អន្តរជាតិ
លោក មហាធៀ ថា រដ្ឋាភិបាលនឹងចាញ់ឆ្នោតអាណត្តិក្រោយ បើមិនដោះស្រាយជម្លោះផ្ទៃក្នុង
× នាយករដ្ឋមន្ត្រីម៉ាឡេស៊ី មហាធៀ មហាម៉ាត់ នៅថ្ងៃទី២០ ខែមករា បានព្រមានថា រដ្ឋាភិបាលបច្ចប្បន្ន នឹងចាញ់ក្នុងការបោះឆ្នោតលើក្រោយ ប្រសិនបើមានការផ្លាស់ប្ដូរទេនោះ។ លោក មហាធៀ ព្រមានបែបនេះ ក្រោយសម្ពន្ធភាពកាន់អំណាចបច្ចុប្បន្ន បានរងបរាជ័យផ្ទួនៗក្នុងការបោះឆ្នោតបំពេញបន្ថែមសមាជិកសភា។ លោក មហាធៀ ថែមទាំងមិនសូវជឿជាក់លើសមត្ថភាពរបស់មេដឹកនាំជំនាន់ក្រោយរបស់ម៉ាឡេស៊ីទៅទៀត។
បរាជ័យ៥ដងក្នុងការបោះឆ្នោតបំពេញបន្ថែមសមាជិកសភា កំពុងធ្វើឲ្យនាយករដ្ឋមន្ត្រី មហាធៀ មហាម៉ាត់ ខ្វល់ខ្វាយពីអនាគតសម្ពន្ធភាពកាន់អំណាចរបស់លោក។ លោក មហាធៀ ក៏ថែមទាំងព្រមានថា រដ្ឋាភិបាលរបស់លោក អាចដឹកនាំប្រទេសបានតែមួយអាណត្តិនេះប៉ុណ្ណោះ។ ប្រាប់អ្នកសារព័ត៌មានថ្ងៃទី២០ ខែមករា នៅទីក្រុងឡាំកាវី លោក មហាធៀ បញ្ជាក់ថា ប្រសិនបើគ្មានការផ្លាស់ប្ដូរដុំកំភួនអ្វីនោះ សម្ព័ន្ធភាព Pakatan Harapan នឹងបរាជ័យមិនខាន។
សម្ពន្ធភាព Pakatan Harapan ដែលមានន័យថា សម្ពន្ធភាពនៃក្ដីសង្ឃឹម បានផ្ដួលសម្ពន្ធភាពកាន់អំណាច Barisan Nasional ក្នុងការបោះឆ្នោតឆ្នាំ២០១៨ ។ លោក មហាធៀ ដែលធ្លាប់ដឹកនាំសម្ពន្ធនេះជាច្រើនឆ្នាំ បានចាប់ដៃអតីតគូសត្រូវ និងមន្ត្រីក្រោមបង្គាប់លោក អាន់វ៉ា អ៊ីប្រាហ៊ីម ដើម្បីបង្កើតសម្ពភាព Pakatan Harapan ហើយក៏យកឈ្នះអតីតបក្សនយោបាយរបស់ខ្លួន ខណៈលោកក្លាយជានាយករដ្ឋមន្ត្រីដល់សព្វថ្ងៃ។
យ៉ាងណាមិញ សម្ពភាពកាន់អំណាចរបស់លោក មហាធៀ បានរងបរាជ័យផ្ទួនៗក្នុងការបោះឆ្នោតដើម្បីជ្រើសរើសសមាជិកសភាពបំពេញកៅអីដែលទំនេរ។ ចុងក្រោយនេះ សម្ពន្ធភាពនេះ ចាញ់ឆ្នោតនៅឯមណ្ឌលមួយក្នុងរដ្ឋ Sabah ។ បើតាមទីភ្នាក់ងារព័ត៌មាន Reuters លោក មហាធៀ អះអាងថា លោកនឹងបើកការត្រួតពិនិត្យដើម្បីរកហេតុផលនៃបរាជ័យនេះ។
«យើងបានចាញ់ការបោះឆ្នោតបំពេញបន្ថែមចំនួន៥ ប៉ុន្តែពួកគេនៅតែមិនយល់ដដែល។» នេះជាសម្ដីរបស់លោក មហាធៀ ប្រាប់អ្នកសារព័ត៌មាន ដែលបន្តថា លោកបានប្រាប់មន្ត្រីពីគោលការណ៍ប្រជាធិបតេយ្យដែលត្រូវការការគាំទ្រពីប្រជាជន។ បើតាមលោក មហាធៀ មន្ត្រីបក្សកាន់អំណាច បានទាស់ទែងគ្នា និងបង្កការបែងចែកក្នុងចំណោមប្រជាជន ដែលការណ៍នេះនឹងធ្វើឲ្យបក្សកាន់អំណាចបរាជ័យ បើមិនផ្លាស់ប្ដូរទេនោះ។
នាយករដ្ឋមន្ត្រីវ័យ៩៤ឆ្នាំរូបនេះ ទំនងចង់សំដៅដល់ទំនាស់ផ្ទៃក្នុងសម្ពន្ធភាពកាន់អំណាចលើបេក្ខជនដែលត្រូវស្នងតំណែងបន្តពីលោក។ តាមកិច្ចព្រមព្រៀង លោក អាន់វ៉ា ជាអ្នកត្រូវធ្វើនាយករដ្ឋមន្ត្រីបន្តពីលោក មហាធៀ ដែលកាន់តំណែងពីរបីឆ្នាំសិន។ ប៉ុន្តែរដ្ឋមន្ត្រីសេដ្ឋកិច្ច អាស្មីន អាលី ដែលមកពីបក្សតែមួយនឹងលោក អាន់វ៉ា នោះ ក៏ត្រូវបានមើលឃើញថា ជាបេក្ខភាពមួយដែរ។ លោក អាស្មីន និងលោក អាន់វ៉ា កំពុងមិនត្រូវគ្នា។ វាទំនងជាមូលហេតុមួយដែលប្រជាជនលែងគាំទ្របក្សនេះទៀត៕
Tag:
ម៉ាឡេស៊ី
មហាធៀ មហាម៉ាត់
© រក្សាសិទ្ធិដោយ thmeythmey.com