អន្តរជាតិ
លោក មហាធៀ ត្រូវតែងតាំងជារដ្ឋមន្ត្រីអប់រំស្ដីទី បន្ថែមពីតំណែងនាយករដ្ឋមន្ត្រី
លោកនាយករដ្ឋមន្ត្រី មហាធៀ មហាម៉ាត់ (AFP)
×![]()
នាយករដ្ឋមន្ត្រីម៉ាឡេស៊ី មហាធៀ មហាម៉ាត់ ត្រូវបានតែងតាំងជារដ្ឋមន្ត្រីអប់រំស្តីទី ក្រោយការលាលែងរបស់លោក Maszlee Malik ពីតំណែងនេះ កាលពីសប្តាហ៍មុន។ មេដឹកនាំចាស់វស្សារូបនេះ បញ្ជាក់ថា លោក នឹងកាន់តំណែងនេះ រហូតដល់រដ្ឋមន្ត្រីថ្មី ត្រូវបានជ្រើសរើស។
ការតែងតាំងលោក មហាធៀ ជារដ្ឋមន្ត្រីអប់រំជាបណ្តោះអាសន្ននេះ ត្រូវបានបានយល់ព្រមក្នុងជំនួបគណៈរដ្ឋមន្ត្រីមួយកាលពីថ្ងៃទី៨ ខែមករា ។ នេះបើតាមសេចក្តីថ្លែងការណ៍របស់ការិយាល័យនាយករដ្ឋមន្ត្រីម៉ាឡេស៊ីចុះថ្ងៃសុក្រ ទី១០ ខែមករា ។
ក្នុងលិខិតនេះ បង្ហាញថា ការតែងតាំងរបស់លោកនាយករដ្ឋមន្ត្រី បានចូលជាធរមាន កាលពីថ្ងៃ ៣ មករា ពោលគឺមួយថ្ងៃប៉ុណ្ណោះបន្ទាប់ពីលោក Maszlee បានសម្រេចចុះចេញពីតំណែងនេះ។ សេចក្តីថ្លែងការណ៍ដដែលនេះ បញ្ជាក់ទៀតថា លោកបណ្ឌិត មហាធៀ ដែលធ្លាប់មានមុខងារមួយក្នុងក្រសួងអប់រំ ចាប់ពីឆ្នាំ ១៩៧៤ ដល់ឆ្នាំ ១៩៧៧ នឹងកាន់តំណែងរដ្ឋមន្ត្រីអប់រំនេះ រហូតដល់រដ្ឋមន្ត្រីថ្មី ត្រូវបានតែងតាំង។
ទីភ្នាក់ងារព័ត៌មានម៉ាឡេស៊ី Bernama កាលពីថ្ងៃ៧ មករា ឆ្នាំ២០២០ លោកនាយករដ្ឋមន្ត្រី មហាធៀ ឆ្លើយនឹងសំណួរអ្នកព័ត៌មានថា ការតែងតាំងរដ្ឋមន្ត្រីអប់រំថ្មី នឹងត្រូវសម្រេចជ្រើសរើសដោយលោកផ្ទាល់ ព្រោះថា នេះជាសិទ្ធិពិសេសរបស់លោក។
លោក Maszlee ដែលបានលាលែងតំណែងជារដ្ឋមន្ត្រីអប់រំក្រោយកាន់បាន២០ខែនោះ ទទួលរងការរិះគន់ជាច្រើន ជាពិសេស រឿងកំណែទម្រង់វិស័យអប់រំដែលលោកបានដាក់ចេញ។ លោក ត្រូវបានរិះគន់ថាបរាជ័យក្នុងការពង្រឹងបទដ្ឋានអប់រំ ហើយវាក៏មានបណ្ដឹងទាមទារតាមអនឡាញស្នើឲ្យលោកលាលែងពីតំណែងថែមទៀតផង។ លោក អះអាងថា ការលាលែងពីតំណែងនេះ គឺទទួលការផ្តល់យោបល់ពីសំណាក់លោកនាយករដ្ឋមន្ត្រី។
បន្ថែមពីបញ្ហាកំណែទម្រង់ប្រព័ន្ធអប់រំម៉ាឡេស៊ី ក្នុងខែ កញ្ញា ឆ្នាំ២០១៨ លោក Maszlee បានយល់ព្រមទទួលយកការតែងតាំងជានាយកនៃសកលវិទ្យាល័យឥស្លាមអន្តរជាតិរបស់ម៉ាឡេស៊ី ទោះបីជាសម្ព័ន្ធភាពនយោបាយរបស់លោក មហាធៀ សន្យាស្តារសេរីភាពផ្នែកអប់រំក្នុងកម្រិតឧត្តមសិក្សា។ ក្រោយមក លោកបានលាលែងពីតួនាទីនេះក្នុងខែវិច្ឆិកា ឆ្នាំដដែល ក្រោយរងការជំទាស់ខ្លាំងៗពីក្រុមនិស្សិត និងអ្នកនយោបាយ៕
Tag:
ម៉ាឡេស៊ី
មហាធៀ មហាម៉ាត់
រដ្ឋមន្ត្រីអប់រំ
© រក្សាសិទ្ធិដោយ thmeythmey.com
