TheTravel ដែលជាគេហទំព័រទេសចរណ៍ដ៏ល្បីល្បាញ បានលើកឡើងពីហេតុផលល្អទាំង២០ចំណុច ដែលទេសចរ ត្រូវចាប់យកឱកាសក្នុងដំណើរមកកាន់ប្រទេសកម្ពុជា និងវៀតណាម។ តម្លៃថោកសមរម្យ អាកាសធាតុល្អ អរិយធម៌សម្បូរបែប ជាកត្តាដែលអាចទាក់ទាញអ្នកទេសចរមកកាន់ប្រទេសជិតខាងពីរនេះ។
TheTravel លើកឡើងពីហេតុផល២០ចំណុច ដែលអាចធ្វើឲ្យអ្នកទេសចរអាចប្រៀបធៀបលើចំណុចខ្លាំងរៀងៗខ្លួនលើសក្តានុពលទេសចរណ៍ ក្នុងករណីពួកគេសម្រេចចិត្តរើសយកតែប្រទេសណាមួយសម្រាប់ដំណើរកម្សាន្តរបស់ខ្លួន។
១. វៀតណាម៖ កាហ្វេដ៏សម្បូរបែប រសជាតិប្លែកៗ ដូចជាកាហ្វេស៊ុត កាហ្វេដូង និងកាហ្វេផ្សេងៗទៀត។
២. កម្ពុជា៖ ម្ហូបខ្មែរមានលក្ខណៈពិសេសដែលពិបាករកនៅប្រទេសផ្សេងទៀត។ មិនហឹរដូចជាម្ហូបថៃ ប៉ុន្តែរសជាតិមិនអាចបំភ្លេចបាន។
៣. វៀតណាម៖ ស្ថិតភាគកណ្តាលនៃប្រទេសវៀតណាម ក្រុង Hue ជាអតីតរាជធានីមួយ ប៉ុន្តែរមណីយដ្ឋានប្រវត្តិសាស្ត្រជាច្រើនត្រូវបានបំផ្លាញដោយសារសង្គ្រាម។
៤. កម្ពុជា៖ បាត់ដំបង ជាក្រុងទេសចរណ៍បង្កប់ដោយស្លាកស្នាមប្រវត្តិសាស្ត្រ ជាពិសេសផ្ទះបុរាណ ហើយអ្នកទេសចរអាចសាកល្បងរសជាតិធ្វើដំណើរតាមឡូរី។
៥. វៀតណាម៖ ដំណើរតាមផ្លូវទឹកនៅភាគខាងត្បូងវៀតណាម ជាពិសេសទិដ្ឋភាពលក់ដូរនៅផ្សារបណ្តែតទឹកនៃក្រុង Can Tho នាំឲ្យទេសចរ កាន់តែស្គាល់ពីជីវិតពលរដ្ឋសហគមន៍។
៦. កម្ពុជា៖ ដំរី ជាផ្នែកមួយដ៏ទាក់ទាញបំផុតសម្រាប់អ្នកដែលស្រឡាញ់សត្វ។ សមាសភាពសត្វដំរីមានប្រវត្តិដ៏យូរលង់ក្នុងសង្គមខ្មែរ។ បច្ចុប្បន្នអាជ្ញាធរកម្ពុជាលែងអនុញ្ញាតឲ្យសត្វដ៏ស្មោះស្ម័គ្រនេះ ដឹកភ្ញៀវទេសចរទៀតហើយ។
៧. វៀតណាម៖ ការធ្វើដំណើរតាមម៉ូតូ ឬកង់ ជាជម្រើសដ៏ទាក់ទាញសម្រាប់ជនបរទេស ជាពិសេសនៅក្រុងចម្បងទាំងពីរ គឺហូជីមិញ និងហាណូយ។
៨. កម្ពុជា៖ ការឡើងភ្នំ ក្លាយជាកញ្ចប់ទេសចរដ៏ពេញនិយម ជាពិសេសដំណើរទៅកាន់ភ្នំក្រវ៉ាញ ឬភ្នំឱរ៉ាល់ដ៏ខ្ពស់ជាងគេក្នុងប្រទេស។ នៅទីនេះ មាន ជីវចម្រុះ និងសត្វព្រៃ ជាច្រើនដ៏ទាក់ទាញច្រើនប្រភេទ។
៩. វៀតណាម៖ Hoi An ត្រូវបានចាត់ទុកជាក្រុងដែលអាចផ្តិតយកទិដ្ឋភាពធម្មជាតិ និងសកម្មភាពប្រចាំថ្ងៃដ៏ល្អបំផុតមួយ រួមទាំងទឹកធ្លាក់ធម្មតា ហាងទំនិញ ទីផ្សារ និងភោជនីយដ្ឋានទំនើបៗ។
