ឥណ្ឌូណេស៊ី គ្រោង​ជម្លៀស​ប្រជាជន​ចេញពី​អ៊ីរ៉ាក់​-​អ៊ីរ៉ង់ ប្រសិនបើ​ស្ថានការណ៍​កាន់តែ​តានតឹង​
អន្តរជាតិ
ឥណ្ឌូណេស៊ី គ្រោង​ជម្លៀស​ប្រជាជន​ចេញពី​អ៊ីរ៉ាក់​-​អ៊ីរ៉ង់ ប្រសិនបើ​ស្ថានការណ៍​កាន់តែ​តានតឹង​
09, Jan 2020 , 4:34 pm        
រូបភាព
លោកស្រីរដ្ឋមន្រ្តីការបរទេសឥណ្ឌូណេស៊ី Retno LP Marsudi។ រូបភាព៖ Jakarta Post
លោកស្រីរដ្ឋមន្រ្តីការបរទេសឥណ្ឌូណេស៊ី Retno LP Marsudi។ រូបភាព៖ Jakarta Post
​បន្ទាប់ពី​ស្ថានការណ៍​នៅក្នុង​តំបន់​មជ្ឈិមបូព៌ា​កាន់តែ​ក្តៅគគុក រដ្ឋមន្ត្រីការបរទេស​ឥណ្ឌូណេស៊ី​នៅ​ថ្ងៃទី​៨ ខែមករា បាន​បើក​កិច្ចប្រជុំ​សម្របសម្រួល ជាមួយ​ប្រតិភូ​ជាន់ខ្ពស់​របស់​ឥណ្ឌូណេស៊ី​ប្រចាំ​នៅ​អ៊ីរ៉ង់ អ៊ីរ៉ាក់ និង​ក្រុមប្រឹក្សាសន្តិសុខ​នៃ​អង្គការសហប្រជាជាតិ ដើម្បី​ជជែក​ពី​ព្រឹត្តិការណ៍​នៅក្នុង​អ៊ីរ៉ាក់ អ៊ីរ៉ង់ និង​ផែនការ​ជម្លៀស​ប្រជាជន​ចេញពី​ប្រទេស​ទាំងពីរ​នេះ​។

  
 
​ទំនាក់ទំនង​រវាង​អាមេរិក និង​អ៊ីរ៉ង់​កាន់តែ​តឹ​ន​តឹង​ឡើង ក្រោយពេល​អ៊ីរ៉ង់​បាន​វាយប្រហារ​មី​ស៊ី​ល​បា​លិ​ស្ទិ​កជាង ១០​គ្រាប់​ដាក់​បន្ទាប់​ឈរជើង​អាមេរិក​នៅ​អ៊ីរ៉ាក់​។ ហេតុការណ៍​នេះ ត្រូវបាន​ឥណ្ឌូណេស៊ី ទទូច​ឲ្យ​ភាគី​ទាំងសងខាង​អត់ធ្មត់ និង​ចូល​តុ​ចរចា​ជាមួយគ្នា​ជាជាង​ការប្រើប្រាស់​អាវុធ ដើម្បី​ទប់ស្កាត់​ស្ថានការណ៍​នៅក្នុង​តំបន់ កុំ​ឲ្យ​ក្តៅ​ជាង​នេះ​។ 
 
​បើទោះបីជា​អំពាវនាវ​ឲ្យ​ភាគី​អាមេរិក និង​អ៊ីរ៉ង់​ទប់​កំហឹង​ក្តី រដ្ឋមន្ត្រីការបរទេស​ឥណ្ឌូណេស៊ី លោកស្រី Retno LP Marsudi នៅ​ថ្ងៃទី​៨ ខែមករា បានរៀបចំ​កិច្ចប្រជុំ​មួយ​ជាមួយ​អ្នកតំណាង​របស់ខ្លួន​ប្រចាំ​នៅ​អ៊ីរ៉ង់ អ៊ីរ៉ាក់ និង​ក្រុមប្រឹក្សាសន្តិសុខ ដើម្បី​ជជែក​ពី​បញ្ហា​អ៊ីរ៉ង់ និង​ការរៀបចំ​ផែនការ​ជម្លៀស​ប្រជាជន​របស់ខ្លួន​។ 
 
