ភ្នំពេញ៖ អាជ្ញាធរកម្ពុជាឃាត់ខ្លួន ជនជាតិកូរ៉េខាងជើងចំនួន១៦នាក់ ដែលលួចធ្វើការងារឱ្យក្រុមហ៊ុនហ្គេមអនឡាញរបស់ចិនមួយកន្លែង នៅក្នុងខេត្តសៀមរាប។ ជនជាតិកូរ៉េខាងជើងទាំងនេះ ត្រូវបានអាជ្ញាធរឃាត់ខ្លួន កាលពីសប្ដាហ៍មុន ក្រោមហេតុផលថា ពួកគេបានលួចធ្វើការងារដោយខុសច្បាប់។
អគ្គនាយកដ្ឋានអន្តោប្រវេសន៍ លោក ជា គឹមសាន បាននិយាយថា
ជនសង្ស័យទាំងនេះ ធ្វើការផ្នែកមេកានិកសម្រាប់ដំឡើងកម្មវិធី(Software) អនឡាញឱ្យក្រុមហ៊ុនចិនមួយ នៅក្នុងភូមិគ្រួស សង្កាត់ស្វាយដង្គុំ ខេត្តសៀមរាប។ លោក គឹមសាន បានបន្ថែមថា ពួកគេបានចូលមករស់នៅកម្ពុជា កាលពីអំឡុងខែកញ្ញា ឆ្នាំ២០១៩ ដោយប្រើទិដ្ឋាការទេសចរណ៍ ប៉ុន្តែបែជាពួកគេលួចធ្វើការងារដោយខុសច្បាប់ទៅវិញ។ បើតាមលោក គឹមសាន ជនជាតិកូរ៉េខាងជើងទាំងនេះ ត្រូវបានឃាត់ខ្លួនកាលពីថ្ងៃសុក្រ ទី៣ មករា ឆ្នាំ២០២០ ហើយត្រូវបានសមត្ថកិច្ចផាកពិន័យ ទៅលើការប្រើប្រាស់ទិដ្ឋាការមិនចំគោលដៅ និងគ្មានប័ណ្ណការងារ ហើយបញ្ជូនចេញពីកម្ពុជាទៀតផង។
តាមរយៈការចុះផ្សាយរបស់សារព័ត៌មាន NK News ដែលមានការិយាល័យកណ្ដាលនៅទីក្រុងសេអ៊ូល ប្រទេសកូរ៉េខាងត្បូងនេះ បានស្រង់សម្តីអគ្គនាយកដ្ឋានអន្តោប្រវេសន៍រូបនេះ យ៉ាងដូច្នេះថា៖«យើងបានបញ្ជាឱ្យពួកគេ(ជនជាតិកូរ៉េខាងជើង)ចាកចេញពីកម្ពុជា នៅត្រឹមថ្ងៃអង្គារ ទី៧ មករានេះ»។
បើតាមលោក ជា គឹមសាន ការអនុវតវិធានការលើជនជាតិកូរ៉េខាងជើងទាំងនេះ ធ្វើឡើងតែ២ទៅ៣សប្ដាហ៍ប៉ុណ្ណោះ ក្រោយពីអង្គការសហប្រជាជាតិ តម្រូវឱ្យរដ្ឋជាសមាជិកអង្គការទាំងអស់ ចាប់បញ្ជូនជនជាតិកូរ៉េខាងជើង ដែលកំពុងធ្វើការនៅក្នុងរដ្ឋនីមួយៗទៅស្រុកកំណើតវិញ។ «កូរ៉េខាងជើងបានរងទណ្ឌកម្មសេដ្ឋកិច្ចពីអង្គការសហប្រជាជាតិ ដែលបានហាមកូរ៉េខាងជើងដំណើរការជំនួញ ឬធ្វើការនៅក្នុងប្រទេសជាសមាជិកអង្គការសហប្រជាជាតិ។ ដូច្នេះក្នុងនាមជាសមាជិកអង្គការសហប្រជាជាតិ យើងត្រូវតែគោរពតាមការសម្រេចចិត្តរបស់អង្គការពិភពលោកមួយនេះ»។ នេះជាការបញ្ជាក់របស់អគ្គនាយកដ្ឋានអន្តោប្រវេសន៍កម្ពុជា ដែលត្រូវបានស្រង់សម្ដីដោយសារព័ត៌មាន NK News។
