ONE Championship
កីឡាជាតិ
ជាតិ
គ្រូបង្វឹក Alan Mccune ប្រាប់អំពីផែនការការប្រកួត៦លើករបស់ ខុន ស៊ីចាន់ នៅ ONE
×![]()
ដោយ: ថ្មីៗ
គ្រូបង្វឹកសញ្ជាតិស្កុតឡែន Alan Mccune បានបង្ហើបអំពីផែនការឆ្នាំ២០២០ សម្រាប់កូនសិស្សរបស់ខ្លួន ខុន ស៊ីចាន់ ដែលជាប់កិច្ចសន្យាប្រកួតនៅសង្វៀនលំដាប់ពិភពលោក ONE Championship រហូតដល់៦ប្រកួត។ ស៊ីចាន់ បើកឆាកឆ្នាំថ្មីនឹងប៉ះកីឡាករម្ចាស់ផ្ទះឥណ្ឌូណេស៊ី Eko Roni Saputra នៅខែកុម្ភៈ នាក្រុងហ្សាការតា។
គ្រូបង្វឹកមកពី Phnom Penh MMA បានថ្លែងថា ៖«ស៊ីចាន់ បានរៀនសូត្រច្រើនអំពីការប្រកួតជំហរដេកឬ ប្រកួតរាប់លើក្តារេញកន្លងមក។ ហើយការប្រកួតកាលខែ វិច្ឆិកា ស៊ីចាន់ ប៊ិះអាចឃ្លេករបស់ Roshan Mainam យកឈ្នះ ប៉ុន្តែ ភ្លាត់បន្តិចបែរចូលឃ្លេគេវិញ។ ឆ្នាំថ្មីនេះ ស៊ីចាន់ ទទួលការប្រកួតដល់៦លើក ដូច្នេះយើងត្រូវរៀបចំរហូត និងទៅប្រកួតដើម្បីស្វែងរកជ័យជម្នះត្រលប់មកផ្ទះវិញ»។
ជាមួយគ្នានោះដែរ ខុន ស៊ីចាន់ ក៏បានតាំងចិត្តមិនស្ដាយក្រោយបន្ទាប់ពីរងបរាជ័យជាប់គ្នាក្នុងកម្មវិធីប្រកួតរបស់ ONE Championship នៅឆ្នាំ ២០១៩ ដោយផ្អែកលើហេតុផលក្បាច់ឃ្លេនៅស្ទើរជាងគូប្រជែង។ ក្នុងចំណោមផែនការប្រកួត៦លើកនៅឆ្នាំថ្មី ស៊ីចាន់នឹងប្រឹងប្រែងឲ្យអស់កម្លាំងកាយចិត្ត បើមិនទទួលជ័យជម្នះទាំងអស់ ក៏ត្រូវឈ្នះខ្លះត្រលប់មកផ្ទះវិញដែរ។ ហើយអ្វីៗត្រូវមើលលើហ្វឹកហាត់ត្រៀមប្រកួតតាមស្ថានការណ៍ជាក់ស្ដែង។
បែបណាក្ដី លោក Alan សង្កត់ធ្ងន់ថា៖«យើងនឹងបង្កើនការហ្វឹកហាត់ត្រៀមរហូត ព្រោះកម្មវិធីប្រកួតបន្តបន្ទាប់បើគិតទៅត្រឹម ២ខែប្រកួតម្ដងជាមធ្យម។ ខ្ញុំសង្ឃឹមថា ស៊ីចាន់ ទទួលបានលទ្ធផលល្អនៅឆ្នាំ ២០២០ ជាពិសេសមានគ្រូបង្វឹក Fernando Salvador កម្រិតខ្សែក្រវាត់ខ្មៅជឺជិតស៊ី ៣ ដាន់ បន្តបង្វឹកដដែល និងគ្រូបង្វឹកមកពីអាមេរិកលោក Chris kennedy»។
កីឡាករមកពីឧត្តរមានជ័យបានបង្ហើបឲ្យដឹងថា រូបគេនឹងមកហ្វឹកហាត់នៅភ្នំពេញនាថ្ងៃទី ១០ មករាខាងមុខ ហើយបោះជំរំហ្វឹកហាត់រហូតដល់ថ្ងៃប្រកួតនាខែកុម្ភៈតែម្ដង។ ម្ចាស់ខ្សែក្រវាត់វាយដាក់ទ្រុងឆ្នាំ ២០១៣ រៀបរាប់ថា ការហ្វឹកហាត់នឹងត្រូវបែងចែកដូចពីមុនអីចឹង ដោយពេលព្រឹកហ្វឹកហាត់ប្រដាល់គុនខ្មែរ និង ពេលរសៀលត្រូវហ្វឹកហាត់គុនចម្រុះ និង ជឺជិតស៊ូ។
គួរដឹងថា នៅឆ្នាំ ២០១៩ ខុន ស៊ីចាន់ ឡើងប្រកួតនៅសង្វៀន ONE Championship ចំនួនពីរលើក។ កីឡាករវ័យ៣២ឆ្នាំចាញ់កីឡាករឥណ្ឌូណេស៊ី Rudy Agustian ត្រឹមទឹកទី១ដោយសារក្បាច់ឃ្លេជាប់ក កាលខែ កុម្ភៈ នៅប្រទេសសិង្ហបុរី ក្នុងកម្មវិធី ONE:CALL TO GREATNESS។ បន្ទាប់មកថ្ងៃទី ៨ ខែ វិច្ឆិកា ខុន ស៊ីចាន់ ចាញ់ ជើងខ្លាំងមកពីឥណ្ឌាជំនាញចំបាប់ Roshan Mainam ត្រឹមទឹកទី១ដូចគ្នាក្នុងកម្មវិធី ONE: MASTER OF FATE ពេលប្រកួតនៅប្រទេសហ្វីលីពីនវិញម្ដង។
កីឡាករទម្ងន់ Flyweight របស់កម្ពុជាប្រឡូកលើសង្វៀនគុនចម្រុះតាំងពីឆ្នាំ ២០១៣ មក ពេលរូបគេឈ្នះខ្សែក្រវាត់វាយដាក់ទ្រុង Khmer Warrior Challenge រដូវកាលទី១ដែលរៀបចំឡើងដោយស្ថានីយទូរទស្សន៍ MyTV និង ស៊ីធីអិន។
កុំភ្លេចទស្សនា កម្មវិធីបន្ទាប់របស់ស្ថាប័ន ONE Championship សូមទស្សនា ONE: A NEW TOMORROW នៅថ្ងៃទី ១០ ខែ មករា ចាប់ពីវេលាម៉ោង ៧ ល្ងាចតទៅដែលមានផ្សាយផ្ទាល់តាមរយៈ Facebook, Twitter, YouTube,និង ONE Super App៕
© រក្សាសិទ្ធិដោយ thmeythmey.com
