កីឡាអន្តរជាតិ
អន្តរជាតិ
រូបសំណាក Ibrahimovic នៅមុខកីឡដ្ឋាន Malmo ត្រូវរំលំចោលដោយប្រជាជនស៊ុយអែត
× បន្ទាប់ពីត្រូវបានគេលួចកាត់ច្រមុះ ពេលនេះរូបសំណាករបស់កីឡាករ Zlatan Ibrahimovic ដែលសង់នៅក្រៅកីឡដ្ឋាន Malmo ត្រូវរំលំចោលចេញពីជើងទម្រតែម្តង នៅយប់ថ្ងៃទី៥ ខែមករានេះ។
នេះមិនមែនជាសកម្មភាពបំផ្លាញរូបសំណាករបស់ Ibrahimovic លើកទី១ឡើយ។ មូលហេតុ បានកើតឡើងបន្តបន្ទាប់ ក្រោយមានដំណឹងថាអតីតខ្សែប្រយុទ្ធ Manchester United រូបនេះបានដាក់ទុនវិនិយោគជាមួយក្លិប Hammarby។ Hammarby ជាក្រុមគូប្រជែងរបស់ Malmo ដែលមានមូលដ្ឋានក្នុងលីគកីឡាបាល់ទាត់កំពូលរបស់ស៊ុយអែតដូចគ្នា។
Ibrahimovic វ័យ៣៨ឆ្នាំ ដែលសព្វថ្ងៃបានផ្លាស់ទៅរួមក្រុមចាស់ AC Milan នៃក្របខណ្ឌកំពូលអ៊ីតាលី បានបង្ហាញខ្លួនលើកដំបូងក្នុងអាជីពកីឡាករបាល់ទាត់របស់ខ្លួនជាមួយក្រុម Malmo កាលពី២០ឆ្នាំមុន។ ការបំផ្លាចរូបសំណាកនេះ ត្រូវបានគេជឿជាក់ថាជាទង្វើរបស់ប្រជាជនស៊ុយអែត ដែលជាក្រុមអ្នកគាំទ្រ Malmo ដ្បិតពួកគមិនពេញចិត្តចំពោះអ្វីដែល Ibrahimovic ធ្វើជាមួយក្រុមគូប្រជែង Hammarby។
រូបសំណាករបស់ Ibrahimovic ត្រូវបានគេរកឃើញថាបានរលំនៅម៉ោង ៣ និង ៣០ នាទីភ្លឺព្រឹកថ្ងៃទី៦ ខែមករា ដោយមានប្រឡាក់ថ្នាំបាញ់ដែលសរសេរជាភាសាស៊ុយអែតផង។ មិនតែប៉ុណ្ណោះ លើមុខរូបសំណាក់ក៏ត្រូវបានគេយកអាវក្រុមជម្រើសជាតិស៊ុយអែតគ្របផងដែរ។
អ្នកនាំពាក្យរបស់ក្លិប Malmo បានប្រាប់ BBC Sport ថារូបចម្លាក់នេះត្រូវបានយកទៅជួសជុលឡើងវិញក្រោយការខូចខាត រួចហើយនឹងយកទៅតម្លើងកន្លែងដើមវិញ។
អភិបាលរងក្រុង Malmo លោក Frida Trollmyr បានប្រាប់ទីភ្នាក់ងារព័ត៌មាន AFP ថាលោកយល់ច្បាស់ថាមនុស្សជាច្រើនមានការអាក់អន់ចិត្តចំពោះអ្វីដែល Ibrahimovic បានធ្វើ ប៉ុន្តែការបំផ្លាញរបស់សារធារណបែបនេះគឺមិនត្រឹមត្រូវឡើយ។
Ibrahimovic អតីតសមាជិកក្រុម Ajax, Juventus, Inter Milan, Barcelona, និង Paris St-Germain បានចាកចេញពីក្រុម LA Galaxy នៃលីគកីឡាបាល់ទាត់កំពូលអាមេរិក (MLS) ក្រោយបង្ហាញខ្លួន៥៦ប្រកួត និងស៊ុតបញ្ចូលទីបាន៥២គ្រាប់ ដើម្បីទៅរួមក្រុម AC Milan វិញនៅខែមករានេះ៕
Tag:
Zlatan Ibrahimovic
Malmo
© រក្សាសិទ្ធិដោយ thmeythmey.com