លោក Pablo Kang ជាបុរសដំបូងក្នុងតំណែងទូតអូស្ត្រាលីប្រចាំកម្ពុជា បើគិតតាំងពីឆ្នាំ២០០០មក

ជាតិ

នយោបាយជាតិ

លោក Pablo Kang ជាបុរសដំបូងក្នុងតំណែងទូតអូស្ត្រាលីប្រចាំកម្ពុជា បើគិតតាំងពីឆ្នាំ២០០០មក

14, Jan 2020 , 2:59 pm

រូបភាព

លោក Pablo Kang ថ្វាយសារតាំងពីព្រះករុណា ព្រះមហាក្សត្រនៅព្រះបរមរាជវាំង កាលពីថ្ងៃទី១៣ ខែមករា។ រូបថត Twitter Pablo Kang

ដោយ: រួបរួម

លោក Pablo Kang ជាបុរសដំបូងបំផុតដែលកាន់តំណែងជាឯកអគ្គរាជទូតអូស្ត្រាលីប្រចាំកម្ពុជា នារយៈពេល២០ឆ្នាំចុងក្រោយនេះ។ លោកបានចូលក្រាបថ្វាយបង្គំគាល់ ថ្វាយសារតាំងព្រះករុណា ព្រះមហាក្សត្រ ព្រះបាទសម្តេច ព្រះបរមនាថ នរោត្តម សីហមុនី នៅព្រះបរមរាជវាំង កាលពីថ្ងៃទី១៣ ខែមករា ឆ្នាំ២០២០។

លោក Pablo Kang ចូលកាន់តំណែងបន្តពីលោកស្រី Angela Corcoran ដែលបានផុតអណត្តិ ក្រោយបំពេញបេសកកម្មនៅកម្ពុជាចាប់តាំងពីខែមេសា ឆ្នាំ២០១៦មក។ បើគិតចាប់តាំងពីឆ្នាំ២០០០ ពោលក្រោយការផុតអណត្តិរបស់លោក Malcolm Leader (ពីឆ្នាំ១៩៩៧ ដល់ឆ្នាំ២០០០) រដ្ឋាភិបាលអូស្ត្រាលី បានតែងតាំងឯកអគ្គរាជទូតជានារី ជាបន្តបន្ទាប់ ដល់ទៅ៧រូប។

Today I had the distinct honour to present my credentials to His Majesty King Norodom Sihamoni of, accompanied by my wife Rebecca and senior Embassy staff. The ceremony marks the start of my official engagement as Ambassador. pic.twitter.com/lZ3DKKgunv
— Pablo Kang (@AusEmbPP) January 13, 2020

លោកស្រី Louis Hand កាន់តំណែងពីឆ្នាំ២០០០ ដល់ឆ្នាំ២០០៣ មុននឹងជំនួសដោយ លោកស្រី Annabel Anderson (២០០៣-២០០៤) ហើយបន្តដោយ លោកស្រី Lisa Filipetto (២០០៤-២០០៧), លោស្រី Margaret Adamson (២០០៧-២០១០),លោកស្រី Penny Richards (២០១០-២០១៣), លោកស្រី Alison Burrows (២០១៣-២០១៦) និងលោកស្រី Angela Corcoran (២០១៦-២០១៩)។

យោងតាមការផ្សាយរបស់កាសែត The National ប្រចាំក្រុងអាប៊ូដាប៊ី ឪពុកម្តាយរបស់លោក Pablo Kang មានដើមកំណើតកូរ៉េខាងត្បូង ដោយបានចាកចេញពីសេអ៊ូលទៅនៅក្នុងក្រុងស៊ីដនី នាអំឡុងឆ្នាំ១៩៦០។ ឈ្មោះរបស់លោកត្រូវបានយកតាមវិចិត្រករអ៊ីតាលី Pablo Picasso ដែលបានទទួលមរណភាពនៅឆ្នាំ១៩៧៣ ចំពេលដែលលោកបានកើត។

កាលពីថ្ងៃទី១៦ ខែធ្នូ ឆ្នាំ២០១៩ សមាជិកព្រឹទ្ធសភានៃប្រទេសអូស្ត្រាលី លោកស្រី Marise Payne និងជារដ្ឋមន្ត្រីការបរទេស និងរដ្ឋមន្ត្រីកិច្ចការនារីផងនោះ បានប្រកាសតែងតាំងលោក Pablo Kang ជាឯកអគ្គរាជទូតថ្មីប្រចាំកម្ពុជា បន្តពីលោកស្រី Angela Corcoran ដែលកាន់តួនាទីនេះតាំងពីឆ្នាំ២០១៦មក។

លោក Kang ជាមន្ត្រីជាន់ខ្ពស់ដែលបម្រើការនៅនាយកដ្ឋានការបរទេស និងពាណិជ្ជកម្មអូស្ត្រាលី ហើយធ្លាប់កាន់តំណែងជាឯកអគ្គរាជទូតអូស្ត្រាលីប្រចាំប្រទេសអេមីរ៉ាតអារ៉ាប់រួម ជាឧត្តមស្នងការប្រចាំប្រទេសវ៉ានូអាទូ និងជាកុងស៊ុលប្រចាំក្រុងម៉ានីល ផងដែរ។

លោកមានសញ្ញាបត្រសិល្បៈ និងច្បាប់ពីសាកលវិទ្យាល័យស៊ីដនី និងសញ្ញាបត្រជំនាញកិច្ចការបរទេស និងពាណិជ្ជកម្មពីសាកលវិទ្យាល័យ Monash៕