបង្អួតសម្រស់តំបន់ទេសចរណ៍ឆ្នេរសមុទ្រកម្ពុជា ក្នុងន័យផ្សព្វផ្សាយនិងទាក់ទាញភ្ញៀវទេសចរណ៍ឲ្យមកកម្សាន្តនៅកម្ពុជា។ ជាពិសេស ដើម្បីពង្រឹងសមត្ថភាពកីឡាករកីឡាការិនីកម្ពុជា សម្រាប់ត្រៀមឆ្ពោះទៅកាន់ស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ។
ព្រឹត្តិការណ៍នេះ រៀបចំដោយក្រសួងទេសចរណ៍ សហការជាមួយសហព័ន្ធកីឡាទោចក្រយានកម្ពុជា ក្រោមជំនួយបច្ចេកពីសហព័ន្ធកីឡាទោចក្រយានអន្តរជាតិ(CUI)។ សម្រាប់ព្រឹត្តិការណ៍នេះ ក៏មានការបិទផ្លូវមួយចំនួនផងដែរ៕
Tag:
ប្រណាំងកង់
© រក្សាសិទ្ធិដោយ thmeythmey.com