ជាមួយគ្នានេះលោក ជា គឹមសាន បានសង្កត់ធ្ងន់ថា ដ្បិតពួកគេទាំងនេះ ត្រូវបានឃាត់ខ្លួនពិតមែន ប៉ុន្តែពួកគេមិនបានប្រព្រឹត្តបទឧក្រិដ្ឋខុសច្បាប់ផ្សេងទៀតនោះទេ ពោលគឺពួកគេគ្រាន់តែមករស់នៅ និងធ្វើការខុសច្បាប់ នៅក្នុងក្រុមហ៊ុនល្បែងអនឡាញប៉ុណ្ណោះ។ ដូច្នេះទើបសមត្ថកិច្ចត្រូវចាប់ឃាត់ខ្លួន និងបញ្ជូនចេញ។
សារព័ត៌មានថ្មីៗ មិនអាចទាក់ទងមន្ត្រីអគ្គនាយកដ្ឋានអន្តោប្រវេសន៍ ដើម្បីសុំព័ត៌មានលម្អិតបន្ថែម ជុំវិញករណីឃាត់ខ្លួនជនជាតិកូរ៉េខាងជើងទាំង១៦នាក់នេះ បាននៅឡើយទេ នៅថ្ងៃទី៧ មករា។
កាលពីថ្ងៃទី២៥ វិច្ឆិកា សារមន្ទីរ 3D ឬ សារមន្ទីរសព្វទស្សន៍អង្គរ «Angkor Grand Panorama» ដំបូងបង្អស់នៅកម្ពុជា ដែលវិនិយោគដោយក្រុមហ៊ុនមកពីប្រទេសកូរ៉េខាងជើង នៅក្នុងខេត្តសៀមរាប ត្រូវបានប្រកាសបិទទ្វារ។ Grand Panorama ដែលមានទីតាំងស្ថិតនៅលើដីទំហំបួនហិកតា និងមានចម្ងាយប្រមាណជាបីគីឡូម៉ែត្រពីប្រាសាទអង្គរវត្ត បានសម្ពោធជាផ្លូវការកាលពីឆ្នាំ ២០១៥ ក្រោមការសាងសង់របស់ក្រុមហ៊ុនកូរ៉េខាងជើង និងមានការចូលរួមពីអាជ្ញាធរអប្សរាក្រោមទុនវិនិយោគ ២៤លានដុល្លារអាមេរិក។ កន្លងមកសារមន្ទីរ 3D ដំបូងបង្អស់នៅប្រទេសកម្ពុជានេះ បានចូលរួមចំណែកទាក់ទាញភ្ញៀវទេសចរទាំងជាតិ និងអន្តរជាតិ ដែលចង់ស្វែងយល់ពីវប្បធម៌ និងអច្ឆរិយរបស់ខ្មែរ ជាមួយការគ្រឿងបរិក្ខាទំនើបៗដែលអាចបង្ហាញអំពីប្រវត្តិនៃប្រាសាទបុរាណ និងប្រវត្តិនៃព្រះមហាក្សត្រខ្មែរតាមជំនាន់នីមួយៗតាមរយៈរូបភាព និងវីដេអូជាប្រភេទ 3D ។
ក្រោយមកភោជនីយដ្ឋានកូរ៉េខាងជើង ចំនួន៦ទៀត ដែលមានទីតាំងនៅនៅរាជធានីភ្នំពេញ៤កន្លែង និងសៀមរាប២កន្លែងទៀត ក៏បានបិទទ្វារ កាលពីថ្ងៃទី ២២ខែធ្នូ ឆ្នាំ២០១៩ ដែរ។ មន្ត្រីជាន់ខ្ពស់ក្រសួងទេសចរណ៍លោក តុប សុភ័ក្រ ធ្លាប់បានបញ្ជាក់ថា ការប្រកាសបិទទ្វារនេះ គឺស្របតាមសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលតម្រូវឱ្យរដ្ឋជាសមាជិកបញ្ឈប់ប្រតិបត្តិការរកលុយរបស់ជនជាតិកូរ៉េខាងជើងនៅក្រៅប្រទេស៕