អន្តរជាតិ
មហាសេដ្ឋីជប៉ុន Yusaku ស្វែងរកដៃគូជីវិតសម្រាប់ដំណើរទៅឋានព្រះចន្ទ
× មហាសេដ្ឋីជប៉ុន លោក Yusaku Maezawa កំពុងប្រកាសស្វែងរកនារីម្នាក់ជាដៃគូជីវិត សម្រាប់រួមដំណើរជាមួយលោកទៅកាន់ឋានព្រះចន្ទ ក្រោមការរៀបចំរបស់ក្រុមហ៊ុនអវកាស Space X។ នេះបើតាមការផ្សាយរបស់ BBC។
លោក Maezawa អាយុ៤៤ឆ្នាំ ជាមហាសេដ្ឋីផ្នែករចនាម៉ូដ និងសិល្បៈដែលមានទ្រព្យសម្បត្តិប្រមាណ១.៨ពាន់លានដុល្លារអាមេរិក ហើយបច្ចុប្បន្នលោកជាបុរសពោះម៉ាយ និងមានកូនបីនាក់។
កាលពីថ្ងៃទី១៧ ខែកញ្ញា ឆ្នាំ២០១៨ លោកបានប្រកាសថា លោកត្រៀមខ្លួនក្លាយជាអ្នកទេសចរដំបូងបំផុតក្នុងដំណើរទៅកាន់ឋានព្រះចន្ទតាមរយៈអវកាស SpaceX Starship ដែលបានដែលត្រូវបានផលិតឡើងកាលពីឆ្នាំ២០១៧។
SpaceX បានបញ្ជាក់ថា ដំណើរទេសចរណ៍នេះ នឹងចាប់ដំណើរការមិនឲ្យហួសឆ្នាំ២០២៣ឡើយ។ កាលពីពេលថ្មីៗកន្លងមកនេះ លោក Maezawa បានចាប់ផ្តើមប្រកាសរកដៃគូប្រចាំជីវិត ហើយរួមដំណើរទៅកាន់ឋានព្រះចន្ទជាមួយលោក។
«ខ្ញុំចង់ស្វែងរកដៃគូជីវិត។ ជាមួយនឹងដៃគូអនាគតរបស់ខ្ញុំ ខ្ញុំចង់បង្ហាញពីសេចក្តីស្នេហា និងសន្តិភាពពិភពលោក ពីភពផ្សេងមួយទៀត»។ នេះជាការលើកឡើងរបស់លោក Maezawa ផ្ទាល់។
តាមរយៈព័ត៌មាននៅលើ
https://mz.abema.tv/en.html លោក Maezawa បានដាក់កាលបរិច្ឆេទចុងក្រោយត្រឹមថ្ងៃទី១៧ ខែមករា ដោយបេក្ខភាពត្រូវមានអាយុ២០ឆ្នាំឡើង ជាពិសេសជានារីដែលមានបំណងប្រាថ្នាក្នុងជីវិតខ្ពស់ ក៏ដូចជាសន្តិភាពពិភពលោក៕
Tag:
ឋានព្រះចន្ទ
SpaceX
© រក្សាសិទ្ធិដោយ thmeythmey.com