ភ្នំពេញ៖ កម្ពុជា មិនទាន់មានផែនការជម្លៀសប្រជាពលរដ្ឋខ្មែរចេញពីតំបន់មជ្ឈឹមបូព៌ាឡើយ ដោយរង់ចាំមើលស្ថានភាពជម្លោះរវាងអាមេរិក និងអ៊ីរ៉ង ដែលកំពុងឡើងកម្ដៅខ្លាំង ក្រោយមានការវាយប្រហារសម្លាប់លោកឧត្តមសេនីយ៍ Qasem Soleimani មេបញ្ជាការកម្លាំង Qud នៃកងឆ្មាំបដិវត្តន៍អ៊ីរ៉ង់ កាលពីថ្ងៃទី៣ មករា។
អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ លោក កុយ គួង បាននិយាយថា រដ្ឋាភិបាលកំពុងតាមដានបញ្ហាជម្លោះរវាងអាមេរិក និងអ៊ីរ៉ុងនេះ ប៉ុន្តែគ្មានគម្រោងជម្លៀសពលរដ្ឋខ្មែរចេញពីតំបន់មជ្ឈិមបូព៌ានោះទេ។
ថ្លែងប្រាប់សារព័ត៌មានថ្មីៗ លោក កុយ គួង បាននិយាយដូច្នេះថា៖«យើងមិនមានពលរដ្ឋច្រើនទេ ហើយក៏មិនមានផែនការជម្លៀសពលរដ្ឋចេញពីកន្លែងនោះដែរ ព្រោះយើងមានស្ថានទូតយើងប្រចាំប្រទេសកូវ៉ែត និងស្ថានទូតខ្មែរប្រចាំអេហ្ស៊ីប កំពុងយកចិត្តទុកដាក់តាមដានបញ្ហានេះ ដើម្បីដោះស្រាយឱ្យទាន់សភាពការណ៍»។
លោក កុយ គួង មិនច្បាស់ថា មានពលរដ្ឋខ្មែរប៉ុន្មាននាក់ ដែលកំពុងរស់នៅប្រទេសអ៊ីរ៉ង់ និងតំបន់មជ្ឈិមបូព៌ាឡើយ ។«ខ្ញុំគ្រាន់តែដឹងថា ពលរដ្ឋខ្មែរអ៊ីស្លាមយើង គាត់ទៅរស់នៅប្រទេសអារ៉ាប៊ីសាអូឌីតច្រើនជាងគេ ភាគច្រើនគាត់ទៅរៀនផ្នែកសាសនា និងជំនាញផ្សេងៗទៀត»។ នេះជាការបញ្ជាក់របស់អ្នកនាំពាក្យក្រសួងការបរទេសកម្ពុជា ។
សារព័ត៌មានថ្មីៗ មិនទាន់អាចទាក់ទងលោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ ដើម្បីសុំព័ត៌មានលម្អិតពីតួលេខពលរដ្ឋខ្មែរទៅធ្វើការនៅប្រទេស ជាពិសេសនៅតំបន់មជ្ឈិមបូព៌ានេះបាននៅឡើយទេ។
ស្របពេលដែលជម្លោះរវាងអាមេរិក និងអ៊ីរ៉ង់ កាន់តែអាក្រក់នេះ ប្រទេសនៅតំបន់អាស៊ាន ដែលក្នុងនោះមានមេដឹកនាំថៃ និងហ្វីលីពីន បានចេញមកប្រកាសពីគម្រោងជម្លៀសពលរដ្ឋពួកគេ ចេញពីតំបន់មជ្ឈិមបូព៌ានេះ។ ប្រជាជនហ្វីលីពីនចំនួន៦ពាន់នាក់ មានវត្តមាននៅក្នុងអ៊ីរ៉ាក់ និង១,៦០០នាក់នៅក្នុងអ៊ីរ៉ង់។ ពួកគេភាគច្រើន ជាអ្នកបម្រើការតាមផ្ទះ និងជាបុគ្គលិករបស់ក្រុមហ៊ុនអន្តរជាតិនានា។
ចំណែកប្រជាជនថៃចំនួន ២៥៧ នាក់ កំពុងបម្រើការងារក្នុងប្រទេសអ៊ីរ៉ង់ និង ២៥ នាក់ផ្សេងទៀត ក្នុងប្រទេសអ៊ីរ៉ាក់ ។ ភាគច្រើននៃពលករថៃទាំងនោះ បម្រើការក្នុងភោជនីយដ្ឋាន កន្លែងម៉ាស្សា និងអាជីវកម្មលក់សាច់ត្រី ជាដើម។ មេដឹកនាំប្រទេសទាំងពីរ កំពុងព្រួយបារម្ភពីសុវត្ថភាពពលរដ្ឋខ្លួន និងស្នើឲ្យភាគីពាក់ព័ន្ធទាំងអស់នៃជម្លោះអាមេរិក និងអ៊ីរ៉ង់ អនុវត្តភាពអត់ធ្មត់អតិបរមា និងបញ្ចៀសការប្រើកម្លាំងក្នុងគោលដៅបន្ធូរបន្ថយភាពតានតឹង ព្រមទាំងរក្សាសន្តិភាពនិងស្ថិរភាពក្នុងតំបន់។
គួរបញ្ជាក់ថា ជម្លោះអាមេរិក និងអ៊ីរ៉ង់ ដែលកំពុងកាន់តែអាក្រក់នេះ កើតឡើងក្រោយពីលោក Abu Mahdi al-Muhandis មេបញ្ជាការរងរបស់ Hashed និងឧត្តមសេនីយ៍ Qasem Soleimani ប្រមុខកងកម្លាំង Qud នៃកងឆ្មាំបដិវត្តន៍ ត្រូវបានសម្លាប់ក្នុងការវាយប្រហារផ្លូវអាកាសរបស់អាមេរិកនៅព្រលានយន្តហោះទីក្រុងបាក់ដាដ កាលពីថ្ងៃទី៣ ខែមករា ។ លោក Soleimani គឺជាមន្ត្រីជាន់ខ្ពស់មួយរូបរបស់អ៊ីរ៉ង់ ហើយជាមន្ត្រីទទួលបន្ទុកកិច្ចនៅអ៊ីរ៉ាក់ផងដែរ។ ក្រៅពីលោក Soleimani មនុស្ស៦នាក់ផ្សេងទៀត ក៏បានបាត់បង់ជីវិតក្នុងការវាយប្រហារនេះ ហើយរថយន្តពីរគ្រឿង បានឆេះខ្ទេច៕