បទយកការណ៍ / បទសម្ភាសន៍
ជាតិ
សង្គមជាតិ
បទយកការណ៍៖ យុវវ័យមួយចំនួនថា គ្មាន iPhone ក្នុងដៃ គឺមិនទាន់សម័យ
× ហួសហើយសម័យ អិនចុចពិល ឫក៏ទូរស័ព្ទស្មាតហ្វូនស៊េរីទាបៗ ។ បច្ចេកវិទ្យាកាន់តែទំនើប ធ្វើឲ្យមនុស្សកាន់តែមានការចំណាយច្រើនដើម្បីដើរឲ្យទាន់សម័យកាល។ ទូរស័ព្ទដៃ iPhone Samsung Galaxy ឬ iPad ជាដើមនោះ បានក្លាយសម្ភារដ៏ពេញនិយមសម្រាប់យុវជនកម្ពុជានៅសម័យទំនើបនេះ។
ខណៈក្រុមហ៊ុន Apple បានប្រកាសលក់ iPhone 5s និង iPhone 5c កាលពីពេលថ្មីៗកន្លងមកនេះ មនុស្សម្នាជាច្រើនបាននាំគ្នាដេកដាំដណ្តើមគ្នាទិញនៅហាង Apple Store នានាក្នុងពិភពលោក រីឯយុវជនកាលីបមួយចំនួននៅកម្ពុជាក៏រង់ចាំយ៉ាងអន្ទះសារផងដែរ។
ការប្រើប្រាស់របស់ទំនើបត្រូវបានគេចាត់ទុកថា ជាការសំញ៉ែងភាពទាន់សម័យ ប៉ុន្តែស្របពេលជាមួយគ្នានេះ វាក៏ផ្តល់នូវអត្ថប្រយោជន៍ជាច្រើនផងដែរ។ មនុស្សភាគច្រើននិយាយថា មានរបស់ទំនើបប្រើ ហាក់បីដូចជាពិភពលោកទាំងមូលស្ថិតនៅក្នុងដៃ។ ដោយឡែកមនុស្សមួយចំនួនទៀត មិនបានប្រើប្រាស់សម្ភារទំនើបៗទាំងនោះឲ្យអស់លទ្ធភាពនោះទេ ពួកគេគ្រាន់តែទិញរបស់ទាំងនោះប្រើតាមគ្នា ដើម្បីបង្អួតមិត្តភ័ក្តិ និងលេងហ្គេមកំសាន្តតែប៉ុណ្ណោះ។
អ្នកសម្បូរធនធានមួយចំនួន ហ៊ានចំណាយធនធានយ៉ាងច្រើន ដើម្បីប្រើទូរស័ព្ទដៃទំនើបៗ ពីរ បី ម្នាក់ឯង ដោយគិតថា សម្ភារទាំងនោះហើយ ដែលធ្វើឲ្យពួកគេក្លាយជាមនុស្សទាន់សម័យ និងអាចទាក់ទាញការចាប់អារម្មណ៍ពីសំណាក់អ្នកដែលនៅជុំវិញខ្លួនផងដែរ។
កំពុងអង្គុយរង់ចាំមិត្តភ័ក្តិនៅក្នុងហាងកាហ្វេមួយកន្លែង យុវជន ចាន់ រតនា ដាក់ទូរស័ព្ទ iPhone ពីរ គ្រឿងនៅតុ ហើយដក iPad mini មួយគ្រឿងទៀតយកមកលេងហ្គេម។ លោក រតនា បានឲ្យដឹងថា ៖ « សម័យនេះទៅហើយបើយើងមិនមានពួកវាទេច្បាស់ជាចាញ់គេហើយ មិនទាន់សម័យទេ មិត្តភ័ក្តិខ្ញុំ គេសុទ្ធតែប្រើគ្រប់គ្នា។ ប៉ា ម៉ាក់ របស់ខ្ញុំក៏គាត់មានម្នាក់មួយដែរទុកគ្រាន់លេងហ្គែមកំសាន្តពេលអផ្សុក»។
