រថយន្ត
អន្តរជាតិ
ឆ្នាំ២០១៩ មនុស្សតែម្នាក់ប៉ុណ្ណោះដែលស្លាប់ដោយគ្រោះចរាចរណ៍នៅក្រុង Oslo
× សុវត្ថិភាពចរាចរណ៍នៅក្រុងអូស្លូ ប្រទេសន័រវេស ពិតជាគំរូដ៏ល្អបំផុតរបស់ពិភពលោក។ នារយៈពេលពេញមួយឆ្នាំ២០១៩ គ្មានថ្មើរជើងណាម្នាក់ អ្នកជិះកង់ណាម្នាក់ ឬកុមារណាម្នាក់ ស្លាប់ដោយសារគ្រោះថ្នាក់ចរណ៍នៅអូស្លូឡើយ ពោលគឺមានតែ១ករណីប៉ុណ្ណោះ។
សារព័ត៌មានន័រវេស Aftenposten បានរាយការណ៍ថា មានមនុស្សម្នាក់តែប៉ុណ្ណោះដែលបានស្លាប់ដោយសារគ្រោះថ្នាក់ចរាចរណ៍កាលពីមិថុនា នៅពេលដែលរថយន្តរបស់គាត់បើកបុករបងមួយនៅសង្កាត់ Skillebekk។
កាលពីឆ្នាំ១៩៧៥ ករណីគ្រោះថ្នាក់ចរណ៍នានា បានសម្លាប់មនុស្ស៤១នាក់ នៅអូស្លូ ហើយក្រោយមករដ្ឋាភិបាល បានចាប់ផ្តើមវិនិយោគដើម្បីរឹតបន្តឹងសុវត្ថិភាពចរាចរណ៍។ យានយន្តត្រូវបានហាមឃាត់នៅបណ្តាផ្លូវជាច្រើនក្នុងទីប្រជុំជន តាមរយៈការដាក់ដំណើរការកម្មវិធី «Vision Zero»។
លោក Chirstoffer Solstad Steen មន្ត្រីក្រុមប្រឹក្សាសុវត្ថិភាពចរាចរណ៍ន័រវេស បានបញ្ជាក់ប្រាប់ Aftenposten ថា៖ «ការបែងចែកប្រភេទយានយន្តឲ្យបានច្បាស់លាស់នៅលើផ្លូវថ្នល់ ពិតជារួមចំណែកយ៉ាងខ្លាំងក្នុងការកាត់បន្ថយគ្រោះថ្នាក់ ជាពិសេសការលើកទឹកចិត្តការជិះកង់»។
ន័វេសអនុវត្តបានយ៉ាងល្អចំពោះវិធានការកាត់បន្ថយល្បឿន ពិសេសនៅក្បែរបណ្តាសាលារៀន ហើយផ្តល់អាទិភាពខ្ពស់សម្រាប់ថ្មើរជើង និងអ្នកជិះកង់។ ជាមួយគ្នានេះ គុណភាពនៃបណ្តាញផ្លូវថ្នល់ និងការបំពាក់ឧបករណ៍ផ្សេងៗក្នុងយានយន្ត ក៏មានការរីកចម្រើនផងដែរ។
នៅថ្នាក់ជាតិ ន័រវេសមានមនុស្ស១១០នាក់ស្លាប់ដោយគ្រោះថ្នាក់ចរាចរណ៍នៅឆ្នាំ២០១៩ ខណៈឆ្នាំ២០១៨ មាន១០៨នាក់។ ទោះបីជាយ៉ាងណាក៏ដោយ គេជឿជាក់ថា អត្រាគ្រោះថ្នាក់នឹងត្រូវបានកាត់បន្ថយជាបន្តបន្ទាប់។
នៅឆ្នាំ១៩៧០ មនុស្ស៥៦០នាក់ ក្នុងនោះក្មេង១០១នាក់ បានស្លាប់ដោយសារគ្រោះថ្នាក់ចរាចរណ៍នៅន័រវេស ហើយជិត៥០ឆ្នាំក្រោយមក មានយុវជនអាយុ១៦ឆ្នាំតែម្នាក់ប៉ុណ្ណោះដែលបានស្លាប់៕
© រក្សាសិទ្ធិដោយ thmeythmey.com