អន្តរជាតិ
លោក ត្រាំ ថាកិច្ចព្រមព្រៀងជាមួយចិនដំណាក់កាលទីពីរ នឹងចាប់ផ្តើមក្រោយការបោះឆ្នោតនៅអាមេរិក
ប្រធានាធិបតីអាមេរិក ដូណាល់ ត្រាំ។ រូបភាព៖ AFP
×![]()
ដោយ: ធៀន ភារិន្ទ
កិច្ចព្រមព្រៀងពាណិជ្ជកម្មដំណាក់កាលទី២រវាងចិន និងអាមេរិក អាចចាប់ផ្តើមចរចាបាន នៅក្រោយការបោះឆ្នោតប្រធានាធិបតីអាមេរិក។ នេះបើតាមការលើកឡើងរបស់ប្រធានាធិបតីអាមេរិក ដូណាល់ ត្រាំ នៅថ្ងៃទី៩ ខែមករា។ ការលើកឡើងពីលទ្ធភាពនៃកិច្ចព្រមព្រៀងដំណាក់កាលទីពីរបែបនេះ ធ្វើឡើងមុនការចុះហត្ថលេខាលើកកិច្ចព្រមព្រៀងពាណិជ្ជកម្មដំណាក់កាលទីមួយ ត្រូវគេរំពឹងថា អាមេរិក និងចិន នឹងចុះហត្ថលេខានៅសប្ដាហ៍ក្រោយ។ 
កន្លងមក ប្រធានាធិបតីអាមេរិក ដូណាល់ ត្រាំ ធ្លាប់បានប្រកាសម្តងហើយថា កិច្ចព្រមព្រៀងដំណាក់កាលទីមួយ នឹងត្រូវចុះហត្ថលេខាដោយភាគីចិន និងអាមេរិក នៅថ្ងៃទី១៥ ខែមករា។ អ្នកនាំពាក្យក្រសួងពាណិជ្ជកម្មចិន លោក Gao Feng បានអះអាងថា តំណាងរបស់ចិន គឺឧបនាយករដ្ឋមន្ត្រី និងជាអ្នកតំណាងចរចាពាណិជ្ជកម្មចិនលោក Liu He ដែលនឹងដឹកនាំក្រុមប្រតិភូចិន ទៅអាមេរិកចាប់ពីថ្ងៃទី១៣ ដល់ថ្ងៃទី១៥ ខែមករា ដើម្បីទៅចុះហត្ថលេខាលើកិច្ចព្រមព្រៀងពាណិជ្ជកម្មដំណាក់កាលទីមួយ។
ប្រសិនបើកិច្ចព្រមព្រៀងពាណិជ្ជកម្មដំណាក់ទីមួយ បានទទួលជោគជ័យមែន កិច្ចការបន្ទាប់របស់អាមេរិក និងចិន គឺជាការចរចាកិច្ចព្រមព្រៀងពាណិជ្ជកម្មដំណាក់កាលទីពីរ។ យ៉ាងណាក៏ដោយ កិច្ចចរចាលើកិច្ចព្រមព្រៀងទីពីរនេះ នឹងមិនអាចកើតឡើងក្នុងពេលឆាប់ៗនេះបានទេ ពោលគឺត្រូវរង់ចាំរហូតដល់ការបោះឆ្នោតប្រធានាធិបតីអាមេរិករួច។
ទាក់ទិនទៅនឹងកិច្ចព្រមព្រៀងពាណិជ្ជកម្មដំណាក់កាលទីពីរនេះ លោកត្រាំ បានប្រាប់អ្នកកាសែតថា អាមេរិក នឹងចាប់ផ្តើមកិច្ចព្រមព្រៀងជាមួយចិន តែមិនមែនពេលនេះទេ ហើយភាគីទាំងពីរ នឹងប្រើប្រាស់ពេលវេលាចរចាឲ្យកាន់តែតិចបំផុត និងល្អបំផុត។ ក្នុងន័យនេះ ការចរចាកិច្ចព្រមព្រៀងដំណាក់កាលទីពីរ នឹងលេចវត្តមានឡើង ក្រោយការបោះឆ្នោតប្រធានាធិបតីអាមេរិក ព្រោះវាជាពេលដ៏សាកសម ដែលអាចបង្កើតកិច្ចព្រមព្រៀងមួយ ឲ្យកាន់តែល្អជាងមុន។
ប៉ុន្តែគេ មិនទាន់ដឹងច្បាស់នៅឡើយទេថា កិច្ចព្រមព្រៀងដំណាក់កាលទីពីរនេះ នឹងចរចាលើបញ្ហាអ្វី។ នេះបើតាមការចុះផ្សាយរបស់ទីភ្នាក់ងារព័ត៌មាន AFP ។
សូមបញ្ជាក់ថា កិច្ចព្រមព្រៀងដំណាក់ទីមួយ ដែលគ្រោងចុះហត្ថលេខានៅថ្ងៃទី១៥ ខែមករាខាងមុខនេះ គឺមានរាប់បញ្ជូល ការការពារកម្មសិទ្ធិបញ្ញា, អាហារ, ផលិតផលកសិកម្ម, សេវាហិរញ្ញវត្ថុ, ការដោះដូរហិរញ្ញវត្ថុបរទេស និងបទបញ្ញត្តិស្តីពីការដោះស្រាយជម្លោះពាណិជ្ជកម្មរវាងប្រទេសទាំងពីរជាដើម។ បន្ថែមពីលើនេះ ភាគីអាមេរិក លោក Robert Lighthizer អ្នកតំណាងចរចាពាណិជ្ជកម្មចិន បានអះអាងថា ចិនក៏បានយល់បង្កើនការទិញផលិតផលពីអាមេរិករហូតដល់ ២០០ពាន់លានដុល្លារផងដែរ។ ប៉ុន្តែភាគីចិន មិនទាន់មានប្រតិកម្មណាមួយ ពាក់ព័ន្ធនឹងបញ្ហានេះនៅឡើយទេ ៕
Tag:
អាមេរិក
ចិន
© រក្សាសិទ្ធិដោយ thmeythmey.com
