កីឡាអន្តរជាតិ
អន្តរជាតិ
កីឡាការិនី Ash Barty នឹងផ្តល់ប្រាក់ពីការប្រកួតដល់ជនរងគ្រោះ ដោយសារភ្លើងឆេះព្រៃនៅអូស្ត្រាលី
×![]()
ដោយ: ទេព ពិទូរ្យ
កំពូលតារាវាយកូនបាល់អូស្ត្រាលី Ash Barty នឹងបរិច្ចាគប្រាក់ចំនួន ៣៦ ម៉ឺនដុល្លារដល់គ្រួសារដែលរងផលប៉ះពាល់ដោយសារភ្លើងឆេះព្រៃ ប្រសិនបើនាងឈ្នះការប្រកួតកម្រិតអន្តរជាតិ។ កីឡាការិនីលំដាប់ទីមួយពិភពលោករូបនេះ បានប្រកាសដូច្នេះនៅឯកម្មវិធីប្រកួតវាយកូនបាល់ Brisbane International នៅថ្ងៃទី៥ ខែមករា។
វិបត្តិភ្លើងឆេះព្រៃនៅប្រទេសអូស្ត្រាលីបានសម្លាប់មនុស្ស ២៤នាក់ ព្រមទាំងបំផ្លាញផ្ទះសម្បែងរបស់ប្រជាពលរដ្ឋជាង ១៥០០ខ្នង និងធ្វើឲ្យប៉ះពាល់ដល់គុណភាពដីជាង ៣,៦ លានហិកតាផង។ រីឯសត្វចំនួន៥០០លានក្បាលក៏ត្រូវឆេះងាប់ក្នុងហេតុការណ៍ភ្លើងឆេះព្រៃនេះដែរ។
«សត្វព្រៃត្រូវបាត់បង់ទៅហើយ ប៉ុន្តែទាំងនេះក៏បានជះឥទ្ធិពលដល់ការរស់នៅ និងផ្ទះសម្បែងផងដែរ ដូច្នេះខ្ញុំបានគិតជាមួយក្រុមកីឡាករ និងក្រុមគ្រួសារតាមមធ្យោបាយដែលយើងអាចជួយពួកគេបាន»។ នេះជាការលើកឡើងរបស់នាង Barty។
ទាំងនេះជាមានការផ្តួចផ្តើមគំនិតដ៏អស្ចារ្យពីសំណាក់កីឡាករ កីឡាការិនីវាយកូនបាល់ អ្នកវាយកូនគោល និងកីឡាករបាល់ទាត់ជាដើមនៅទូទាំងប្រទេស ដែលព្យាយាមជួយដល់ជនរងគ្រោះទាំងអស់នោះ។
Barty ដែលមានវ័យ២៣ឆ្នាំ បានសម្រេចចិត្តថា រាល់ប្រាក់រង្វាន់របស់នាងនៅក្នុងការប្រកួតវាយកូនបាល់នៅ Brisbane ប្រទេសអូស្ត្រាលី នឹងត្រូវបរិច្ចាគទៅកាកបាទក្រហមអូស្ត្រាលី ដើម្បីបញ្ជូនដល់ក្រុមគ្រួសារដែលខូចខាតផ្ទះសម្បែង។
កីឡាការិនីលំដាប់ទី១ពិភពលោក សញ្ជាតិអូស្ត្រាលី ក៏ធ្លាប់បានបរិច្ចាគថវិកាជាង ៣០០០០ ដុល្លាររួចមកហើយកាលពីចុងឆ្នាំកន្លងទៅដល់ RSPCA ដើម្បីជួយដល់សត្វព្រៃ ដែលរងគ្រោះដោយគ្រោះមហន្តរាយ។
Barty ជាកីឡាការិនីវាយកូនបាល់ដែលរកបានប្រាក់ចំណូលច្រើនជើងគេនៅឆ្នាំ២០១៩ ក្នុងចំនួនទឹកប្រាក់ ១៦,៤លានដុល្លារអាមេរិក។
ក្រៅពី Barty ក៏មានកីឡាករវាយកូនបាល់ជាច្រើនទៀតដូចជា Nick Kyrgios, Sam Stosur និង Alex de Minaur ជាដើមក៏បានបរិច្ចាគប្រាក់ពីការប្រកួតរបស់ខ្លួនក្នុងហេតុការណ៍ភ្លើងឆេះព្រៃដែលអូសបន្លាយរយៈពេលជាង៣ខែមកហើយនោះ៕
Tag:
Ash Barty
ភ្លើងឆេះព្រៃ
អូស្ត្រាលី
© រក្សាសិទ្ធិដោយ thmeythmey.com
