កីឡាអន្តរជាតិ
អន្តរជាតិ
EFL៖ Man City ឈ្នះ Man Utd ៣-១ នៅជើងទី១ សង្ឃឹមខ្ពស់ឡើងទៅវគ្គផ្តាច់ព្រ័ត្រ
× ម្ចាស់ការពារជើងឯក Manchester City បានយកឈ្នះ Manchester United ក្នុងលទ្ធផល ៣-១ ក្នុងជំនួបជើងទី១ វគ្គពាក់កណ្តាលផ្តាច់ព្រ័ត្រ នៃពានរង្វាន់លំដាប់ទី៣អង់គ្លេស EFL Cup រដូវកាល ២០១៩-២០។
នាជំនួបវគ្គពាក់កណ្តាលផ្តាច់ព្រ័ត្រ ជើងទី១ នៅ Old Trafford នាយប់ថ្ងៃទី៧ ខែមករា ក្រុមភ្ញៀវ Man City បានបើកការវាយសម្រុកលើក្រុមម្ចាស់ផ្ទះ ដោយរកបាន៣គ្រាប់មុន នៅវគ្គទី១តែម្តង។ ខ្សែបម្រើ Bernardo Silva ជាអ្នកសម្រេចគ្រាប់ដំបូងនៅនាទី១៧ មុនពេល Riyad Mahrez ស៊ុតគ្រាប់ទី២នៅនាទី៣៣។ គ្រាប់ទី៣ ដែល Andreas Pereira កីឡាករ Man Utd ធ្វើឲ្យចូលទីខ្លួនឯងកើតឡើងនៅនាទី៣៩។
យ៉ាងណាក៏ដោយ ចូលដល់វគ្គទី២ ខណៈការប្រកួតដំណើរការបាន២៥នាទី ខ្សែប្រយុទ្ធឆ្នើម Marcus Rashford រកបានមួយគ្រាប់វិញ។ ចប់ការប្រកួត Man City ឈ្នះ Man Utd ក្នុងលទ្ធផល ៣-១។
ជ័យជម្នះនេះ បានធ្វើឲ្យក្រុមមេឃខៀវដែលជាម្ចាស់ជើងឯកឆ្នាំចាស់ មានឱកាសច្រើនដើម្បីឈានទៅវគ្គផ្តាច់ព្រ័ត្រ និងដើម្បីការពារតំណែងជើងឯងរបស់ខ្លួននៅរដូវកាលនេះផង ដ្បិតជើងទី២ ត្រូវធ្វើនៅទឹកដីខ្លួន។
ដោយឡែកមួយគូទៀត ជាការជួបគ្នារវាង Leicester City ទល់ Aston Villa នៅយប់ថ្ងៃទី៨ ខែមករានេះ សម្រាប់ជំនួបជើងទី១ វគ្គពាក់កណ្តាល់ផ្តាច់ព្រ័ត្រ EFL Cup៕
Tag:
EFL Cup
Manchester City
© រក្សាសិទ្ធិដោយ thmeythmey.com