ក្រុមហ៊ុនសង្ហារឹមមួយរបស់អាមេរិក សម្លឹងឃើញកម្ពុជា ខណៈថ្លៃពលកម្មវៀតណាមឡើង

អន្តរជាតិ

ក្រុមហ៊ុនសង្ហារឹមមួយរបស់អាមេរិក សម្លឹងឃើញកម្ពុជា ខណៈថ្លៃពលកម្មវៀតណាមឡើង

10, Jan 2020 , 8:39 pm

រូបភាព

រោងចក្រផលិតគ្រឿងសង្ហារឹម នៅប្រទេសវៀតណាម (Vietnam Express)

ដោយ:

បញ្ហាកង្វះពលករក្នុងប្រទេសវៀតណាម ដែលបង្កជាកំណើនថ្លៃពលកម្ម កំពុងតែកាន់តែធ្ងន់ធ្ងរ ។ នេះបើតាមសារព័ត៌មានអាមេរិក Bloomberg ។ បញ្ហានេះ បានធ្វើឲ្យក្រុមហ៊ុនផលិតគ្រឿងសង្ហារឹមខ្លះ កំពុងពិចារណាជ្រើសយកប្រទេស កម្ពុជា ដែលមានសក្ដានុពលសម្រាប់ទីតាំងរោងចក្រខ្លួន។

ក្នុងបទសម្ភាសផ្ដាច់មុខជាមួយសារព័ត៌មានអាមេរិក Bloomberg នៅថ្ងៃទី៨ ខែមករា ឆ្នាំ២០២០ លោក Clarence Smith នាយកប្រតិបត្តិក្រុមហ៊ុនផលិតគ្រឿងសង្ហាររឹមអាមេរិកមួយឈ្មោះថា «Haverty Furniture Cos.» ដែលប្រើរោងចក្រក្នុងតំបន់អាស៊ីដើម្បីបង្កើតផលិតផលខ្លួន បញ្ជាក់ថា តម្លៃពលកម្មក្នុងវៀតណាម កំពុងកើនឡើង ហើយពលករក៏កំពុងខ្វះខាតច្រើន។

ទោះជាការផ្លាស់ប្តូរទីតាំងរោងចក្រពីប្រទេសចិនទៅប្រទសវៀតណាម កាលពីឆ្នាំ ព្រោះសង្គ្រាមពាណិជ្ជកម្ម បង្អាក់ដល់សង្វាក់ផលិតកម្មក៏ដោយក្តី ការរើទីតាំងរោងចក្រនេះ មិនបញ្ចប់ត្រឹមនេះឡើយ។ លោក Smith អះអាងបែបនេះ ដោយសង្កត់ធ្ងន់ថា៖«ពួកគេ ចាប់ផ្តើមសាងសង់រោងចក្រ ក្នុងប្រទេសកម្ពុជា»។

ចាប់តាំងពីឡើងកាន់តំណែងជាប្រធានាធិបតី លោក ដូណាល់ ត្រាំ បានដំឡើងពន្ធលើទំនិញផលិតនៅប្រទេសចិន ក្នុងគោលដៅបង្ខំឲ្យម្ចាស់ក្រុមហ៊ុនអាមេរិករើរោងចក្រពួកគេត្រលប់មកទឹកដីអាមេរិកវិញ។ ក៏ប៉ុន្តែពួកគេ ច្រើនផ្លាស់ប្តូរពីប្រទេសចិនទៅកាន់ប្រទេសកំពុងអភិវឌ្ឍន៍ផ្សេងទៀតក្នុងតំបន់អាស៊ី ។

បើសារព័ត៌មាន Bloomberg លោកនាយកប្រតិបត្តិ Smith បានប្រៀបធៀបការផ្លាស់ប្ដូររោងចក្រពីប្រទេសចិនទៅវៀតណាមនិងទៅកាន់បណ្ដាប្រទេសកំពុងអភិវឌ្ឍន៍ផ្សេងទៀតក្នុងតំបន់អាស៊ី ដូចនឹងការរើទីតាំងរោងចក្រឧស្សាហកម្មអាមេរិកពីរដ្ឋ Machigan ទៅរដ្ឋ North Carolina កាលពីជាង១០០ឆ្នាំមុន។

លោក កត់សម្គាល់ថា ឧស្សាហកម្មគ្រឿងសង្ហារឹមអាមេរិក មានសន្ទុះខ្លាំងក្នុងរដ្ឋ North Carolina ក៏ប៉ុន្តែលោកអះអាងថា វាមានតម្លៃថោកជាងសម្រាប់រោងចក្រក្នុងតំបន់អាស៊ីផលិតគ្រឿងសង្ហារឹមពីឈើ ដែលនាំចូលពីអាមេរិក បើធៀបនឹងក្រុមហ៊ុនដែលបង្កើតផលិតផលដូចគ្នាក្នុងសហរដ្ឋអាមេរិក៕