អន្តរជាតិ
ចិន ដាក់ចេញវិធានការហាមឃាត់ការប្រើប្រាស់ប្លាស្ទិកនៅឆ្នាំ២០២៥ ផលិតផលប្លាស្ទិក។ រូបភាព៖ foxbusiness
× គណៈកម្មការកំណែទម្រង់ និងអភិវឌ្ឍន៍ជាតិ និងក្រសួងបរិស្ថាន និងអេកូឡូស៊ីចិន នៅថ្ងៃទី១៩ ខែមករា បានលើកឡើងថា ចិនបានឈានជើងមួយជំហានទៀត ក្នុងការរឹតបន្តឹងការប្រើប្រាស់ប្លាស្ទិកត្រឹមតែមួយដង ហើយបោះចោល។ វិធានការរបស់រដ្ឋាភិបាលចិននៅពេលនេះ គឺដើម្បីចូលរួមកាត់បន្ថយការប្រើប្រាស់ប្លាស្ទិក និងដោះស្រាយបញ្ហាបរិស្ថាននៅក្នុងប្រទេស។
បន្ទាប់ពីចំណាត់ការហាមឃាត់នាំចូលសម្រាមពីបរទេស តាមរយៈគោលនយោបាយ «ដាវជាតិ» កាលពីដើមឆ្នាំ២០១៨ ពេលនេះចិន បានឈានមួយជំហានទៀត ទៅរកវិធានការហាមឃាត់ការប្រើប្រាស់ប្លាស្ទិកត្រឹមតែមួយលើករួចបោះចោល។ វិធានការរបស់ចិននៅពេលនេះ គឺចូលរួមកាត់បន្ថយការដុតសម្រាម និងការចាក់សម្រាមចូលទៅក្នុងទន្លេជាដើម។
គោលនយោបាយថ្មីមួយ ត្រូវបានតាក់តែងឡើងដោយ គណៈកម្មការកំណែទម្រង់ និងអភិវឌ្ឍជាតិ និងក្រសួងបរិស្ថាន និងអេកូឡូស៊ី នឹងរឹតត្បិតការប្រើប្រាស់ថង់ប្លាស្ទិកនៅទីក្រុងសំខាន់ៗទាំងអស់របស់ចិននៅចុងឆ្នាំ ២០២០ និងក្រុងផ្សេងៗទៀត នៅឆ្នាំ២០២២។ ចំណែកផលិតផលប្លាស្ទិកផ្សេងទៀត ក៏ត្រូវបានហាមឃាត់ផងដែរ។
ក្នុងនោះភោជនីយដ្ឋានទាំងអស់ ត្រូវបានហាមឃាត់ប្រើប្រាស់បំពង់បឺតប្លាស្ទិក នៅចុងឆ្នាំ ២០២០ ហើយនៅឆ្នាំ ២០២៥ ភោជនីយដ្ឋានទាំងអស់ ត្រូវតែកាត់បន្ថយការប្រើប្រាស់ប្លាស្ទិកត្រឹមតែមួយដងរួចបោះចោលឲ្យបាន ៣០ភាគរយ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ក្រៅពីទីក្រុងធំៗ ចិនក៏បានហាមឃាត់ថង់ប្លាស្ទិក ដែលមានកម្រាស់ ០,០២៥មីលីម៉ែត្រ ខណៈថង់ប្លាស្ទិក ដែលមានកម្រាស់ ០,០១មីលីម៉ែត្រ អាចប្រើប្រាស់បានត្រឹមតែលើវិស័យកសិកម្មតែប៉ុណ្ណោះ។ បន្ថែមពីនេះ តំបន់ផ្សេងទៀតនៅក្នុងប្រទេសចិន ក៏ត្រូវបានហាមឃាត់ដែរ ប៉ុន្តែគេមិនទាន់ដឹងច្បាស់នៅឡើយទេ។
យ៉ាងណាក៏ដោយ គោលនយោបាយថ្មីនេះ ក៏មានករណីលើកលែងផងដែររហូតដល់ឆ្នាំ ២០២៥ ចំពោះអ្នកលក់ និងអ្នកទិញមួយចំនួន។ ករណីលើកលែងនេះ គឺធ្វើឡើងតែចំពោះផ្សារ ឬហាង ដែលលក់ម្ហូប ឬអាហារស្រស់ៗតែប៉ុណ្ណោះ ៕
© រក្សាសិទ្ធិដោយ thmeythmey.com