អន្តរជាតិ
រូបភាព Xinhua
×![]()
ដោយ: តន ចាន់រិទ្ធារ៉ា
ប្រធានាធិបតីអាមេរិក ដូណាល់ ត្រាំ នៅថ្ងៃទី១៧ ខែមករា បានផ្ញើសារព្រមានមេដឹកនាំកំពូលអ៊ីរ៉ង់ អាយ៉ាតូឡាហ៍ អាលី ខាមេណី ឲ្យប្រយ័ត្នប្រយែងសម្ដីរបស់ខ្លួន បន្ទាប់ពីមេដឹកនាំអ៊ីរ៉ង់រូបប្រើពាក្យមិនល្អដាក់អាមេរិក និងអឺរ៉ុប។ ក្នុងកម្មវិធីសូត្រធម៌ប្រចាំសប្ដាហ៍នៅថ្ងៃសុក្រ លោក ខាមេណី បានប្រកាសបន្តគាំទ្រកងឆ្មាំបដិវត្តន៍ដែលបាញ់ទម្លាក់យន្តហោះអ៊ុយក្រែនដោយអចេតនា និងថែមទាំងហៅថ្នាក់ដឹកនាំអាមេរិកជាមនុស្សត្លុកទៅទៀត។
មេដឹកនាំកំពូលរបស់អ៊ីរ៉ង់ អាយ៉ាតូឡាហ៍ អាលី ខាមេណី និងប្រធានាធិបតីអាមេរិក ដូណាល់ ត្រាំ បានផ្លោងសម្ដីដាក់គ្នាទៅវិញទៅមក ខណៈដែលទំនាក់ទំនងរវាងគូសត្រូវទាំងពីរធ្លាក់ចុះកាន់តែខ្លាំងទៅៗក្រោយការសម្លាប់ឧត្តមសេនីយ៍ Qassem Soleimani នៅអ៊ីរ៉ង់ ការផ្លោងមីស៊ីលដាក់បន្ទាយទ័ពអ៊ីរ៉ាក់ និងការបាញ់ទម្លាក់យន្តហោះដឹកអ្នកដំណើរអ៊ុយក្រែនដោយភាន់ច្រឡំពីសំណាក់អង្គភាពចំណុះកងឆ្មាំបដិវត្តន៍អ៊ីរ៉ង់នោះ។
អំឡុងពិធីសូត្រធម៌នៅថ្ងៃទី១៧ មេដឹកនាំសាសនារបស់អ៊ីរ៉ង់ លោក ខាមេណី បាននិយាយវាយប្រហារអាមេរិកចំៗជុំវិញការសម្លាប់លោក Soleimani កាលពីដើមខែមករានេះ។ ដោយសំដៅដល់ការបាញ់មីស៊ីលដាក់បន្ទាយទ័ពអ៊ីរ៉ាក់ដែលមានទ័ពអាមេរិកឈរជើងលោកអះអាងថា អ៊ីរ៉ង់មានកម្លាំងទះកំផ្លៀងមហាអំណាចអាមេរិកដើម្បីសងសឹកឲ្យមេទ័ពរបស់ខ្លួន។ លោក ខាមេណី ក៏បន្តប្រកាសការគាំទ្រកងឆ្មាំបដិវត្តន៍ផងដែរ។
ប្រមុខដឹកនាំកំពូលរូបនេះ ក៏បន្តរិះគន់អាមេរិកដែលប្រកាសគាំទ្របាតុករអ៊ីរ៉ង់ដ ដោយហៅរដ្ឋមន្ត្រីការបរទេអាមេរិក ម៉ៃ ប៉ុមប៉េអូ ជាមនុស្សត្លុកទៅទៀត និងថា ការប្រកាសគាំទ្ររបស់អាមេរិក ជារឿងពិសពុល។ លោក ខាមេណី ក៏និយាយរឿងយន្តហោះអ៊ុយក្រែនដែលត្រូវឆ្មាំបដិវត្តន៍បាញ់ទម្លាក់។ បើតាមការផ្សាយរបស់ទីភ្នាក់ងារព័ត៌មាន Reuters លោក ខាមេណី លើកឡើងថា ពួកគេសប្បាយចិត្ត ពេលអ៊ីរ៉ង់សោកសៅ ហើយយករឿងនេះ ដើម្បីវាយប្រហារអ៊ីរ៉ង់ទៅទៀត។
មិនទុកយូរឡើយ លោក ត្រាំ ក៏ចេញមុខប្រតិកម្មតបសម្ដីលោក ខាមេណី ។ នៅបណ្ដាញសង្គម Twitter របស់ខ្លួន លោក ត្រាំ បានព្រមានមេដឹកនាំអ៊ីរ៉ង់ឲ្យប្រយ័ត្នប្រយែងការប្រើប្រាស់សម្ដីរបស់ខ្លួន។ លោកសរសេរថា៖ «មេដឹកនាំកំពូលអ៊ីរ៉ង់ណាមួយនោះ ដែលចុងក្រោយនេះមិនមែនកំពូលអីទៀតទេ បានប្រើសម្ដីមិនល្អដាក់អាមេរិក និងអឺរ៉ុប។ សេដ្ឋកិច្ចអ៊ីរ៉ង់កំពុងវឹកវរ ហើយប្រជាជនកំពុងរងគ្រោះ។ គាត់គួរតែប្រយ័ត្នឲ្យច្រើននឹងសម្ដីរបស់ខ្លួន។»
មិនចប់ត្រឹមនេះឡើយ លោក ត្រាំ ក៏បន្តចែករំលែកលើ Twitter បង្ហាញការគាំទ្រដល់បាតុករអ៊ីរ៉ង់ ដែលលោកអះអាងថា សក្តិសមទទួលបានរដ្ឋាភិបាលមួយដែលល្អ និងជួយសម្រេចក្ដីសុបិនជាជាងសម្លាប់មនុស្ស។ «ជំនួសឲ្យការដឹកនាំអ៊ីរ៉ង់ទៅរកភាពខ្ទេចខ្ទី មេដឹកនាំអ៊ីរ៉ង់គួរតែបោះបង់គំនិតភេរវកម្ម និងធ្វើឲ្យអ៊ីរ៉ង់អស្ចារ្យឡើងវិញម្ដងទៀតប្រសើរជាង។» នេះជាការផ្ដល់យោបល់របស់លោក ត្រាំ ឲ្យលោក ខាមេណី ៕
Tag:
អាមេរិក
អ៊ីរ៉ង់
ដូណាល់ ត្រាំ
ខាមេណី
© រក្សាសិទ្ធិដោយ thmeythmey.com
