អន្តរជាតិ
លោក Ghosn ចោទថាក្រុមហ៊ុន Nissan រួមគំនិតនឹងរដ្ឋអាជ្ញាជប៉ុនដើម្បីចាប់លោក តែជប៉ុនបដិសេធ
លោកអតីតនាយកប្រតិបត្តិក្រុមហ៊ុនរថយន្ត Nissan Carlos Ghosn ថ្លែងសន្និសីទព័ត៌មានក្នុងរដ្ឋធានី នៃប្រទេសលីបង់ ថ្ងៃ ០៨ មករា ២០២០ (Reuters).jpg
×![]()
អតីតនាយកប្រតិបត្តិ (CEO) របស់ក្រុមហ៊ុនរថយន្ត Nissan លោក Carlos Ghosn បញ្ជាក់ថា លោក ត្រូវបានធ្វើទុក្ខបុកម្នេញយ៉ាងព្រៃផ្សៃដោយរដ្ឋអាជ្ញាជប៉ុន ។ ពីរដ្ឋធានីបេរូត នៃប្រទេស លីបង់ លោក ចោទរដ្ឋអាជ្ញាជប៉ុនទាំងនោះថា គប់គិតជាមួយក្រុមហ៊ុន Nissan រៀបចំផែនការបណ្ដេញលោកចេញពីតំណែងកំពូលនេះ។ 
ថ្លែងនៅមុខអ្នកសារព័ត៌មានជាលើកដំបូង ចាប់តាំងពីលោកបានរត់គេចពីប្រទេសជប៉ុនទៅលីបង់កាលពីចុងខែធ្នូមក លោកអតីត CEO ក្រុមហ៊ុន Nissan បានចោទថាមានការរួមគំនិតគ្នារវាងក្រុមហ៊ុន Nissan និងរដ្ឋអាជ្ញាជប៉ុនជុំវិញការចាប់ខ្លួនលោក ដែលលោកចាត់ទុកជា «ការរៀបចំឆាកល្ខោនឡើង»។
តាមការចុះផ្សាយរបស់ទីភ្នាក់ងារព័ត៌មាន AFP លោកអះអាងថា ពួកគេបារម្ភពីកំណើនឥទ្ធិពលរបស់ក្រុមហ៊ុនដៃគូរថយន្តរបស់បារាំង Renault ដ្បិតលោកមានផែនការធ្វើសមាហរណកម្មកាន់តែជិតស្និទ្ធបន្ថែមទៀតជាមួយក្រុមហ៊ុនយក្សនេះ។ មែនទែនទៅ ក្នុងឆ្នាំ១៩៩៩ លោក Ghosn បានជ្រោមជ្រែងបង្កើតកិច្ចព្រមព្រៀងមួយជាមួយក្រុមហ៊ុន Renault ដើម្បីជួយសង្គ្រោះក្រុមហ៊ុន Nissan ពីការប្រកាសក្ស័យធន។ ហើយបច្ចុប្បន្ននេះ ក្រុមហ៊ុនផលិតរថយន្តរបស់បារាំងកាន់ហ៊ុន ៤៣ភាគរយក្នុងក្រុមហ៊ុនដៃគូជប៉ុននេះ ខណៈក្រុមហ៊ុន Nissan មានហ៊ុន ១៥ភាគក្នុងក្រុមហ៊ុន Renault ។
ឆ្លើយនឹងសំណួរអ្នកសារព័ត៌មានពាក់ព័ន្ធនឹងការផ្សំគំនិតលំដាប់ខ្ពស់បែបនេះកើតឡើងដោយរបៀបណា បុរសវ័យ៦៥ឆ្នាំរូបនេះ បញ្ជាក់ថា លោកមិនជឿទេថាលោកនាយករដ្ឋមន្ត្រីជប៉ុន ស៊ិនហ្សូ អាបេ បានជាប់ពាក់ព័ន្ធក្នុងរឿងនេះឡើយ។
ដោយរងចោទប្រកាន់ពាក់ព័ន្ធការប្រព្រឹត្តិខុសផ្នែកហិរញ្ញវត្ថុ លោក Ghosn លើកឡើងថា ការសម្រេចិត្តភៀសខ្លួនចេញពីជប៉ុន គឺជារឿងដ៏ពិបាកបំផុតក្នុងជីវិតលោក។ លោក ចាត់ទុកខ្លួនឯងជា «ចំណាប់ខ្មាំង» ក្នុងប្រទេសជប៉ុន ដោយលោកមានជម្រើស២ ពោលគឺរវាង ចោលឆ្អឹងនៅទីនោះ ឬរត់គេចខ្លួន ។
