អន្តរជាតិ
ប្រជាជនថៃចូលរួមយុទ្ធនាការរត់ប្រឆាំងរដ្ឋាភិបាលថៃ និងលើកម្រាមដៃបី។ រូបភាពAFP
×![]()
ដោយ: ធៀន ភារិន្ទ
នាព្រឹកព្រលឹមស្រាងៗ ថ្ងៃទី១២ ខែមករា ប្រជាជនថៃជាងមួយម៉ឺននាក់ បានចូលរួមយុទ្ធនាការ រត់ប្រឆាំងនឹងភាពផ្តាច់ការ (Run Against Dictatorship) ដើម្បីបង្ហាញពីការមិនពេញចិត្តសកម្មភាពមួយចំនួន ដែលរដ្ឋាភិបាលរបស់លោកប្រាយុទ្ធ ចន្ទអូចាធ្វើតាំងពីឆ្នាំ ២០១៤មក។
«រត់ប្រឆាំងនឹងរបប់ផ្តាច់ការយោធា» គឺជាប្រធានបទ នៃព្រឹត្តិការណ៍ ដែលមានប្រជាជនថៃចូលរួមយ៉ាងច្រើន។ ជាមួយសំលៀកបំពាក់អត្តពលិក ប្រជាជនថៃជាង១ម៉ឺននាក់ បានធ្វើយុទ្ធនាការរត់ នៅសួនឧទ្យានសាធារណៈមួយកន្លែងនៃទីក្រុងបាងកក ដោយអមជាមួយសម្រែក «ប្រយុទ្ធចុះចេញៗ» ឬ «ជយោប្រជាធិបតេយ្យ» ក្នុងរយៈចម្ងាយ ២,៦ គីឡូម៉ែត្រ។
រត់បណ្តើរ អត្តពលិកលើកម្រាមដៃបណ្តើរ ដែលជាសញ្ញាមិនចុះចាញ់នឹងការដឹកនាំរបស់លោកប្រយុទ្ធ គឺយកតម្រាប់តាមរឿង «The Hunger Games»។ ដោយមានប្រជាជនថៃចូលរួមយ៉ាងច្រើនសន្ធឹក អាជ្ញាធរថៃ បានបញ្ជូនកម្លាំងសន្តិសុខមកជាច្រើននាក់ផងដែរ ដើម្បីឃ្លាំមើលស្ថានការណ៍។
បើតាមអ្នករៀបចំកម្មវិធី លោក Tanawat Wongchai បានលើកឡើងថា យុទ្ធនាការនេះ គឺធ្វើឡើងក្នុងគោលបំណង បង្ហាញពីការមិនពេញចិត្តរបស់ប្រជាជន ចំពោះសកម្មភាពរដ្ឋាភិបាលថៃ តាំងពីឆ្នាំពី២០១៤កន្លងមក។ ក្នុងន័យនេះ លោក Tanawat ចង់ឲ្យប្រជាជនថៃចេះទាមទារសិទ្ធិរបស់ខ្លួន និងធ្វើអ្វីតាមដែលខ្លួនអាចធ្វើទៅបាន។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ជាព្រឹត្តិការណ៍រត់ ដែលអនុញ្ញាត និងភ្ជាប់ជាមួយពាក្យព្រមានពីរដ្ឋាភិបាល។ ជាការពិត រដ្ឋាភិបាលថៃបានអនុញ្ញាតឲ្យប្រារព្ធពិធីមួយនេះ ប៉ុន្តែក៏បានហាមដាច់ខាត មិនអាចឲ្យមានសកម្មភាពផ្ទុយទៅនឹងច្បាប់ដែរ។ បើមិនដូច្នោះទេ រដ្ឋាភិបាលនឹងចាត់វិធានការទៅតាមនោះ។ ជាការឆ្លើយតប លោក Tanawat បានអះអាងថា កម្មវិធីរត់នេះ នឹងមិនបង្កឲ្យមានអំពើហិង្សាកើតឡើងឡើយ។
ពិតណាស់ ព្រឹត្តិការណ៍រត់នេះ គឺធ្វើឡើង បន្ទាប់ពីគណបក្សបក្សអនាគតឆ្ពោះទៅមុខ (FFP) កំពុងប្រឈមទៅនឹងការរំលាយបក្សនៅក្នុងខែមករានេះ ដោយតុលាការធម្មនុញ្ញថៃ ខណៈពេលលោកប្រមុខបក្សលោកThanathorn កំពុងប្រឈមនឹងបទចោទ ការប៉ុនប៉ងផ្តួលរំលំរបបរាជានិយមអាស្រ័យរដ្ឋធម្មនុញ្ញថៃ និងការជួបប្រជុំជាសាធារណៈខុសច្បាប់នាខែធ្នូ ឆ្នាំ ២០១៩។ ជាពិសេសព្រឹត្តិការណ៍នេះ គឺជាការបង្ហាញការមិនពេញចិត្តរបស់ប្រជាជនថៃ ចំពោះសកម្មភាពរដ្ឋាភិបាល តាំងពីឆ្នាំ២០១៤មក៕
Tag:
ថៃ
© រក្សាសិទ្ធិដោយ thmeythmey.com
