អតីតប្រមុខស្ថាប័នប៉ូលិសអន្តរជាតិ ម៉ឹង ហុងវៃ ត្រូវជាប់គុក១៣ឆ្នាំរឿងស៊ីសំណូក

អន្តរជាតិ

អតីតប្រមុខស្ថាប័នប៉ូលិសអន្តរជាតិ ម៉ឹង ហុងវៃ ត្រូវជាប់គុក១៣ឆ្នាំរឿងស៊ីសំណូក

21, Jan 2020 , 10:19 pm

រូបភាព

អតីតប្រមុខស្ថាប័នប៉ូលិសអន្តរជាតិ (Interpol) លោក ម៉ឹង ហុងវៃ ក្នុងសវនាការនាពេលកន្លងទៅ (ប្រភពរូប៖ AFP)

ដោយ:

អតីតប្រមុខស្ថាប័នប៉ូលិសអន្តរជាតិ (Interpol) លោក ម៉ឹង ហុងវៃ (Meng Hongwei) ដែលត្រូវបានឃុំខ្លួនក្នុងដំណើរទស្សនកិច្ចទៅកាន់ប្រទេសចិនក្នុងឆ្នាំ ២០១៨ ត្រូវបានកាត់ទោសឲ្យជាប់ពន្ធនាគារជាង ១៣ ឆ្នាំពីបទស៊ីសំណូកសូកប៉ាន់ នៅថ្ងៃអង្គារ ២១ ខែមករា។

តុលាការប្រជាជនទីក្រុងធានជីន បានបញ្ជាក់ក្នុងសេចក្តីថ្លែងការណ៍ថា បុរសវ័យ៦៦ឆ្នាំរូបនេះ ត្រូវបានកាត់ទោសឲ្យជាប់ពន្ធនាគាររយៈពេល ១៣ ឆ្នាំ និង ៦ខែ ព្រមទាំងពិន័យជាប្រាក់ ២៩ម៉ឺនដុល្លារ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP ។

ក្នុងសវនាការរបស់លោកកាលពីខែមិថុនាឆ្នាំមុន លោក ម៉ឹង បានសារភាពកំហុសក្នុងការទទួលសំណូកចំនួន ២,១ លានដុល្លារ ក្រោយពីតុលាការបាននិយាយថា លោកបានប្រើឋានៈនិងមុខតំណែងរបស់គាត់ដើម្បីស្វែងរកផលប្រយោជន៍មិនត្រឹមត្រូវ ព្រមទាំងទទួលបានទ្រព្យសម្បត្តិដោយខុសច្បាប់និង សំណូក។

តុលាការ បញ្ជាក់ទៀតថា លោក ម៉ឹង បានសារភាពជាការពិតចំពោះអង្គហេតុព្រហ្មទណ្ឌទាំងអស់ហើយនឹងមិនប្តឹងឧទ្ធរណ៍ចំពោះសេចក្តីសម្រេចនេះទេ។ តុលាការបន្តថា លុយ និងទ្រព្យសម្បត្តិខ្លះដែលលួចយកទៅ ពុំអាចយកមកវិញបានឡើយ។

លោក ម៉ឹង ហុងវៃ ជាជនជាតិចិនទីមួយ ដែលកាន់តំណែងប្រធានប៉ូលិសអន្តរជាតិ។ តាមរបាយការណ៍កន្លងទៅ លោក ម៉ឹង ដែលជាអតីតអនុរដ្ឋមន្ត្រីសន្តិសុខសាធារណៈរបស់ក្រុងប៉េកាំងផងនោះ បានបាត់ខ្លួនបន្ទាប់ពីធ្វើដំណើរពីបារាំងទៅកាន់ដឹកដីកំណើតរបស់ខ្លួននៅចុងខែកញ្ញា ឆ្នាំ២០១៨។ លោក ត្រូវបានជំនួសជាប្រធានស្ថាប័នប៉ូលិសអន្តរជាតិដោយលោក Kim Jong-yang ដែលជាជនជាតិកូរ៉េខាងត្បូង។

សូមបញ្ជាក់ដែរថា Intepol គឺជាអង្គការអន្តរជាតិដ៏ធំមួយ ដែលជាធម្មតាការងាររបស់អង្គការនេះផ្ដោតលើការស្វែងរកមនុស្សបាត់ខ្លួន ឬការតាមចាប់ជនល្មើស។ ប៉ុន្តែអង្គការនេះ មិនមានអំណាចផ្ទាល់ក្នុងការអនុវត្តការងាររបស់ខ្លួន ហើយពឹងផ្អែកលើប្រទេសសមាជិកវិញ។ លោក ម៉ឹង ដែលជាមន្ត្រីសន្តិសុខជាន់ខ្ពស់របស់ចិន បានក្លាយជាប្រធាន Interpol នៅកាលពីឆ្នាំ២០១៦ ដែលកាលនោះក៏បង្កើតជាពាក្យរិះគន់ខ្លាំងពីអង្គការសិទ្ធិមនុស្ស៕