១០. កម្ពុជា៖ ដំណើរមកកាន់កម្ពុជា មិនត្រឹមតែសំដៅទៅកាន់រមណីយដ្ឋានប្រវត្តិសាស្ត្រនោះឡើយ ប៉ុន្តែប្រវត្តិដែលទាក់ទងនឹងប្រទេសមួយនេះ ក៏ជាទីចាប់អារម្មណ៍ផងដែរ។ ប្រវត្តិសម័យអង្គរ ឈានដល់សម័យខ្មែរក្រហម សុទ្ធតែមានតឹកតាងបង្ហាញប្រាប់ភ្ញៀវទេសចរ។
១១. វៀតណាម៖ ទេសភាពវាលស្រែនៅតំបន់ភ្នំនៃក្រុង Sapa ជាប់ព្រំដែនចិន ពិតជាទាក់ទាញ ជាពិសេសទៀតនោះ គឺឧទ្យានជាតិ Hoang Lien។
១២៖ កម្ពុជា៖ មើលព្រះអាទិត្យរះ! សម្រាប់អ្នកទេសចរទូទាំងពិភពលោក ពួកគេពិបាករកកន្លែងណាដែលល្អពិសេសជាង អង្គរវត្ត នៅតំបន់អច្ឆរិយរបស់កម្ពុជានោះឡើយ។
១៣. វៀតណាម៖ ការធ្វើដំណើរតាមរថយន្តក្រុងនៅពេលយប់ ជារសជាតិថ្មីមួយបន្ថែមទៀតសម្រាប់អ្នកទេសចរបែបផ្សងព្រេង ដោយពួកគេបានទៅដល់គោលដៅយ៉ាងរីករាយពេលភ្ញាក់ឡើង។
១៤. កម្ពុជា៖ ខេត្តព្រះសីហនុ គឺជាទីតាំងជួបជុំគ្នាដ៏រីករាយ ទាំងពេលថ្ងៃ និងពេលយប់។ ពេលថ្ងៃគេអាចកម្សាន្តនៅតាមបណ្តាកោះ ហើយពេលយប់ ពោរពេញទៅដោយទីតាំងរាំលេងកម្សាន្ត។
១៥. វៀតណាម៖ ឆ្នេរ Halong ដែលនៅមិនឆ្ងាយពីហាណូយ មានផ្ទាំងថ្មធម្មជាតិដ៏ស្រស់ស្អាត ហើយទេសចរនិយមទៅកាន់ទីនោះ តាមរយៈការជិះកាយ៉ាក់។
១៦. កម្ពុជា៖ ស្នាមញញឹមពោរពេញទៅដោយភាពរួសរាយរាក់ទាក់ ពិតជាពិបាករកខ្លាំងណាស់។ ពលរដ្ឋមូលដ្ឋានរបស់កម្ពុជា ត្រូវបានវាយតម្លៃថា ជាមនុស្សស្វាគមន៍ភ្ញៀវបរទេស និងចិត្តល្អបំផុត។
១៧. វៀតណាម៖ កត្តាភូមិសាស្ត្រពីតំបន់ភ្នំ ព្រៃ រូងភ្នំ ឆ្នេរសមុទ្រ រហូតដល់ស្ទឹង ទន្លេ បឹងបួរ សុទ្ធតែជាទីតាំង ដែលទេសចរអាចទស្សនាជាកញ្ចប់បាន ជាពិសេសរវាងទីក្រុង និងជនបទ។
១៨. កម្ពុជា៖ ចំណីផ្លូវសម្រាប់អ្នកទេសចរ មិនទាន់សម្បូរបែបនោះឡើយនៅកម្ពុជា ប៉ុន្តែនារយៈពេលចុងក្រោយ បណ្តាក្រុងធំៗ សុទ្ធតែមានសេវាកម្មដឹកជញ្ជូនតាមរយៈ App ដ៏សម្បូរបែបផងដែរ។
១៩. វៀតណាម៖ ហ្វ៊ើ បានក្លាយជាយីហោរដ៏ទាក់ទាញសម្រាប់អ្នកទេសចរ ដោយពួកគេសាកល្បងរសជាតិ ស្ទើរគ្រប់ទីកន្លែង ជាពិសេសនៅហាងតាមចិញ្ចើមផ្លូវ។
២០. កម្ពុជា៖ នៅអាស៊ីអាគ្នេយ៍ បរទេសចង់មកលេងកម្ពុជា ក្រោមហេតុផលដ៏សំខាន់មួយទៀតនោះគឺ លំហែរកាយនៅតាមឆ្នេរ និងកោះ ដ៏មនោរម្យ។ កោះរុង ជាទីតាំងដែលទេសចរមិនងាយរំលង៕