ឆ្នាំថ្មី វៀតណាមចូលអង្គុយកៅអីក្រុមប្រឹក្សាសន្តិសុខ UN និងចាប់ផ្តើមកាច់ចង្កូតនាវាអាស៊ាន

អន្តរជាតិ

នយោបាយអន្តរជាតិ

ឆ្នាំថ្មី វៀតណាមចូលអង្គុយកៅអីក្រុមប្រឹក្សាសន្តិសុខ UN និងចាប់ផ្តើមកាច់ចង្កូតនាវាអាស៊ាន

05, Jan 2020 , 7:39 pm

រូបភាព

ដោយ:

ចាប់ពីថ្ងៃទី១ មករា ២០២០ តទៅ រដ្ឋាភិបាលក្រុងហាណូយ ត្រូវមានការទទួលខុសត្រូវកាន់តែខ្ពស់ និងច្រើនជាងមុន។ កាន់តែច្រើននោះគឺ ក្រុងហាណូយ ត្រូវបំពេញតួនាទីជាប្រធានវិលជុំរបស់សមាគមប្រជាជាតិអាស៊ីអាគ្នេយ៍ឬហៅកាត់ថាអាស៊ានសម្រាប់ឆ្នាំ២០២០ផង និងត្រូវបំពេញតួនាទីជាសមាជិកមិនអចិន្ត្រៃយ៍ក្រុមប្រឹក្សាសន្តិសុខនៃអង្គការសហប្រជាជាតិ (UNSC) សម្រាប់អាណត្តិពីរឆ្នាំ២០២០-២០២១ផង។

តាមសេចក្តីថ្លែងការណ៍ចុះថ្ងៃទី២ មករាកន្លងទៅ របស់ប្រធានាធិបតីវៀតណាមលោក Nguyễn Phú Trọng ក្នុងនាមជាប្រធានវិលជុំអាស៊ាន វៀតណាម បានកំណត់យក « ភាពជាធ្លុងមួយ និងការទទួលខុសត្រូវ» ជាមូលបទ និង « ភាពជាដៃគូទុកចិត្តបានក្នុងចីរភាពសន្តិភាព» ជាមូលបទក្នុងនាមជាសមាជិកមិនអចិន្ត្រៃយ៍ក្រុមប្រឹក្សាសន្តិសុខអង្គការសហប្រជាជាតិ។

តាមការចុះផ្សាយរបស់សារព័ត៌មានវៀតណាម Vietnam លោកប្រធានាធិបតី បានកំណត់សម្គាល់ពីការអនុវត្តតួនាទីរបស់ខ្លួនមានបីចំណុចសំខាន់ៗ។ ទីមួយវៀតណាម ប្តេជ្ញារក្សាផលប្រយោជន៍រួមក្នុងតំបន់ និងសហគមន៍អន្តរជាតិ ដោយសំដៅឲ្យបានសន្តិភាព កិច្ចសហប្រតិបត្តិការ និងការអភិវឌ្ឍ ទាំងតាមរយៈក្របខណ្ឌអាស៊ានផង និងក្រុមប្រឹក្សាសន្តិសុខផង។ ការអនុវត្តនេះ វៀតណាម ក៏មិនឲ្យប្រាសចាកពីគោលការណ៍របស់អតីតមេដឹកនាំកំពូលរបស់ខ្លួន គឺលោក ហូ ជីមិញផងដែរ។

គោលដៅទីពីររបស់រដ្ឋអាស៊ានកំពុងតែមានសក្តានុពលមួយនេះគឺ លើកកម្ពស់ ពហុភាគីនិយមខណៈដែលពិភពលោក កំពុងតែប្រឈមការអនុវត្តគោលនយោបាយគាំពារនិយម, ធម្មនុញ្ញអង្គការសហប្រជាជាតិ និងគោលការណ៍គ្រឹះនៃច្បាប់អន្តរជាតិ សម្រាប់សន្តិភាព តុល្យភាព និងភាពល្អប្រសើររបស់ពិភពលោក។ ក្នុងគោលដៅនេះ វៀតណាម នឹងពង្រឹងកិច្ចសហប្រតិបត្តិរវាងអាស៊ាន និងអង្គការសហប្រជាជាតិឲ្យកាន់តែស៊ីជម្រៅ និងមានប្រសិទ្ធភាព។

គោលដៅចុងក្រោយមួយទៀតរបស់វៀតណាម ដែលកំពុងតែអង្គុយកៅអីសំខាន់ៗពីររបស់ពិភពលោកនោះគឺ បុរេសកម្មក្នុងការចូលរួមដោះស្រាយបញ្ហារួមក្នុងតំបន់ និងសកល ជាពិសេសនោះលើបញ្ហាដែលប៉ះពាល់ដោយផ្ទាល់លើសន្តិភាព សន្តិសុខ ស្ថិរភាព ការអភិវឌ្ឍន៍ប្រកបដោយចីរភាព បម្រែបម្រួលអាសធាតុ ការកើនឡើងកម្ពស់ទឹកសមុទ្រ និងផលប៉ះពាល់ក្រោយពីសង្គ្រាមជាដើម។

តាមការអះអាងរបស់រដ្ឋាភិបាលវៀតណាម ការទទួលតួនាទីចម្បង និងសំខាន់ក្នុងឆាកអន្តរជាតិពីរក្នុងពេលតែមួយនេះ គឺជាកិត្តិយសមួយរបស់វៀតណាម ក៏ប៉ុន្តែ ក៏ជាបន្ទុកមួយរបស់វៀតណាម ដ្បិតមានបញ្ហាប្រឈមជាច្រើនដែលត្រូវដោះស្រាយ និងទទួលខុសត្រូវ ជាពិសេសនោះក្នុងអាស៊ានដែលរាប់បញ្ចូលទាំងការសម្របសម្រួលកិច្ចព្រមព្រៀងពាណិជ្ជកម្មសេរី និងបញ្ហាអធិបតេយ្យជាដើម។ ហើយនេះ ក៏មិនទាន់រាប់បញ្ចូលការគំរាមកំហែងសន្តិសុខចុងក្រោយរបស់ពិភពលោក ដែលជាសម្ពាធដ៏ធ្ងន់សម្រាប់ក្រុមប្រឹក្សាសន្តិសុខអង្គការសហប្រជាជាតិ ត្រូវដោះស្រាយផង៕