អន្តរជាតិ
WHO៖ ជំងឺរលាកសួតនៅចិន អាចពាក់ព័ន្ធទៅនឹងវីរុសថ្មី ដែលអាចឲ្យកើតជំងឺSARS ប្រជាជនចិនពាក់ម៉ាស់ ដើម្បីបង្ការជំងឺរលាកសួត។ រូបភាព៖ South China Morning Post
× អង្គការសុខភាពពិភពលោក នៅថ្ងៃទី៨ ខែមករា អះអាងថា ករណីជំងឺរលាកសួតនៅក្នុងប្រទេសចិនជាង ៥០ករណី នាទីក្រុង Wuhan អាចមានផ្ទុកវីរុសប្រភេទថ្មី ដែលអាចបង្កឲ្យកើតជំងឺរលាកសួតកម្រិតធ្ងន់ SARS និង MERS បាន។ ប៉ុន្តែនេះគ្រាន់តែជាសង្ស័យរបស់អង្គការសុខភាពពិភពលោកប៉ុណ្ណោះ ព្រោះអ្នកជំនាញ ត្រូវការព័ត៌មានជាច្រើនទៀត។
ជំងឺរលាកផ្លូវដង្ហើមមួយប្រភេទ បានផ្ទុះឡើងនាទីក្រុង Wuhan ចិន តាំងពីខែធ្នូ ឆ្នាំ២០១៩ មកម្លេះ។ រហូតមកដល់ថ្ងៃទី៥ មករា អាជ្ញាធរចិន បានរកឃើញថា ជំងឺប្រភេទនេះ មានចំនួន ៥៩ករណី ប៉ុន្តែវាមិនមានជាជំងឺរលាកសួតកម្រិតធ្ងន់ SARS ឬជំងឺឆ្លងផ្សេងទៀតនោះទេ។
យ៉ាងណាក៏ដោយ តាមរបាយការណ៍ថ្មីរបស់អង្គការសុខភាពពិភពលោក ជំងឺរលាកផ្លូវដង្ហើមនៅចិនបច្ចុប្បន្ន អាចមានផ្ទុកវីរុសប្រភេទថ្មី ដែលអាចបង្កឲ្យកើតជំងឺ SARS និង MERS និងជំងឺឆ្លង។ ប៉ុន្តែយ៉ាងណាដ៏ដោយ អ្នកជំនាញត្រូវការព័ត៌មានជាច្រើនទៀតទាក់ទងទៅនឹងវីរុសប្រភេទថ្មីនេះ ដើម្បីសន្និដ្ឋាន ថាតើវីរុសនេះ ដែលអាចបង្កឲ្យបាត់បង់ជីវិតិឬក៏អត់។
វីរុស Coronaviruses គឺជាប្រភេទវីរុសមេ ដែលអាចបង្កឲ្យមានជំងឺផ្តាសាយធម្មតា ទៅជាជំងឺរលាកសួតកម្រិតធ្ងន់ SASR និង MERS។ ប៉ុន្តែប្រភេទខ្លះនៃវីរុសនេះ គឺមិនបង្កគ្រោះថ្នាក់ធ្ងន់ធ្ងរទេ ហើយប្រភេទខ្លះទៀត គឺបង្កគ្រោះថ្នាក់ខ្លាំង ដែលអាចបណ្តាលឲ្យមនុស្សស្លាប់បាន។ បើតាមសេចក្តីថ្លែងការណ៍របស់អង្គការសុខភាពពិភពលោក ព័ត៌មានដំបូងជុំវិញជំងឺរលាកសួតនៅចិន បានចង្អុលបង្ហាញថា វីរុសCoronaviruses អាចមានវីរុសថ្មីមួយទៀត ដែលអាចបង្កឲ្យកើតជំងឺ SARS និង MERS បាន។
ជាការពិតជំងឺ SARS គឺជាជំងឺរលាកសួតកម្រិតធ្ងន់មួយ ដែលកើតចេញពីភាគខាងត្បូងប្រទេសចិន នាខេត្តGuangdong ក្នុងឆ្នាំ២០០៣។ ជំងឺនេះ គឺឆ្លងពីមនុស្សម្នាក់ទៅមនុស្សម្នាក់ តាមរយៈក្អក ឬកណ្តាស់។ ចំណែក MERS វិញ ក៏មានស្ថានភាពជំងឺដូច SARSដែរ ប៉ុន្តែជំងឺMERS គឺផ្ទុះឡើងនៅក្នុងតំបន់មជ្ឈិមបូព៌ា នាប្រទេសអារ៉ាប៊ីសាអូឌីតនាឆ្នាំ២០១២។
នៅក្នុងសេចក្តីថ្លែងការណ៍ដដែលនេះ ក៏បានបញ្ជាក់ថាអាជ្ញាធរចិន បានដឹកនាំពិសោធន៍ និងរកវិធីលុបបំបាត់ចោលវីរុស Coronaviruses និងជំងឺផ្សេងទៀតដែរ។ បានន័យថា ចិនមិនបានទាត់ចោលឡើយថា ជំងឺរលាកសួតនៅទីក្រុង Wuhan អាចមានផ្ទុកវីរុសថ្មីនេះ។
សូមបញ្ជាក់ថា ជំងឺរលាកសួត SARS បានផ្ទុះឡើងម្តងហើយនាប្រទេសចិន ក្នុងឆ្នាំ ២០០៣ ។ ពេលនោះជំងឺ SARS បានរីកសាយភាយយ៉ាងលឿងនៅក្នុងទីក្រុងមួយចំនួនរបស់ចិន ដែលបង្កឲ្យមនុស្សចំនួន ៨០០០នាក់ឆ្លង់ជំងឺមួយនេះ ហើយមនុស្សចំនួន ៧៧៥ បានបាត់បង់ជីវិត ៕
© រក្សាសិទ្ធិដោយ thmeythmey.com