អ្នកមួយចំនួនចូលចិត្តសំញ៉ែងសម្ភារៈទំនើប នៅតាមទីសាធារណៈ ជាជាងទុកវាស្ងាមនៅក្នុងហោប៉ៅ ឫក្នុងកាបូប។ ដើម្បីទាក់ទាញការចាប់អារម្មណ៍ យុវជនវ័យ២៨ឆ្នាំ ដែលតែងទៅអង្គុយនៅម៉ាតរៀងរាល់ល្ងាច លោក មាស សេង បានលើកឡើងថា៖ «ខ្ញុំចូលចិត្តអង្គុយលេងហ្គេមនៅម៉ាត ជាងនៅផ្ទះ បានមកទីនេះមើលគេឯងបណ្តើរ លេងហ្គែមបណ្តើរ ខ្ញុំមើលគេ គេមើលខ្ញុំ មានអារម្មណ៍សប្បាយម្យ៉ាងដែរ ខ្ញុំលេងរហូតដល់ទូរស័ព្ទអស់ថ្មទើបឈប់»។
នៅមិនឆ្ងាយប៉ុន្មានពី លោក សេង យុវជនមួយក្រុមទៀត កំពុងអង្គុយជុំវិញតុមួយ អ្នកខ្លះកាន់ទូរស័ព្ទ អ្នកខ្លះទៀតកាន់ iPad ពួកគេតែងបន្លឺសម្លេងសើចខ្លាំងៗ ឫពាក្យសម្តីលែបខាយ ខណៈមាននារីៗធ្វើ ដំណើរឆ្លងកាត់។
រីឯអ្នកដែលមិនសូវមានធនធានឯណោះវិញ ក៏ខិតខំត្បិតត្បៀតលុយកាក់ដើម្បីសន្សំទិញ ទូរស័ព្ទទំនើបនឹងគេផងដែរ ព្រោះខ្លាចមិនទាន់សម័យ។
យុវជន ហេង វុទ្ធី ខំសន្សំលុយរាប់ខែទម្រាំដាច់ចិត្តទិញទូរស័ព្ទ iPhone ស៊េរីថ្មី។ យុវជនវ័យ២៣ឆ្នាំ ជានិស្សិតរូបនេះ បានឲ្យដឹងថា៖ «ខ្ញុំទិញវាដើម្បីងាយស្រួលស្រាវជ្រាវមេរៀន និងតាមដានព័ត៌មាន»។
វុទ្ធី បន្ថែមទៀតថា៖« ណាមួយមានវាកាលីបម្យ៉ាងដែរ ទៅណាមកណារៀងចុះចំណោមគេ ពេលខ្ញុំដកវាចេញពីហោប៉ៅម្តងៗ មិត្តស្រីៗរៀនជាមួយគ្នា ក៏ចោលកន្ទុយភ្នែកលួចមើលខ្ញុំផងដែរ»។
ក្រៅពីស្តាប់ចំរៀង ថតរូប និងលេងហ្វេសបុក លោក សុខ ដារ៉ា ជាបុគ្គលិកក្នុងសណ្ឋាគារម្នាក់ បាននិយាយយ៉ាងខ្លីថា៖ «ខ្ញុំទិញiPadនេះ ទុកគ្រាន់លេងហ្គេម និងចង់ឲ្យគេដឹងថាខ្ញុំធ្លាប់បានប្រើវាតែប៉ុណ្ណឹង»។
