ប្រជាពលរដ្ឋ១៥០គ្រួសារ ព្រួតគ្នាប្តឹងលោក អ៊ុំ រាត្រី អភិបាលខេត្តបន្ទាយមានជ័យ និងលោក បោន ប៉ិន មេបញ្ជាការកងរាជអាវុធហត្ថខេត្តបន្ទាយមានជ័យ រួមទាំងមនុស្ស៤នាក់ទៀត ពីបទសមគំនិតធ្វើមនុស្សឃាត និងប្រើអំពើហិង្សា លើពលរដ្ឋម្នាក់ឈ្មោះ ទុយ ស្រស់ រហូតដល់ស្លាប់។ ពួកគាត់ ធ្វើបណ្តឹងនេះ តាមរយៈតំណាង៣នាក់ ដោយមានផ្តិតមេដៃ កាលពីថ្ងៃទី១៤ ខែមករា ឆ្នាំ២០២០។
លោក រឿន លីណា ប្រធានលេខាធិការដ្ឋានរដ្ឋបាលតុលាការខេត្តបន្ទាយមានជ័យ ប្រាប់សារព័ត៌មានថ្មីៗ តាមទូរស័ព្ទ នៅថ្ងៃទី១៦ ខែមករាថា ប្រជាពលរដ្ឋ បានដាក់បណ្តឹងនេះ ទៅកាន់ព្រះរាជអាជ្ញាហើយ។ តែលោក មិនទាន់បានដឹងឡើយថា ព្រះរាជអាជ្ញា នឹងចាត់វិធានការឬដំណើរការនីតិវិធីយ៉ាងណានោះទេ ចំពោះបណ្តឹងនេះ។
លោក អ៊ុំ រាត្រី បដិសេធមិនបំភ្លឺអ្វីទាំងអស់ ក្នុងកិច្ចសម្ភាសតាមទូរស័ព្ទ ដោយលោក ខ្លាចយកសំឡេងរបស់លោក ទៅកាត់តមិនត្រឹមត្រូវតាមខ្លឹមសារ។ លោក ប្រាប់សារព័ត៌មានថ្មីៗថា លុះត្រាតែទៅជួបលោកផ្ទាល់ ទើបលោកអាចផ្តល់បទសម្ភាសជូនបាន ព្រមទាំងនឹងបង្ហាញភស្តុតាងនិងឯកសារនានា។
មនុស្ស៤នាក់ទៀត ដែលរងបណ្តឹងដដែលនោះ គឺ ប្រធាន-អនុប្រធានពាណិជ្ជកម្មខេត្តបន្ទាយមានជ័យ ប្រធានរដ្ឋបាលព្រៃឈើខេត្តបន្ទាយមានជ័យ និង ប្រធានពន្ធដាខេត្តបន្ទាយមានជ័យ។ ក្នុងបណ្តឹង ប្រជាពលរដ្ឋ រៀបរាប់ពីសាវតាររឿងថា លោក អ៊ុំ រាត្រី បានដឹកនាំកម្លាំងប្រដាប់អាវុធជាច្រើននាក់ ទៅឈូសឆាយ-ដក រោងនិងផ្ទះរបស់ពួកគាត់ កាលពីចុងខែធ្នូ ឆ្នាំ២០១៩។
ប្រជាពលរដ្ឋ អះអាងថា ពួកគាត់ បាននាំគ្នាទៅតវ៉ានៅមុខសាលាខេត្ត ដើម្បីរកដំណោះស្រាយ តែពេលនោះ លោក អ៊ុំ រាត្រី បាននាំកម្លាំងកងរាជអាវុធហត្ថ ទៅចាប់គ្នាពួកគាត់៥នាក់ ដោយចោទថា អ្នកទាំង៥នោះ ជាមេខ្លោង ដែលនាំគ្នាទៅយកដីស្ថានីយ៍ព្រៃឈើតាបែន២ នៅឃុំស្លក្រាម ឃុំសឹង ស្រុកអូរជ្រៅ និង ស្រុកស្វាយចេក ក្នុងខេត្តបន្ទាយមានជ័យ។ ប្រជាពលរដ្ឋ អះអាងទៀតថា អ្នកទាំង៥នោះ បានរងការធ្វើទារុណកម្ម រហូតដល់ស្លាប់ម្នាក់ឈ្មោះ ទុយ ស្រស់។