​បើតាម​អ្វីដែល​លោកស្រី Retno ប្រាប់​អ្នកកាសែត គម្រោង​ជម្លៀស​ប្រជាជន​ឥណ្ឌូណេស៊ី គឺ​ធ្វើ​រួចរាល់​តាំងពី​សប្តាហ៍​មុន​មក​ម្លេះ ហើយ​កិច្ចប្រជុំ​សម្របសម្រួល​ជាមួយ​អ្នកតំណាង​របស់ខ្លួន​មកពី​ប្រទេស​អ៊ីរ៉ាក់ អ៊ីរ៉ង់ និង​ក្រុមប្រឹក្សាសន្តិសុខ គឺជា​កិច្ចប្រជុំ​បង្កើត​គម្រោង​មួយ ដើម្បី​ដោះស្រាយ​ពេល​សង្គ្រាម​នៅក្នុង​តំបន់​មជ្ឈិមបូព៌ា​កើតឡើង​។ នេះ​បើតាម​ការចុះផ្សាយ​របស់​សារព័ត៌មាន Jakarta Post ។​
 
​គម្រោង​មួយ​នេះ គឺ​និយាយ​ពី​ការ​ទំនុកបម្រុង​ប្រជាជន ដែល​អាច​រង​ផលប៉ះពាល់​ខ្លាំង តម្រូវការ​ចាំបាច់ និង​ច្រក​សម្រាប់​ជម្លៀស​ប្រជាជន​ផងដែរ​។ 
 
​ប៉ុន្តែ​យ៉ាងណា ប្រសិនបើ​សង្គ្រាម​នៅ​អ៊ីរ៉ង់ ផ្ទុះឡើង​មែន វា​នឹង​ពិបាក​សម្រាប់​ឥណ្ឌូណេស៊ី ក្នុងការ​ជម្លៀស​ប្រជាជន ព្រោះ​ប្រជាជន​ឥណ្ឌូណេស៊ី​ភាគច្រើន​ជា​និស្សិត រស់នៅក្នុង​ទីក្រុង​តេ​ហេ​រ៉ង់ និង​ទីក្រុង Qom ហើយ​មានតែ​មនុស្ស​តែ​បីនាក់​ប៉ុណ្ណោះ​រស់នៅ​តាម​ព្រំដែន​។ នេះ​បើតាម​ការអះអាង​អគ្គរដ្ឋទូត​ឥណ្ឌូណេស៊ី​ប្រចាំ​នៅ​អ៊ីរ៉ង់​។​
 
​សូមបញ្ជាក់ថា ប្រជាជន​ឥណ្ឌូណេស៊ី ប្រមាណ​ជាជាង ៧០​ម៉ឺន​នាក់ កំពុង​រស់នៅ និង​ធ្វើការ​នៅក្នុង​តំបន់​មជ្ឈិមបូព៌ា​។ ប្រជាជន​ឥណ្ឌូណេស៊ី​នៅក្នុង​អ៊ីរ៉ង់​មាន​ត្រឹមតែ ៤០៦​នាក់ និង​អ៊ីរ៉ាក់​មាន​ចំនួន ៨៥០​នាក់ តែប៉ុណ្ណោះ​។ មកទល់ពេលនេះ មាន​ប្រទេស​នៅក្នុង​តំបន់​អាស៊ីអាគ្នេយ៍​ចំនួន​៣ មាន​ផែនការ​ជម្លៀស​ប្រជាជន​ចេញពី​តំបន់​មជ្ឈិមបូព៌ា ក្នុងនោះ​រួមមាន ឥណ្ឌូណេស៊ី ថៃ និង​ហ្វីលីពីន ៕

Tag:
 ​ឥណ្ឌូណេស៊ី​
  អ៊ីរ៉ាក់​
  អ៊ីរ៉ង់
© រក្សាសិទ្ធិដោយ thmeythmey.com