អន្តរជាតិ
អាជ្ញាធរកូរ៉េខាងត្បូង រកឃើញករណីទី១នៃជំងឺរលាកសួតដែលផ្ទុះនៅវូហាន ប្រភពរូប៖ ទីភ្នាក់ងារព័ត៌មាន Yonhap
× អាជ្ញាធរកូរ៉េខាងត្បូង បានរាយការណ៍នៅថ្ងៃចន្ទ ២០ មករាថា ខ្លួនបានរកឃើញករណីជំងឺរលាកសួតប្រភេទថ្មី ជាលើកដំបូង ដែលបានផ្ទុះឡើងក្នុងប្រទេសចិន។ កូរ៉េខាងត្បូង ជាប្រទេសទី៣ហើយដែលរកឃើញករណីជំងឺនេះ បន្ទាប់ពីប្រទេសជប៉ុន និងថៃ ។
អ្នកជំងឺដែលមានផ្ទុកជំងឺរលាកសួតដែលមិនទាន់មានអត្តសញ្ញាណ គឺជាស្ត្រីជនជាតិចិនអាយុ ៣៥ឆ្នាំ និងមានទីលំនៅបច្ចុប្បន្នក្នុងទីក្រុងវូហាន ភាគកណ្ដាលប្រទេសចិន។ ស្ត្រីរូបនេះ បានធ្វើដំណើរតាមយន្តហោះពីទីក្រុង វូហាន ទៅកាន់ព្រលានយន្តហោះអន្តរជាតិ Incheon កាលពីថ្ងៃអាទិត្យ ១៩ ខែមករា។ នេះបើតាមសេចក្តីថ្លែងការណ៍របស់មជ្ឈមណ្ឌលគ្រប់គ្រងនិងបង្ការជំងឺរបស់កូរ៉េខាងត្បូង (KCDC) ។
ស្ត្រីរូបនេះ ត្រូវបានដាក់ឲ្យនៅដោយឡែក ខណៈនាងមានអាការៈក្តៅខ្លួនខ្លាំង និងមានបញ្ហាផ្លូវដង្ហើម។ ហើយក្រោយការធ្វើតេស្តរួច ទើបដឹងថា នាងពិតជាមានផ្ទុះវីរុសប្រភេទថ្មី (អំបូរកូរ៉ូណាវីរុស) នេះមែន។ តាមការចុះផ្សាយរបស់ទីភ្នាក់ព័ត៌មាន Yonhap ភ្នាក់ងារសុវត្ថិភាពនិងសុខភាពសាធារណៈរបស់ប្រទេសនេះ បានបញ្ជាក់ថា ស្ត្រីរូបនេះ បានធ្វើដំណើរទៅកាន់ទីក្រុងវូហាន វិញ កាលពីសប្តាហ៍មុន។ អ្នកជំងឺរូបនេះ ទទួលបានការព្យាបាលនៅឯមន្ទីរពេទ្យក្នុងស្រុកមួយ ។
ភ្នាក់ងារ KCDC នេះ បានបង្កើនកម្រិតប្រកាសអាសន្ននៃការឆ្លងពីការយកចិត្តទុកដាក់ដល់ការប្រុងប្រយ័ត្ន បន្ទាប់ពីមានករណីដំបូងនៃវីរុស ហើយក៏ពង្រីកការតាមដានផងដែរ។ អភិបាលក្រុងនិងខេត្តរបស់ប្រទេសកូរ៉េខាងត្បូង នឹងដំណើរការប្រព័ន្ធដាក់ឲ្យនៅដាច់ពីគ្នាជាបន្ទាន់ក្នុងមួយម៉ោងខ្លះ ដូចជា ក្នុងឱកាសវិស្សមកាលបុណ្យចូលឆ្នាំថ្មី ដែលនឹងចាប់ផ្តើមនៅចុងសប្តាហ៍នេះ។
ខណៈថ្ងៃចូលឆ្នាំប្រពៃណីចិនកាន់តែខិតជិតចូលមកដល់ ករណីជំងឺរលាកសួតមិនមានអត្តសញ្ញាណ នៅថ្ងៃទី២០ ខែមករា ត្រូវបានគេរាយការណ៍ថា កើនឡើងរហូតដល់ ១៣៩ករណី នៅទូទាំងប្រទេសចិនទាំងមូល។ គ្រាន់តែនៅក្នុងក្រុងវូហាន អ្នកជំងឺរលាកសួតប្រភេទនេះមានចំនួន ១៣៦ករណី ប៉េកាំង ២ករណី និងខេត្តគ័ងតុង មួយករណី។
សូមបញ្ជាក់ថា វីរុសថ្មី ដែលជាពពូជ កូរ៉ូណាវីរុស (coronavirus) មិនត្រឹមតែរកឃើញនៅពេលចិនទេ ប៉ុន្តែថ្មីៗនេះ គេបានរកឃើញអ្នកជំងឺផ្ទុកវីរុសនេះនៅជប៉ុនម្នាក់ និងថៃពីរនាក់ ខណៈពេលប្រទេសផ្សេងៗទៀត កំពុងព្រួយបារម្ភពីបញ្ហា និងណែនាំឲ្យប្រជាពលរដ្ឋរបស់ខ្លួនប្រុងប្រយ័ត្ន និងកុំធ្វើដំណើរទៅក្រុងវូហាន ប្រទេសចិន៕
Tag:
កូរ៉េខាងត្បូង
ជំងឺរលាកសួតវូហាន
© រក្សាសិទ្ធិដោយ thmeythmey.com