អន្តរជាតិ
ក្មេងប្រុសអាយុ២ឆ្នាំម្នាក់ ស្លាប់ក្នុងករណីប្លន់ប្រដាប់អាវុធហាងពេជ្រនៅថៃ ប្រភពរូប៖ Thaiger
× ក្មេងប្រុសអាយុ២ឆ្នាំម្នាក់ ស្ថិតក្នុងចំណោមមនុស្ស៣នាក់ដែលត្រូវបានសម្លាប់ក្នុងប្រទេសថៃ នៅពេលខ្មាន់កាំភ្លើងបិទមុខម្នាក់ បានធ្វើសកម្មភាពប្លន់ហាងគ្រឿងអលង្ការមួយកន្លែង។ ប៉ូលិសថៃ បញ្ជាក់បែបនេះ នៅថ្ងៃសុក្រ ១០ មករា ។
មនុស្ស ៤នាក់ផ្សេងទៀត ត្រូវបានរងរបួស នៅពេលខ្មាន់កាំភ្លើងម្នាក់នោះ បានបាញ់គ្មានគោលដៅដោយប្រើកាំភ្លើងខ្លីមួយដើម ក្នុងខេត្ត Lopburi ភាគកណ្ដាលនៃប្រទេសថៃ កាលពីយប់ថ្ងៃព្រហស្បតិ៍ ទី៩ ខែមករា។ ក្រោយមក ជនសង្ស័យរូបនេះ បានរត់គេចខ្លួនបាត់ជាមួយគ្រឿងអលង្ការ ដែលគិតជាទឹកប្រាក់១៦,៥០០ដុល្លារ។
ប៉ូលិសដែលប្រចាំនៅខេត្ត បានប្រាប់ទីភ្នាក់ងារព័ត៌មាន AFP ថា ក្រៅពីក្មេងតូចអាយុ២ឆ្នាំនោះ អ្នកស្លាប់ដទៃទៀត គឺជាសន្តិសុខ និងអ្នកលក់ដូរ។ វីដេអូថតពីកាមេរ៉ាសុវត្ថិភាព បង្ហាញថា ជនដៃឆៅរូបនោះ បានសម្រុកចូលទៅក្នុងហាងទំនិញ បើកការបាញ់ប្រហារ ហើយរត់គេចបានស្រួល ខណៈជនរងគ្រោះដេកស្តូកស្ដឹងក្នុងថ្លុកឈាម។
ស្នងការរងខេត្ត Lopburi លោក Sumeth Punsri បញ្ជាក់ថា ការបាញ់ប្រហារដ៏ឃោរឃៅនេះ បានកើតឡើងត្រឹមមួយនាទីប៉ុណ្ណោះ មុននឹងខ្មាន់កាំភ្លើង បានរត់គេចដោយសុវត្ថិភាព ដោយប្រើប្រាស់ម៉ូតូ។ ទោះមិនចាប់បាននៅនឹងកន្លែង អាជ្ញាធរថៃ បានផ្តល់ប្រាក់១ម៉ឹនបាត ឬ៣៣០៤ ដុល្លារ សម្រាប់ព័ត៌មានពីទីតាំងលាក់ខ្លួនរបស់ជននោះ។
សូមបញ្ជាក់ថា ថៃ មានអត្រាអ្នកកាន់កាប់កាភ្លើងខ្ពស់ ហើយឧបទ្ទវហេតុនេះ គឺជាឧក្រិដ្ឋកម្មចុងក្រោយបង្អស់ ពាក់ព័ន្ធនឹងការបាញ់កាំភ្លើង ដែលជាប់លើទំព័រមុខនៃសារព័ត៌មាន ក្នុងពេលប៉ុន្មានខែចុងក្រោយ។ ករណីបាញ់កាំភ្លើង២ ទៅ ៣លើក នៅក្បែរសាលាកាត់ក្តី កាលពីចុងឆ្នាំ២០១៩ បានបង្កកង្វល់ជាថ្មីពាក់ព័ន្ធហិង្សាកាំភ្លើង។ ក៏មានករណីបាញ់សម្លាប់កក្រើកប្រទេសថៃផងនោះ នោះគឺ មេធាវី២នាក់ ត្រូវបានបាញ់ស្លាប់ ដោយមន្ត្រីបម្រើការនៅតុលាការម្នាក់ ក្នុងភាគកើតនៃប្រទេសថៃ អំឡុងពេលកាត់ក្តីរឿងជម្លោះដីធ្លី៕
© រក្សាសិទ្ធិដោយ thmeythmey.com