ដោយឃើញមិត្តភ័ក្តិគេប្រើសុទ្ធតែ iPhone អស់ហើយ យុវវតីមួយចំនួនក៏ត្រូវតែដូរទូរស័ព្ទស៊េរីថ្មីផងដែរ ដើម្បីកុំឲ្យខ្មាស់គេ។ យុវតីមួយចំនួនចូលចិត្តកាន់ទូរស័ព្ទត្រួតគ្នា ពីរ បី ជាជាងដាក់នៅក្នុងកាបូប។
ធ្វើដំណើរចុះពីរថយន្ត ចូលទិញកាហ្វេនៅម៉ាតមួយកន្លែង ដៃម្ខាងស្បាយកាបូប ដៃម្ខាងកាន់ទូរស័ព្ទ iPhone ពីរគ្រឿង កញ្ញា រដ្ឋា វ័យ២០ឆ្នាំ ជានិស្សិត បានលើកឡើងថា៖ «បើទិញវាមកដាក់ក្នុង កាបូបដដែល មានន័យអី មិត្តភ័ក្តិតែងសរសើរថាឡូយ ស័ក្តសមនឹង សំពត់ខ្លី ស្បែកជើងកែងចោទ របស់ខ្ញុំណាស់។ សូម្បីបុរសៗដែលអង្គុយនៅតុខាងក្រៅ ក៏មើលមិនដាក់ភ្នែកដែរ»។
ជានិស្សិតឆ្នាំទី៤ ក៏ជាអ្នកទាន់សម័យម្នាក់ដែរនោះ កញ្ញា សុខ លីម ម្នាក់ទៀត បានឲ្យដឹងថា៖ «ទូរស័ព្ទដែលខ្ញុំប្រើមានតំលៃជិត១ពាន់ដុល្លា ទោះបីវាថ្លៃបន្តិចមែន តែខ្ញុំមិនស្តាយទេ ព្រោះវាផ្តល់អត្ថប្រយោជន៍ច្រើន។ ខ្ញុំអាចស្វែងរកមេរៀនតាមអ៊ីនធឺណែត អាចមើលទូរទស្សន៍ អាចទំនាក់ទំនងជាមួយមិត្តភ័ក្តិបានយ៉ាងងាយ។ មិនតែប៉ុណ្ណោះ ពេលខ្ញុំលើកនិយាយម្តងៗ គេថាសក្តិសមនឹងខ្ញុំណាស់»។
លោក ចាន់ សុផល ជាបុគ្គលិកមន្ត្រីរាជការម្នាក់ ក៏បានឲ្យដឹងដែរថា សម័យឥឡូវទាំងចាស់ ទាំងក្មេង កំពុងឆ្លក់វង្វេងនឹងទូរស័ព្ទទំនើបនេះខ្លាំងណាស់។ បុរសវ័យ៤៥ឆ្នាំរូបនេះ បានលើកឡើងថា៖ «មិត្តភ័ក្តិនៅកន្លែងធ្វើការជាមួយគ្នាមួយចំនួន ដល់ម៉ោងសម្រាកមិនទាន់ទេ ដកយកទូរស័ព្ទមកលេងហ្គែមភ្លាម ។ លោកបានបន្ថែមទៀតថា៖ «សព្វថ្ងៃនេះកូនប្រុសរបស់ខ្ញុំ ក៏កំពុងរុំអុកឲ្យទិញទូរស័ព្ទទំនើបឲ្យមួយផងដែរ។ ខ្ញុំគ្មានលុយទិញឲ្យវាទេ ថ្លៃណាស់»។
និន្នាការខាងលើនេះក៏បាបជះឥទ្ធិពលអាក្រក់ផងដែរ ដល់យុវជន យុវតីមួយចំនួន ឲ្យភ្លើតភ្លើននឹងសម្ភារនិយម ហើយក៏អាចឈានរហូតប្រព្រឹត្តិអំពើរអសីលធម៌ និងអំពើរខុសច្បាប់មួយចំនួនដូចជា លួច ឆក់ ភ្លន់ និងលក់ខ្លួនជាដើម៕
© រក្សាសិទ្ធិដោយ thmeythmey.com