សង្គមអន្តរជាតិ
អន្តរជាតិ
រដ្ឋមន្ត្រីបរិស្ថានជប៉ុនប្រកាសសុំច្បាប់លំហែបិតុភាព ដើម្បីមើលកូនជំនួសភរិយា រដ្ឋមន្ត្រីបរិស្ថានជប៉ុន លោក Shinjiro Koizumi ប្រកាសយកច្បាប់លំហែបិតុភាព។ រូបថត AFP
× រដ្ឋមន្ត្រីជប៉ុន លោក Shinjiro Koizumi កាលពីថ្ងៃពុធ កន្លងមក បានប្រកាសថា លោកនឹងធ្វើជាគំរូគេ តាមរយៈការសុំច្បាប់លំហែរបិតុភាពដើម្បីមើលថែទាំកូនជំនួសភរិយា។ នេះបើតាមការផ្សាយរបស់ Reuters។
លោក Koizumi គឺជាកូនប្រុសរបស់អតីតនាយករដ្ឋមន្ត្រីជប៉ុន Junichiro Koizumi។ លោកបានលើកឡើងពីគម្រោងសុំច្បាប់លំហែបិតុភាពពី២សប្តាហ៍ ហើយអាចឈានដល់ទៅ៣ខែ ដើម្បីមើលថែទាំកូនដំបូងរបស់ខ្លួន។
នាយករដ្ឋមន្ត្រីជប៉ុន លោក Shinzo Abe តែងតែព្យាយាមជំរុញឲ្យបុរសក្នុងវិស័យរដ្ឋ និងឯកជន សុំច្បាប់លំហែបិតុភាព ជាពិសេសពង្រឹងតុល្យភាពជីវិតការងារ ក៏ដូចជាការពង្រឹងកម្មវិធី «Womenomics» ដែលលើកកម្ពស់ការចូលរួមរបស់ស្ត្រីក្នុងតួនាទីធំៗនៅកន្លែងការងារ។
លោក Koizumi បានបញ្ជាក់ថា លោកចង់ធ្វើជាគំរូដល់បុរសដទៃទៀត ប៉ុន្តែវាពិតជាមានការលំបាកសម្រាប់រូបលោក ដោយសារតែលោកមានទំនួលខុសត្រូវយ៉ាងច្រើន ក្នុងតួនាទី ជារដ្ឋមន្ត្រីម្នាក់ ដែលអាចខុសពីឪពុកទូទៅ។
ទិន្នន័យកន្លងមក បង្ហាញថា បុរស៨០ភាគរយដែលមានទំនួលខុសត្រូវខ្ពស់នៅស្ថាប័នការងារ បានលើកឡើងពីគម្រោងរបស់ខ្លួនក្នុងការយកច្បាប់លំហែបិតុភាព ប៉ុន្តែជាក់ស្តែង មានតែ៦ភាគរយប៉ុណ្ណោះ ដែលបានអនុវត្តតាមសំដីរបស់ខ្លួន៕
© រក្សាសិទ្ធិដោយ thmeythmey.com