អន្តរជាតិ
ត្រាំ ប្រើ«សន្លឹកបៀរអ៊ីរ៉ង់»ដែលធ្លាប់ចោទអូបាម៉ាថានឹងលេងដើម្បីឈ្នះឆ្នោត?
លោកប្រធានាធិបតីអាមេរិក ដូណាល់ ត្រាំ និងអតីតប្រធានាធិបតីអាមេរិក បារ៉ាក់ អូបាម៉ា ក្នុងជំនួបនាពេលកន្លងទៅ (AFP)
×![]()
សារលើបណ្តេញសង្គម Twitter ក្នុងឆ្នាំ២០១១និង២០១២ ដែលលោក ដូណាល់ ត្រាំ បានគិតទុកថា ប្រធានាធិបតីអាមេរិកទី៤៤ បារ៉ាក់ អូបាម៉ា នឹងបញ្ឆេះសង្គ្រាមជាមួយអ៊ីរ៉ង់ដើម្បីជាប់ឆ្នោតជាថ្មីនោះ ត្រូវបានគេចែករំលែកព្រោងព្រាត(viral) ក្រោយសហរដ្ឋអាមេរិកបានធ្វើឃាតមេបញ្ជាការជាន់ខ្ពស់អ៊ីរ៉ង់ម្នាក់។ ទង្វើអាមេរិកនេះ បានបង្កភាពតានតឹង និងការប្រឈមមុខកាន់តែខ្លាំងជាមួយរដ្ឋាភិបាលក្រុងតេហេរ៉ង់។ 
លោកប្រធានាធិបតី ត្រាំ បានចេញបញ្ជាដោយផ្ទាល់ឲ្យបើកការវាយប្រហារតាមដែនអាកាសសម្លាប់ឧត្តមសេនីយ៍ Qassem Soleimani មេបញ្ជាការកម្លាំង Qud នៃកងឆ្មាំបដិវត្តន៍អ៊ីរ៉ង់នៅព្រលានយន្តហោះអន្តរជាតិបាក់ដាដ កាលពីសុក្រសប្តាហ៍មុន។ ប៉ុន្មានម៉ោងក្រោយមក មន្ទីរបញ្ចកោណអាមេរិក បានបញ្ជាក់ថា ឧត្តមសេនីយ៍ Soleimani ដែលជាបងធំទី២ក្នុងប្រទេសអ៊ីរ៉ង់ បន្ទាប់មេដឹកនាំកំពូល Ali Khamenei បានរៀបចំផែនការយ៉ាងសកម្មវាយប្រហារមន្ត្រីទូតអាមេរិក និងប្រជាជនអាមេរិកក្នុងប្រទេសអ៊ីរ៉ង់ និងនៅទូទាំងតំបន់មជ្ឈិមបូព៌ា។
ទោះបីជាភាពជោគជ័យរបស់លោក ដូណាល់ត្រាំ ចំពោះការវាយប្រហារនេះក៏ដោយក្តី អ្នកប្រើប្រាស់បណ្តាញសង្គមជាច្រើន បាននាំគ្នាចែករំលែកការបង្ហោះពីលើកមុនរបស់លោកត្រាំ ចន្លោះឆ្នាំ២០១១ និង២០១២ នៅពេលលោក អូបាម៉ា គឺជាប្រធានាធិបតីអាមេរិក។ កាលនោះ លោក ត្រាំ ដែលជាសមាជិកបក្សសាធារណរដ្ឋម្នាក់ បានថ្កោលទោសគំនិតប្រើកម្លាំងយោធារបស់រដ្ឋបាលអូបាម៉ាប្រឆាំងប្រទេសអ៊ីរ៉ង់ ដើម្បីឈ្នះឆ្នោតឡើងវិញ។
In order to get elected, @BarackObama will start a war with Iran.
— Donald J. Trump (@realDonaldTrump) November 29, 2011
Don't let Obama play the Iran card in order to start a war in order to get elected--be careful Republicans!
