ជាតិ
រដ្ឋាករទឹកស្វយ័តសៀមរាប កំពុងសង់រោងចក្រផលិតទឹកស្អាតមួយទៀត ដោយទាញទឹកពីបឹងទន្លេសាប
×![]()
សៀមរាប៖ រដ្ឋាករទឹកស្វយ័តសៀមរាប នឹងសាងសង់រោងចក្រផលិតទឹកស្អាតខ្នាតធំមួយកន្លែងទៀត មានទីតាំងនៅសង្កាត់ជ្រាវ ក្រុងសៀមរាប។ នេះជារោងចក្រដំបូងដែលទាញទឹកពីបឹងទន្លេសាប ដែលវាមានសមត្ថភាពផលិតទឹកស្អាតបានចំនួន ៦០,០០០ម3/ថ្ងៃ ។ នេះបើតាម លោក ឃុត វុត្យារិទ្ធ អគ្គនាយករដ្ឋាករទឹកស្វយ័តសៀមរាប។ 
លោក ឃុត វុត្យារិទ្ធ បញ្ជាក់ក្នុងបទសម្ភាសជាមួយសារព័ត៌មានថ្មីៗថា រោងចក្រផលិតទឹកស្អាតនេះកំពុងសាងសង់ ហើយគ្រោងធ្វើពិធីបញ្ចុះសីមា នៅខែមីនា ឬខែមេសា។ រោងចក្រនេះទទួលបាន
ឥណទានពីរាជរដ្ឋាភិបាលជប៉ុនតាមរយៈអង្គការ JICA។ លោក ឃុត វុត្យារិទ្ធ ជឿជាក់ថា នឹងអាចបំពេញតម្រូវការទឹកស្អាត ដល់ប្រជាជនក្នុងក្រុងសៀមរាប ដែលមានចំនួនសរុប៤៣ពាន់គ្រួសារ ស្មើនឹងជាង២៣ម៉ឺននាក់ នៅឆ្នាំ២០២៣។ តាមការព្យាករ បច្ចុប្បន្នក្រុងសៀមរាប មានតម្រូវការទឹកស្អាត ប្រមាណ ៦០,០០០ម3/ថ្ងៃ ហើយចំនួននេះ នឹងកើនដល់ ៩០,០០០ម3/ថ្ងៃ នៅឆ្នាំ ២០៣០។
បើតាមលោក ឃុត វុត្យារិទ្ធ ខេត្តសៀមរាប មានរោងចក្រផលិតទឹកស្អាតចំនួន២កន្លែង។ ទីមួយរោងចក្រប្រព្រឹត្តិកម្មទឹកស្អាតទឹកវិលទី១ ដែលមានសមត្ថភាពផលិតទឹកស្អាត១៥,០០០ម3/ថ្ងៃ ដែលជាហិរញ្ញប្បទានឥតសំណងរបស់រាជរដ្ឋាភិបាលជប៉ុនតាមរយៈ JACA និងរោងចក្រប្រព្រឹត្តកម្មទឹកស្អាត ទឹកវិលទី២ ដែលមានសមត្ថភាពផលិតទឹកស្អាត ១៥,០០០ម3/ថ្ងៃ។ រោងចក្រនេះ ស្ថិតក្រោមឥណទានសម្បទានរបស់រដ្ឋាភិបាលបារាំង តាមរយៈ AFD។ ដូច្នេះ បច្ចុប្បន្នរដ្ឋាករទឹកស្វយ័តសៀមរាបមានសមត្ថភាពផលិតទឹកស្អាតចំនួន ៣០,០០០ម3/ថ្ងៃ ដែលគ្របដណ្ដប់លើប្រជាជនប្រមាណ៣៥ភាគរយប៉ុណ្ណោះ៕
Tag:
រដ្ឋាករទឹក
ទឹកស្អាត
ឃុត វុត្យារិទ្ធ
© រក្សាសិទ្ធិដោយ thmeythmey.com
