សម្ដេច ស ខេង ៖ សង្គមដែលបែកបាក់នៅស្រុកណាក៏ដោយ គឺមកពីភាពអយុត្តិធម៌

ជាតិ

សម្ដេច ស ខេង ៖ សង្គមដែលបែកបាក់នៅស្រុកណាក៏ដោយ គឺមកពីភាពអយុត្តិធម៌

09, Jan 2020 , 9:39 pm

រូបភាព

ដោយ: រំដួល ចិត្រា (Romdoul Chetra)

ភ្នំពេញ៖ ភាពអយុត្តិធម៌ នឹងនាំឱ្យសង្គមជាតិបែកបាក់គ្នា។ សម្ដេច ស ខេង រដ្ឋមន្ត្រីក្រសួងមហាផ្ទៃ ថ្លែងបែបនេះនៅក្នុងពិធីអបអរសាទរខួប៤១ឆ្នាំ (ជ័យជម្នះ ៧ មករា ១៩៧៩ ដល់ ២០២០) នៅខេត្តបាត់ដំបង នាព្រឹកថ្ងៃទី៩ មករា។

ថ្លែងចំពោះមុខមន្ត្រី និងថ្នាក់ដឹកនាំបក្ស រដ្ឋមន្ត្រីក្រសួងមហាផ្ទៃ បានអះអាងថា រដ្ឋាភិបាលកំពុងកំណែទម្រង់លើគ្រប់វិស័យ រាប់ទាំងប្រព័ន្ធយុត្តិធម៌ផងដែរ។ ត្រង់ចំណុចនេះសម្ដេច ស ខេង បានសង្កត់ធ្ងន់ថា ការកំណែងទម្រង់ប្រព័ន្ធយុត្តិធម៌ គឺជារឿងចាំបាច់បំផុត ដើម្បីការពារកុំឱ្យសង្គមជាតិបែកបាក់។

«តាមបទពិសោធន៍ជាប្រវត្តិសាស្ត្រមក សង្គមដែលបែកបាក់នៅក្នុងស្រុកណាក៏ដោយ គឺអយុត្តិធម៌។ អ៊ីចឹងរឿងនេះក៏ជាកម្មវត្ថុមួយយ៉ាងសំខាន់ ដែលយើងត្រូវកំណែទម្រង់ប្រព័ន្ធយុត្តិធម៌នេះ »។ នេះជាការលើកឡើងរបស់រដ្ឋមន្ត្រីក្រសួងមហាផ្ទៃ។

សារព័ត៌មានថ្មីៗ មិនទាន់អាចទាក់ទងអ្នកនាំពាក្យក្រសួងយុត្តិធម៌ ដើម្បីសាកសួរអំពីដំណើរការកំណែទម្រង់ប្រព័ន្ធយុត្តិធម៌នៅឡើយទេ។

លោក សន ជ័យ នាយកអង្គការសម្ព័ន្ធគណនេយ្យភាពសង្គមកម្ពុជា (ANSA) មើលឃើញថា ប្រព័ន្ធយុត្តិធម៌នៅកម្ពុជា នៅមានភាពខ្វះចន្លោះ និងបង្កឱ្យមាននិទណ្ឌភាពក្នុងសង្គម តួយ៉ាងដូចជាករណីបញ្ហាដីធ្លីជាដើម។ ដោយមិននិយាយពីបញ្ហាផ្សេងទៀត លោក សន ជ័យ លើកយកករណីដីធ្លី មកពន្យល់ថា នៅពេលដែលពលរដ្ឋក្រីក្រ មានជម្លោះដីធ្លីជាមួយអ្នកមានទ្រព្យ និងអំណាចនោះ ពលរដ្ឋក្រីក្រ ទន់ខ្សោយទាំងនេះ មិនដែលឈ្នះក្តីក្ដាំឡើយ។

ងាកមកបញ្ហាកំណែទម្រង់ប្រព័ន្ធយុត្តិធម៌វិញ លោក សន ជ័យ មើលឃើញថា ការកំណែទម្រង់ហាក់មិនទាន់មានប្រសិទ្ធភាពអ្វីទេ ខណៈការរំលោភបំពានសិទ្ធនៅតែកើតមាន។ លោកស្នើឱ្យមានការកំណែទម្រង់ដោយប្រយ័ត្នប្រយែង និងកំណត់ពេលវេលាច្បាស់លាស់។

ថ្លែងប្រាប់សារព័ត៌មានថ្មីៗ នាយកអង្គការសម្ព័ន្ធគណនេយ្យភាពសង្គមកម្ពុជារូបនេះ បានបញ្ជាក់ដូច្នេះថា៖«អ្វីដែលសង្គមមនុស្សចង់ឃើញ គឺការរៀបចំផែនការកំណែទម្រង់នេះ ឱ្យកាន់តែឆាប់កាន់តែល្អ ហើយវាគួរតែធ្វើនៅក្នុងពេលវេលាជាក់លាក់មួយ។ ហើយមិនអាចធ្វើ(កំណែទម្រង់)ជាលក្ខណៈមួយ ដើម្បីកេងចំណេញប្រជាប្រិយភាព ឬក៏ធ្វើដើម្បីឱ្យតែល្អមើល …»។

បើតាមលោក សន ជ័យ ប្រព័ន្ធយុត្តិធម៌ ត្រូវតែជាកញ្ចក់មួយ ដើម្បីជួយដល់សន្តិភាពផ្លូវចិត្តរបស់ពលរដ្ឋក្នុងសង្គម៕