— Donald J. Trump (@realDonaldTrump) October 22, 2012
«ក្នុងគោលដៅជាប់ឆ្នោត លោក បារ៉ាក់ អូបាម៉ា នឹងបញ្ឆេះសង្គ្រាមជាមួយអ៊ីរ៉ង់»។ លោក ដូណាល់ ត្រាំ បានសរសេរបែបនេះ នៅលើបណ្ដាញសង្គម Twitter ចុះថ្ងៃ ៣០ វិច្ឆិកា ឆ្នាំ២០១១ ។ ចំណែកសារមួយទៀត ដែលបានបង្ហោះនៅថ្ងៃទី ២២ តុលា ឆ្នាំ២០១២ លោក ត្រាំ បានសរសេរថា៖«កុំអនុញ្ញាតឲ្យ លោក អូបាម៉ា លេងសន្លឹកបៀរអ៊ីរ៉ង់ដែលបញ្ឆេះសង្គ្រាម ក្នុងគោលដៅជាប់ឆ្នោតជាថ្មី។ សូមប្រយ័ត្នប្រយែង សមាជិកបក្សសាធារណរដ្ឋ!»។
ក្រៅពីការបង្ហោះសារលើបណ្តាញសង្គម Twitter លោក ដូណាល់ ត្រាំ ក៏ធ្លាប់និយាយតាមរយៈវីដេអូមួយ កាលពីថ្ងៃទី ១៦ ខែវិច្ឆិកា ឆ្នាំ២០១១ ។ ក្នុងវីដេអូដែលថតនៅផ្ទះរបស់លោកផ្ទាល់ លោក បាននិយាយថា៖«ប្រធានាធិបតីយើង (អូបាម៉ា) នឹងចាប់ផ្តើមសង្គ្រាមជាមួយអ៊ីរ៉ង់ព្រោះថា លោកពិតជាគ្មានសមត្ថភាពចរចា។ លោកគឺទន់ខ្សោយ និងគ្មានប្រសិទ្ធភាព។ ដូច្នេះវិធីសាស្ត្រតែមួយគត់ដែលលោកគិតឃើញដើម្បីអាចឲ្យលោកជាប់ឆ្នោតឡើងវិញបាននោះ គឺជាការបញ្ឆេះសង្គ្រាមជាមួយអ៊ីរ៉ង់»។
Trump on Nov. 16, 2011:
— JM Rieger (@RiegerReport) January 3, 2020
“Our president will start a war with Iran because he has absolutely no ability to negotiate. He's weak and he's ineffective. So the only way he figures that he's going to get reelected — and as sure as you're sitting there — is to start a war with Iran.” pic.twitter.com/usZFLiHnBw
ទោះក្រោយលោក អូបាម៉ា បានជាប់ឆ្នោតអាណត្តិទី២ លោក ដូណាល់ ត្រាំ បានបន្តចោទប្រកាន់លោកថាចង់ធ្វើសង្គ្រាមជាមួយប្រទេសអ៊ីរ៉ង់ ។ ក្នុងសារលើបណ្តាញសង្គម Twitter នៅថ្ងៃ១៧ កញ្ញា ឆ្នាំ២០១៣ លោក ត្រាំ បានសរសេរថា៖«ខ្ញុំគិតទុកថា ប្រធានាធិបតី អូបាម៉ា នៅពេលណាមួយ នឹងវាយប្រហារអ៊ីរ៉ង់ដើម្បីទុកមុខឲ្យខ្លួនឯង»។
I predict that President Obama will at some point attack Iran in order to save face!
— Donald J. Trump (@realDonaldTrump) September 16, 2013
សូមបញ្ជាក់ថា ការរិះគន់របស់លោកត្រាំលើគោលនយោបាយអ៊ីរ៉ង់របស់លោកអូបាម៉ា បានកើតឡើងខណៈដែលកំណើនភាពតានតឹងជុំវិញកម្មវិធីនុយក្លេអ៊ែររបស់អ៊ីរ៉ង់ ដែលកាលនោះរដ្ឋបាលលោក អូបាម៉ា បានព្យាយាមផ្អាកសកម្មភាពនេះ។ អំឡុងអាណត្តិទី២ លោក អូបាម៉ាបានផ្លាស់ប្តូរជំហរចំពោះអ៊ីរ៉ង់ ហើយក្រោយមក លោកបានជោគជ័យចរចាបង្កើតកិច្ចព្រមព្រៀងនុយក្លេអ៊ែរមួយក្នុងឆ្នាំ២០១៥ ដែលក្រុងតេហេរ៉ង់បានផ្អាកកម្មវិធីនុយក្លេអ៊ែរជាថ្នូរនឹងការបន្ធូរបន្ថយទណ្ឌកម្ម។
ចំណែក អំឡុងរដ្ឋបាលលោកត្រាំរយៈពេល៣ឆ្នាំមកនេះ ភាពតានតឹងជាមួយរវាងក្រុងវ៉ាស៊ីនតោន និងតេហេរ៉ង់ បានកើនឡើងកាន់តែខ្លាំង ។ ហើយកាលពីឆ្នាំ២០១៨ លោក ត្រាំ បានដកអាមេរិកដោយឯកតោភាគីចេញកិច្ចព្រមព្រៀងនុយក្លេអ៊ែរអ៊ីរ៉ង់ ព្រមទាំងបានប្រកាសដាក់ទណ្ឌកម្មជាថ្មី។ បច្ចុប្បន្ន នៅចំពោះមុខនយោបាយក្នុងស្រុក លោក ត្រាំ កំពុងប្រឈមមុខនឹងសវនាការដកហូតតំណែង (impeachment) ដែលគ្រោងរៀបចំឡើងក្នុងព្រឹទ្ធសភា នាចុងខែមករានេះ ហើយព្រមជាមួយគ្នានេះ ការបោះឆ្នោតជ្រើសរើសប្រធានាធិបតីអាមេរិក ក៏នឹងរៀបចំឡើងផងដែរ នាខែវិច្ឆិកា ឆ្នាំ២០២០ខាងមុខ៕
Tag:
អ៊ីរ៉ង់
សហរដ្ឋអាមេរិក
ដូណាល់ត្រាំ
អូបាម៉ា
ការបោះឆ្នោត២០២០
© រក្សាសិទ្ធិដោយ thmeythmey.com
