Hamilton បរិច្ចាគ៥០ម៉ឺនដុល្លារ ដើម្បីសង្គ្រោះសត្វក្នុងហេតុការភ្លើងឆេះព្រៃនៅអូស្ត្រាលី

កីឡាអន្តរជាតិ

អន្តរជាតិ

Hamilton បរិច្ចាគ៥០ម៉ឺនដុល្លារ ដើម្បីសង្គ្រោះសត្វក្នុងហេតុការភ្លើងឆេះព្រៃនៅអូស្ត្រាលី

10, Jan 2020 , 8:19 pm

រូបភាព

ដោយ: ទេព ពិទូរ្យ

កំពូលអ្នកប្រណាំងរថយន្ត Formula One លំដាប់ពិភពលោក Lewis Hamilton នៅថ្ងៃទី៩ ខែមករា ថានឹងផ្តល់ថវិកាផ្ទាល់ខ្លួនចំនួន ៥០ម៉ឺនដុល្លារអាមេរិក ដើម្បីសម្រួលដល់ការជួយសង្គ្រោះ សត្វព្រៃដែលស្ថិតក្នុងហេតុការណ៍ភ្លើងឆេះព្រៃនៅអូស្ត្រាលី។

អត្ថបទទាក់ទង

កីឡាការិនី Ash Barty នឹងផ្តល់ប្រាក់ពីការប្រកួតដល់ជនរងគ្រោះ ដោយសារភ្លើងឆេះព្រៃនៅអូស្ត្រាលី

ម្ចាស់ជើងឯកពិភពលោក F1 ៦ សម័យកាល ជាអ្នកចូលចិត្តរស់នៅបែបធម្មជាតិ និងការដាំបន្ថែជាដើមនោះ បានបង្ហោះឃ្លីបវីដេអូខ្លីមួយលើបណ្តាញសង្គមអំពីការជួយសង្គ្រោះសត្វកូឡាមួយក្បាលពីសំណាក់ប្រជាពលរដ្ឋដែលរងគ្រោះដោយភ្លើងឆេះព្រៃ។

«ខ្ញុំរំជួលចិត្តណាស់ ពេលឃើញការបំផ្លិចបំផ្លាញពីភ្លើងឆេះព្រៃនៅអូស្ត្រាលី ដែលកំពុងបង្កឲ្យមានមនុស្សមួយចំនួន និងសត្វស្លាប់ពាសពេញប្រទេស។ ខ្ញុំសន្យាថានឹងផ្តល់ប្រាក់ចំនួន ៥០ម៉ឺនដុល្លារ ដើម្បីជួយដល់ក្រុមអ្នកស្ម័គ្រចិត្តជួយសង្គ្រោះសត្វព្រៃ និងសេវាកម្មពន្លត់អគ្គិភ័យនៅតាមជនបទ។ ប្រសិនបើអ្នកអាចធ្វើបាន ហើយអ្នកមិនទាន់បានធ្វើទេនោះ អ្នកក៏អាចបរិច្ចាគបានដូចខ្ញុំដែរ»។ នេះជាសំណេររបស់ Hamilton នៅលើ Twitter របស់ខ្លួន។

It breaks my heart to see the devastation the Australian bushfires are causing to people and animals across the country. I’m pledging $500k to support the animals, wildlife volunteers and rural fire services. If you are able to, and you haven’t already then you can donate too. pic.twitter.com/DXjScK5Oqq
— Lewis Hamilton (@LewisHamilton) January 9, 2020

ក្រៅពីបរិច្ចាគប្រាក់ផ្ទាល់ខ្លួន បុរសសញ្ជាតិអង់គ្លេសរូបនេះ បានអំពាវនាវឲ្យកីឡាករដទៃចូលរួមដូចខ្លួនផងដែរ ក្នុងយុទ្ធនាការសង្គ្រោះភ្លើងឆេះព្រៃនៅអូស្ត្រាលី ដែលកើតឡើងជិត៤ខែមកហើយនេះ។ Hamilton ក៏បានជំរុញឲ្យអ្នកគាំទ្រខ្លួនចំនួន ១៤ លាននាក់នៅលើ Instagram និង ៥,៦ លាននាក់នៅលើ Twitter ចូលរួមគិតអំពីផលប៉ះពាល់ដែលកំពុងកើតឡើងលើភពផែនដីនេះដែរ។

មកទល់ពេលនេះ វិបត្តិភ្លើងឆេះព្រៃខាងលើបានសម្លាប់មនុស្ស ២៦នាក់ ព្រមទាំងបំផ្លាញផ្ទះសម្បែងរបស់ប្រជាពលរដ្ឋរាប់ពាន់ខ្នង និងធ្វើឲ្យប៉ះពាល់ដល់គុណភាពដីជាង ៣,៦ លានហិកតាផង។ រីឯចំនួនសត្វដែលឆេះងាប់ និងរបួស ត្រូវបានគេប៉ាន់ស្មានថាបានកើនឡើងដល់១ពាន់លានក្បាលទៅហើយ។

Hamilton ដែលបើកបរឲ្យក្រុម Mercedes បន្ថែមថា៖«វាធ្វើឲ្យខ្ញុំសោកសៅយ៉ាងខ្លាំងនៅពេលដឹងថាសត្វជាង ១ ពាន់លានក្បាលនៅអូស្ត្រាលីបានស្លាប់ និងរបួសយ៉ាងឈឺចាប់ ខណៈពួកគេគ្មានផ្លូវចេញពីក្នុងព្រៃដែលត្រូវឆេះ។ សេចក្តីស្រឡាញ់របស់ខ្ញុំចំពោះសត្វគឺពិតជាធំធេង ហើយខ្ញុំមិនអាចត្រឹមតែសោកស្តាយទេ តែត្រូវជំរុញឲ្យមានការការពារប្រភេទសត្វមួយចំនួនដែលជិតផុតពូជ»៕