ក្រសួងបរិស្ថាន៖ ស្ថានភាពគុណភាពខ្យល់ មានការធ្លាក់ចុះគួរឲ្យបារម្ភ

ជាតិ

សង្គមជាតិ

ក្រសួងបរិស្ថាន៖ ស្ថានភាពគុណភាពខ្យល់ មានការធ្លាក់ចុះគួរឲ្យបារម្ភ

17, Jan 2020 , 8:25 pm

រូបភាព

ដោយ: ប៉ូ សាគុន

ភ្នំពេញ៖ ស្ថានភាពគុណភាពខ្យល់មានការធ្លាក់ចុះគួរឱ្យបារម្ភ ជាពិសេសកំហាប់ប៉ារ៉ាម៉ែត្រភាគល្អិតនិចល PM10 និង PM2.5 មានការកើនឡើងលើសកំណត់ស្ដង់ដារ ដែលជាហានិភ័យបង្កការប៉ះពាល់ ចំពោះសុខភាពប្រជាពលរដ្ឋ។ នេះបើយោងតាមលទ្ធផលនៃការអង្កេតតាមដានគុណភាពខ្យល់ពីស្ថានីយត្រួតពិនិត្យគុណភាព ដែលក្រសួងបរិស្ថានបានដំឡើងនៅតាមបណ្ដារាជធានី ខេត្ត ទូទាំងប្រទេស។ ដើម្បីកែលម្អគុណភាពខ្យល់ ក្រសួងបរិស្ថាន នៅថ្ងៃទី១៧ខែមករានេះ បានជូនដំណឹងដល់រដ្ឋបាលថ្នាក់ក្រោមជាតិ និងមន្ទីរបរិស្ថានរាជធានី ខេត្ត ឱ្យចាត់វិធានការមួយចំនួន។

បើតាមសេចក្ដីប្រកាសព័ត៌មានក្រសួងបរិស្ថាន ប្រភពនិងសកម្មភាពសំខាន់ៗ ដែលជាហេតុបង្កឱ្យមានកំហាប់ភាគល្អិតនិចល PM10 និង PM2.5 កើនឡើងនេះ មានដូចជា ការបញ្ចេញផ្សែងពីរោងចក្រឧស្សាហកម្ម ពីយានយន្តប្រើប្រាស់ប្រេងម៉ាស៊ូត និងពីចំហេះឥន្ទនៈផ្សេងទៀត, ពីភ្លើងឆេះព្រៃ ការដុតរានព្រៃ ការដុតវាលស្មៅ ការដុតគល់ជញ្ជ្រាំង ការដុតសំរាម ការដុតសំណល់រឹងនៅតាមទីចំហ និងទីលានចាក់សំណល់ ការដ្ឋានសំណង់ជាដើម។

ក្រសួងបរិស្ថាន ណែនាំឲ្យរដ្ឋបាលថ្នាក់ក្រោមជាតិ និងមន្ទីរបរិស្ថានរាជធានី ខេត្ត មានតួនាទីចាត់វិធានការទប់ស្កាត់ភ្លើងឆេះព្រៃ និងការដុតសំរាម សំណល់រឹងនៅតាមទីចំហ ការឆេះនៅតាមទីលានចាក់សំរាម។ ក្រសួងណែនាំឲ្យចាត់វិធានការទប់ស្កាត់ការហុយធូលីពីការដ្ឋានសំណង់ និងការដ្ឋានកែលម្អហេដ្ឋារចនាសម្ព័ន្ធ និងធូលីហុយនៅតាមដងផ្លូវ។ អាជ្ញាធរ និងអ្នកពាក់ព័ន្ធ ត្រូវសម្អាតអនាម័យនៅតាមដងផ្លូវ និងទីសាធារណៈ និងត្រូវអប់រំប្រជាពលរដ្ឋកុំឱ្យដុតសំរាម សំណល់រឹង ដុតស្មៅ គល់ជញ្ជ្រាំង និងសំណល់កសិកម្មផ្សេងៗទៀត៕