អ្នកទាំង៥នាក់ ត្រូវបានបញ្ជូនទៅឃុំនៅពន្ធនាគារ កាលពីថ្ងៃទី៣១ ខែធ្នូ ឆ្នាំ២០១៩។ តាមរយៈសេចក្តីប្រកាសព័ត៌មាន រដ្ឋបាលខេត្តបន្ទាយមានជ័យ លើកឡើងថា នៅថ្ងៃទី១ ខែមករា ជនរងគ្រោះឈ្មោះ ទុយ ស្រស់ បានស្លាប់ ពេលត្រូវបានបញ្ជូនទៅដល់មន្ទីរពេទ្យមិត្តភាពកម្ពុជា-ជប៉ុនមង្គលបូរី ដោយលទ្ធផលនៃការធ្វើកោសល្យវិច័យរបស់ការិយាល័យបច្ចេកទេសនិងវិទ្យាសាស្ត្ររបស់ស្នងការដ្ឋាននគរបាលខេត្តបន្ទាយមានជ័យ និងតាមការបំភ្លឺពីជនជាប់ចោទទាំង៤នាក់ ដែលជាគ្នីគ្នា បានអះអាងដូចគ្នា និងបានសន្និដ្ឋានថា ជនរងគ្រោះ «មានភាពមិនប្រក្រតី មានសុខភាពមិនល្អ និងញៀនស្រាដាច់មិនបាន...»។
សេចក្តីប្រកាសព័ត៌មានរបស់រដ្ឋបាលខេត្តបន្ទាយមានជ័យ ដែលធ្វើឡើងកាលពីថ្ងៃទី១ ខែមករា ឆ្នាំ២០២០ បានសរសេរទៀតថា មុនពេលស្លាប់ ក្រុមមន្ត្រីពន្ធនាគារខេត្តនិងក្រុមគ្រួសារជនរងគ្រោះ បានយកចិត្តទុកដាក់ជាខ្លាំង ដោយបានបញ្ជូនយកទៅមន្ទីរពេទ្យមិត្តភាពកម្ពុជា-ជប៉ុនមង្គលបូរី ប៉ុន្តែមិនអាចជួយសង្គ្រោះបានទាន់ពេលវេលា។
សម្តេចនាយករដ្ឋមន្ត្រី បញ្ជាឲ្យលោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា និង លោក សៅ សុខា មេបញ្ជាការកងរាជអាវុធហត្ថលើផ្ទៃប្រទេស ឲ្យរួមគ្នាបង្កើតគណៈកម្មការមួយ ដើម្បីស៊ើបអង្កេតករណីនេះ។ ក្នុងពិធីជួបសំណេះសំណាលប្រចាំឆ្នាំលើកទី៤ ជាមួយអ្នកកាសែត កាលពីថ្ងៃទី១៤ ខែមករា ប្រមុខរដ្ឋាភិបាល សង្កត់ធ្ងន់ថា បើជនរងគ្រោះ ពិតជាស្លាប់ដោយសារការធ្វើទារុណកម្មមែននោះ ត្រូវជាប់អ្នកប្រព្រឹត្តទៅផ្តន្ទាទោសឲ្យបាន។
ក្រោយការដាក់បញ្ជារបស់ប្រមុខរដ្ឋាភិបាល លោក សៅ សុខា ក៏បានបង្កើតគណៈកម្មការមួយភ្លាម ដើម្បីស៊ើបអង្កេតករណីនេះ។ លោក អេង ហ៊ី អ្នកនាំពាក្យកងរាជអាវុធហត្ថ ប្រាប់សារព័ត៌មានថ្មីៗថា បច្ចុប្បន្ន គណៈកម្មការ កំពុងស៊ើបអង្កេត តែលោក មិនអាចផ្តល់ព័ត៌មានលម្អិតបានឡើយ។ លោក និយាយបែបនេះថា៖«ក្នុងដំណាក់កាលស៊ើបអង្កេត និយាយមិនកើតទេ»៕