Puja Tomar ត្រៀមរួចរាល់ក្នុងការប្រកួតធំបំផុតសម្រាប់ជីវិតលើសង្វៀន ONE
07, Jan 2020 , 8:59 am
រូបភាព
×
អត្ថបទ៖ស៊ីធី
កីឡាការិនីឥណ្ឌា Puja Tomar ដែលមានរហស្សនាម «The Cyclone» បានត្រៀមរួចរាល់ហើយសម្រាប់ការប្រកួតដ៏ធំបំផុតនៅក្នុងជីវិតរបស់នាង។ នៅថ្ងៃទី១០ ខែមករា Tomar នឹងចាប់ផ្ដើមនៅ ONE Championship សម្រាប់ឆ្នាំ ២០២០ នាសង្វៀន Impact Arena នៅក្រុងបាងកក ប្រទេសថៃ។
Puja Tomar នឹងប្រឈមមុខដាក់ ម្ចាស់ខ្សែក្រវាត់ ONE Atomweight Kickboxing និង Muay Thai World Champion កីឡាការិនី Stamp Fairtex ដែលជាគូឯករងនៅក្នុងកម្មវិធី ONE: A NEW TOMORROW។ កីឡាការិនីវ័យ ២៦ ឆ្នាំមកពីតំបន់ Muzaffarnagar នៃប្រទេសឥណ្ឌា បានទទួលស្គាល់ថា៖ «ខ្ញុំមានសម្ពាធយ៉ាងខ្លាំង ព្រោះវាជាការប្រកួតដ៏ធំបំផុតក្នុងជីវិត។ Stamp Fairtex ជាម្ចាស់ខ្សែក្រវាត់ដល់ពីរខ្សែ។ ដូច្នេះវាជាការប្រកួតដ៏តានតឹង។ ពេលខ្លះ ខ្ញុំមើលឃើញរឿងអវិជ្ជមានជាច្រើនលើបណ្ដាញសង្គម ប៉ុន្តែ ខ្ញុំត្រូវតែព្យាយាមធ្វើឲ្យទៅជាផ្លូវវិជ្ជមានមួយ។ ដូច្នេះខ្ញុំមានអារម្មណ៍ថា ខ្ញុំនឹងធ្វើបានល្អ»។
Tomar ដែលជាជើងឯកក្នុងកម្មវិធីប្រកួត Indian Wushu Champion ច្រើនសម័យមានទំនុកចិត្តខ្ពស់ថានឹងធ្វើបានល្អនៅរាជធានីបាងកក។ ក្រោយពេលចាប់ផ្ដើមអាជីពដ៏លំបាក «The Cyclone» មានកំណត់ត្រាជាច្រើននៅក្នុងជីវិត។
បន្ទាប់មក Stamp ក៏ផ្អាកសិន ប៉ុន្តែងាកមកប្រកួតក្នុងកម្មវិធី ONE Super Series ដើម្បីឈ្នះខ្សែក្រវាត់ ONE Atomweight Kickboxing និង Muay Thai World Championships។ នៅខែ សីហា Stamp ត្រលប់មកប្រកួតគុនចម្រុះវិញដោយឃ្លេកយកឈ្នះលើ Asha Rokaនៅទឹកទី៣។ ៣ខែបន្ទាប់ពោលខែ វិច្ឆិកា Stamp បន្តគ្រប់គ្រងការប្រកួតបានល្អលើកីឡាការិនីកូនកាត់វៀតណាមអាមេរិក Bi Nguyen ហើយក៏ឈ្នះពិន្ទុជាឯកច្ឆន្ទ។
យ៉ាងណាក្ដី Tomar បានស្វែងយល់ច្រើនអំពីដៃគូមកពី Pattaya។ ដ្បិត Stamp ល្អ ប៉ុន្តែមិនមែនល្អគ្រប់រឿងទាំងអស់នោះឡើយ ហើយម្ចាស់ខ្សែក្រវាត់ពីរកម្រិត ONE World Champion ក៏អាចទទួលលទ្ធផលមិនល្អដែរ។
កុំភ្លេចទស្សនា កម្មវិធីបន្ទាប់របស់ស្ថាប័ន ONE Championship សូមទស្សនា ONE: A NEW TOMORROW នៅថ្ងៃទី ១០ ខែ មករា ចាប់ពីវេលាម៉ោង ៧ ល្ងាចតទៅដែលមានផ្សាយផ្ទាល់តាមរយៈ Facebook, Twitter, YouTube,និង ONE Super App៕