ជាតិ
រថយន្ត
ក្រសួងមិនចេញឲ្យឡើយនូវលេខពិសេសរថយន្តដែលប្រើពាក្យ អសុរោះ អសីលធម៌
× លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអះអាងថា ក្រសួងនឹងមិនចេញឲ្យឡើយចំពោះផ្លាកចុះបញ្ជីពិសេសផ្ទាល់ខ្លួនសម្រាប់រថយន្ត ដែលប្រើពាក្យអាក្រក់ អសីលធម៌ អសុរោះ។ លោកបានបញ្ជាក់បែបនេះ នាកិច្ចប្រជុំបូកសរុបរបាយការណ៍ឆ្នាំ២០១៩ និងទិសដៅការងារឆ្នាំ២០២០ ដែលរៀបចំនៅទីស្តីការក្រសួងនាព្រឹកថ្ងៃពុធ ទី៨ ខែមករា។
កាលពីថ្ងៃទី៧ ខែមករា ក្រសួងសារធារណការ និងដឹកជញ្ជូន បានដាក់ដំណើរការ ការធ្វើផ្លាកលេខពិសេសផ្ទាល់ខ្លួនសម្រាប់រថយន្ត នៅផ្សារទំនើប អ៊ីអន ២ សែនសុខ។ សម្រាប់លេខចុះបញ្ជីពិសេសផ្ទាល់ខ្លួននេះ គេអាចដាក់ជាឈ្មោះជាឡាតាំង ឬជាលេខ ដោយមិនលើសពី៨ខ្ទង់ ហើយផ្នែកខាងលើមានពាក្យកម្ពុជា និងផ្នែកខាងក្រោមមានពាក្យ Cambodia ។
ក្រសួងក៏បានដាក់តំណរភ្ជាប់នៅក្នុងគេហទំព័រផ្លូវការរបស់ខ្លួន ដើម្បីឲ្យអ្នកប្រើប្រាស់រថយន្ត អាចសាកល្បង រុករកឈ្មោះដែលខ្លួនពេញចិត្ត រួមជាមួយនឹងតម្លៃផងដែរ។ ប៉ុន្តែជាមួយគ្នានេះ មនុស្សមួយចំនួនបានប្រើប្រាស់ពាក្យពេចន៍អសុរោះ អសីលធម៌ ជាឡាតាំង ក្នុងលេខដែលចុះបញ្ជីនោះ ហើយបង្ហោះក្នុងបណ្តាញសង្គមហ្វេសប៊ុក។
លោក ស៊ុន ចាន់ថុល បានបញ្ជាក់ថា ក្រសួងបានបិទជាស្វ័យប្រវត្តិនូវពាក្យពេចន៍មិនគប្បីមួយចំនួន ដូចជា SEX, F…ck និងពាក្យជាច្រើនទៀត លើកលែងតែពាក្យមួយចំនួនដែលមិនទាន់គ្រប់គ្រងបាន។ ក្នុងករណី ក្រសួងដឹងថាខ្លួនភ្លាត់ចេញលេខដែលមិនគប្បីទៅឲ្យអ្នកប្រើប្រាស់ ក្រសួងនឹងហៅពួកគេទៅដូរវិញភ្លាមៗ៕
© រក្សាសិទ្ធិដោយ thmeythmey.com