លោក Ghosn បញ្ជាក់ថា ទង្វើរបស់រដ្ឋអាជ្ញាជប៉ុនមកលើរូបលោក គឺមិនត្រឹមត្រូវតាមបទដ្ឋានយុត្តិធម៌អន្តរជាតិ។ ត្រង់ចំណុចនេះ លោករៀបរាប់ថា ក្នុងពន្ធនាគារ គេឃុំខ្លួនលោកនៅក្នុងបន្ទប់ឃុំឃាំងដែលមានបង្អូចតូចមួយប៉ុណ្ណោះ ហើយគេអនុញ្ញាតឲ្យលោកងូចទឹក២ដកប៉ុណ្ណោះក្នុងមួយសប្តាហ៍។ ទន្ទឹមនេះ លោក អះអាងទៀតថា លោកធ្លាប់ចំណាយពេល១៣០ថ្ងៃក្នុងបន្ទប់ឃុំឃាំងដែលគ្មានបង្អូច ខណៈគេដាក់ក្នុងបន្ទប់ឃុំឃាំងតែម្នាក់ឯង។
អតីតនាយកប្រតិបត្តិក្រុមហ៊ុន Nissan រូបនេះ បន្តទៀតថា ក្នុងមួយថ្ងៃ លោកត្រូវបានគេសួរចម្លើយរហូតដល់ទៅ៨ម៉ោង ដោយគ្មានវត្តមានមេធាវីសូម្បីតែម្នាក់ ហើយលោករៀបរាប់ពីអារម្មណ៍លោកថា អស់សង្ឃឹមជាខ្លាំង។ លោក និយាយទាំងកំហឹងថា លោក ត្រូវបានគេចាប់ពង្រាត់យ៉ាងព្រៃផ្សៃបំផុតពីការងារមុខតំណែងលោក គ្រួសារ និងមិត្តភក្តិ។
ភ្លាមៗក្រោយសន្និសីទព័ត៌មាននេះ រដ្ឋអាជ្ញាជប៉ុន បានចេញសេចក្តីថ្លែងការណ៍មួយដោយរិះគន់ចំពោះការវាយប្រហារតែម្ខាង និងមិនអាចទទួលយកបានពីសំណាក់អតីតនាយកប្រតិបត្តិ Nissan លោក Ghosn ទៅលើប្រព័ន្ធយុត្តិធម៌របស់ជប៉ុន។ បើតាម AFP ការិយាល័យរដ្ឋអាជ្ញាតូក្យូ ក៏ស្រាយបំភ្លឺថា ការចោទប្រកាន់ថា ពួកគេបានគប់គិតជាមួយក្រុមហ៊ុនរថយន្ត Nissan ចាប់ខ្លួននោះ គឺជា រឿងមិនពិត ។
សូមបញ្ជាក់ថា លោក Ghosn គឺជាបុគ្គលដែលមានឥទ្ធិពលបំផុតមួយក្នុងឧស្សាហកម្មរថយន្តសាកល។ យ៉ាងណាមិញ លោកបានបាត់បង់អំណាចនេះ នៅពេលដែលលោកត្រូវបានចាប់ឃាត់ខ្លួន ក្នុងខែវិច្ឆិកា ឆ្នាំ២០១៨ ក្នុងទីក្រុង តូក្យូ ។ លោក Carlos Ghosn ត្រូវបានចោទប្រកាន់ថា លោកបានបរាជ័យក្នុងការផ្តល់របាយការណ៍ត្រឹមត្រូវពាក់ព័ន្ធនឹងប្រាក់បៀរវត្សរបស់លោក ហើយបានបង្វែរប្រាក់ពីក្រុមហ៊ុនផលិតរថយន្តនេះដើម្បីរ៉ាប់រងការខាតបង់ខាងផ្នែកពាណិជ្ជកម្មផ្ទាល់ខ្លួន។ ទន្ទឹមនេះ លោក ក៏ត្រូវបានចោទប្រកាន់ថា បានផ្ទេរប្រាក់របស់ក្រុមហ៊ុន Nissan ទៅឲ្យក្រុមហ៊ុនចែកចាយមួយក្នុងប្រទេស អូម៉ង់ ហើយបានកេងប្រវ័ញ្ចលុយ ៥លានដុល្លារសម្រាប់ប្រើប្រាស់ផ្ទាល់ខ្លួនផងដែរ។ ទោះជាបែបនេះក្តី លោក Ghosn បានបដិសេធការចោទប្រកាន់ទាំងអស់៕
Tag:
Carlos Ghosn
ជប៉ុន
ប្រព័ន្ធយុត្តធម៌
Nissan
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
