អន្តរជាតិ
អ៊ីរ៉ង់ បាញ់មីស៊ីលបាលីស្ទិកប្រមាណ១០គ្រាប់ដាក់បន្ទាយទ័ពអាមេរិកនៅអ៊ីរ៉ាក់ កងទ័ពអ៊ីរ៉ាក់ក្នុងបន្ទាយ Ain Al-Asad (រូបភាព AFP)
× នៅថ្ងៃទី៨ ខែមករានេះ យោធាអ៊ីរ៉ង់ បានផ្លោងមីស៊ីលជាបន្តបន្ទាប់ដាក់បន្ទាយទ័ពអ៊ីរ៉ាក់ដែលទ័ពអាមេរិកឈរជើង ដើម្បីសងសឹកការស្លាប់ឧត្តមសេនីយ៍ Qassem Soleimani ក្រោមសា្នដៃអាមេរិក។ កងឆ្មាំបដិវត្តន៍អ៊ីរ៉ង់ ក៏បានចេញមុខព្រមានអាមេរិកថែមទៀត បើវ៉ាស៊ីនតោនហ៊ានវាយបកនឹងការវាយប្រហារនេះ។ មន្ត្រីយោធាអាមេរិក អះអាងថា ខ្លួនបានរំពឹងពីការវាយប្រហារនេះរាប់ថ្ងៃមកហើយ។ បើតាមសេតវិមាន ប្រធានាធិបតី ដូណាល់ ត្រាំ កំពុងតាមដានព្រឹត្តការណ៍នេះយ៉ាងជាប់។
ផ្សែងខ្មួលខ្មាញ់ បានផុសចេញពីបន្ទាយទ័ពអ៊ីរ៉ាក់ Ain al-Asad ជាទីដែលទ័ពអាមេរិកឈរជើង បន្ទាប់ពីរងការវាយប្រហារដោយមីស៊ីលរបស់អ៊ីរ៉ង់នៅថ្ងៃទី៨ ខែមករា។ អ៊ីរ៉ង់ បានចេញមុខទទួលស្គាល់ពីប្រតិបត្តិការផ្លូវការអាកាសរបស់ខ្លួនភ្លាមៗផងដែរ ដោយប្រកាសថា នេះជាការសងសឹកនឹងការធ្វើឃាតឧត្តមសេនីយ៍ Qassem Soleimani ក្នុងការវាយប្រហារដែនអាកាសក្នុងទឹកដីអ៊ីរ៉ាក់កាលពីថ្ងៃទី៣ ខែមករាកន្លងទៅ។
ប្រភពសន្តិសុខប្រាប់ទីភ្នាក់ងារព័ត៌មាន AFP ថា រ៉ុក្កែត៩គ្រាប់ បានធ្លាក់ចូលបន្ទាយ Ain al-Asad ដែលជាបន្ទាយទ័ពធំជាងគេរបស់អ៊ីរ៉ាក់។ ប្រភពដដែលបន្តថា ការវាយប្រហារនេះ ធ្វើឡើងចំនួនបីជុំឯណោះ។ ប៉ុន្តែទូរទស្សន៍រដ្ឋអ៊ីរ៉ង់ អះអាងថា អ៊ីរ៉ង់បានបាញ់មីស៊ីលដល់ទៅ១០គ្រាប់ឯណោះដាក់បន្ទាយនេះ ហើយក៏គំរាមបាញ់បន្ថែមទៀត ប្រសិនអាមេរិកបើកប្រតិបត្តិការវាយបកវិញនោះ។
យ៉ាងណាមិញ ចំនួនមីស៊ីលដែលបាញ់នេះ អាចមានច្រើនជាងនេះ។ មន្ទីរបញ្ចកោណអះអាងថា អ៊ីរ៉ង់បានបាញ់មីស៊ីលបាលីស្ទិកច្រើនជាង១០គ្រាប់ចេញពីទឹកដីរបស់ខ្លួន សំដៅបន្ទាយ Ain al-Asad និងទីតាំងឈរជើងមួយទៀតរបស់សម្ព័ន្ធមិត្តចម្រុះប្រឆាំងក្រុមរដ្ឋឥស្លាម។ ឧបការីរដ្ឋមន្ត្រីការពារជាតិទទួលបន្ទុកកិច្ចការសាធារណៈ Jonathan Hoffman និយាយថា ក្រៅពីមូលដ្ឋាន al-Asad បន្ទាយមួយទៀតនៅ Irbil ក៏ត្រូវមីស៊ីលរបស់អ៊ីរ៉ង់ដែរ។
ក្រោយការវាយប្រហាររបស់អ៊ីរ៉ង់ សេតវិមានក៏ចេញសេចក្ដីថ្លែងការណ៍មួយដែលបញ្ជាក់ថា ប្រធានាធិបតី ដូណាល់ ត្រាំ កំពុងតាមដានសភាពការណ៍ និងពិភាក្សាជាមួយមន្ត្រីសន្តិសុខជាតិរបស់លោក។ បន្ទាយ al-Asad ជាទីដែលលោក ត្រាំ ចុះសួរសុខទុក្ខកងទ័ពអាមេរិកពេលលោកធ្វើទស្សនកិច្ចនៅអ៊ីរ៉ាក់កាលពីឆ្នាំ២០១៨ ។
ការវាយប្រហារនេះ ជារឿងដែលអាមេរិកគិតទុកមុនទៅហើយក្រោយការស្លាប់របស់មេបញ្ជាការកម្លាំង Qud ដ៏មានអំណាចនោះ។ នៅថ្ងៃទី៧ ខែមករា រដ្ឋមន្ត្រីការពារជាតិអាមរិក ម៉ាក អេស្ពើ និយាយថា អាមេរិក បានត្រៀមផែនការទុកជាស្រេចទៅនឹងការសងសឹកណាមួយរបស់អ៊ីរ៉ង់ ហើយក៏ត្រៀមឆ្លើយតបឲ្យបានសមស្របនឹងសកម្មភាពទាំងឡាយរបស់ទីក្រុងតេហេរ៉ង់ផងដែរ៕
Tag:
អ៊ីរ៉ង់
អ៊ីរ៉ាក់
អាមេរិក
© រក្សាសិទ្ធិដោយ thmeythmey.com