អន្តរជាតិ
ជប៉ុន៖ ឈានចូលវ័យ១១៧ឆ្នាំ លោកយាយ តាន់ណាកា បន្តតំណែងជាបុគ្គលចាស់ជាងគេលើលោក
លោកស្រី ខេណេ តាន់ណាកា (Kane Tanaka) ពេលទទួលពានរង្វាន់ឯតទគ្គកម្មពិភពលោក នាថ្ងៃទី៩ ខែមីនា ឆ្នាំ២០១៩, រូបភាព៖ Reuters
×![]()
ដោយ: ធៀន ភារិន្ទ
ថ្ងៃទី២ ខែមករា គឺត្រូវជាខួបអាយុ១១៧ឆ្នាំរបស់លោកយាយ ខាណេ តាន់ណាកា (Kane Tanaka)។ ក្នុងឱកាសនេះ លោកយាយ ខាណេ តាន់ណាកា នៅតែបន្តជាបុគ្គលដែលមានវ័យចំណាស់ជាងគេបំផុតនៅលើពិភពលោក។ 
តាមការផ្សាយរបស់ប្រព័ន្ធផ្សព្វផ្សាយជប៉ុនTVQ Kyushu Broadcasting Co លោកយាយ ខាណេ តាន់ណាកាបានប្រារព្ធខួប១១៧ឆ្នាំ នៅថ្ងៃទី៥ ខែមករា នាមជ្ឈមណ្ឌលថែរក្សាជនចាស់ជរាមួយកន្លែង នាទីក្រុង Fukuoka ភាគខាងត្បូងជប៉ុន។ ជាមួយវ័យវ័យ១១៧ឆ្នាំនេះ លោកស្រី តាន់ណាកា នៅតែបន្តឯតទគ្គកម្មពិភពលោកក្នុងនាមជាបុគ្គលដែលមានវ័យចំណាស់ជាងគេបំផុត។
អមជាមួយវត្តមានបុគ្គលិក និងមិត្តភក្តិក្នុងមជ្ឈមណ្ឌលថែទាំជនចាស់ជរា លោកយាយ តាន់ណាកា បានប្រារព្ធពិធីខួបកំណើតយ៉ាងសប្បាយរីករាយ។ ជាមួយស្នាមញញឹម ស្ត្រីវ័យ១១៧ឆ្នាំរូបនេះ បានពិសានំខេកមួយចំណិតតូច ហើយនិយាយពាក្យមួយឃ្លាថា៖ «ខ្ញុំចង់បានបន្ថែមទៀត»។
លោកយាយជនជាតិជប៉ុនរូបនេះតាន់ បានទទួលពានរង្វាន់ឯតទគ្គកម្មពិភពលោក(Guinness World Records) នៃបុគ្គលដែលមានវ័យចំណាស់ជាងគេ នាថ្ងៃទី៩ ខែមីនា ឆ្នាំ២០១៩ មកម្លេះ។ ពេលនោះលោកស្រីមានអាយុ ១១៦ឆ្នាំ និង ៦៦ថ្ងៃ។ បើតាម Guinness លោកយាយតាន់ណាកា បានកើតនៅក្នុងឆ្នាំ ១៩០៣ ពោលគឺតាំងពីមុខសង្គ្រាមលោកលើកទីមួយមកម្លេះ។ តាំងពីរៀបអាពាហ៍ពិពាហ៍នៅក្នុងឆ្នាំ១៩២២ រហូតមកទល់ពេលនេះ លោកស្រីមានកូនចំនួន៤នាក់ និងកូនចិញ្ចឹមមួយនាក់។
សូមបញ្ជាក់ថា ជប៉ុន គឺជាប្រទេសមួយ ដែលបានជាប់ក្នុងបញ្ចី ដែលមានប្រជាជនវ័យចំណាស់ច្រើន ខណៈពេលអត្រាកំណើតមានចំនួនតិច។ បញ្ហានេះ នឹងបង្កឲ្យជប៉ុនខ្វះកម្លាំងពលកម្ម និងធ្វើឲ្យកំណើនសេដ្ឋកិច្ចរបស់ប្រទេស ដើរយឺត។ ជាក់ស្តែងនៅក្នុងសេចក្តីថ្លែងការណ៍របស់ក្រសួងសង្គមកិច្ចជប៉ុន អត្រាធ្លាក់ចុះនៃកំណើតទារក គឺមានរហូតដល់៥,៩ភាគរយឯណោះក្នុងឆ្នាំ២០១៩។ ពោលគឺមានទារកតិចជាង ៩០ម៉ឺននាក់តែប៉ុណ្ណោះ បានចាប់កំណើត៕
Tag:
ជប៉ុន
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
