កីឡាអន្តរជាតិ
អន្តរជាតិ
EPL៖ Arsenal ដែលសល់គ្នា១០នាក់ វាយបកតាមស្មើ Chelsea ២-២ N'Golo Kante (ឆ្វេង) ព្យាយាមយកដៃប៉ះបាល់ដើម្បីរំខានដល់ Gabriel Martinelli
× Arsenal ដែលនៅសល់តែគ្នា១០នាក់ បានវាយបកតាមស្មើ Chelsea ដោយលទ្ធផល ២-២ នាការប្រកួតក្របខណ្ឌ Premier League នៅរាត្រីថ្ងៃទី២១ ខែមករា។
ក្នុងជំនួបសប្តាហ៍ទី២៤ នៅកីឡដ្ឋាន Stamford Bridge ខ្សែការពារ David Luiz បានទទួលកាតក្រហមនៅនាទី២៨ បន្ទាប់ពីឈូសជើង Tammy Abraham ក្នុងប្រអប់គ្រោះថ្នាក់។ ខ្សែបម្រើ Jorginho ជាអ្នករ៉ាប់រងស៊ុតបាល់ពិន័យប៉េណាល់ដើម្បីជួយ Chelsea នាំមុខ១គ្រាប់មុននៅនាទី២៨។
ចូលដល់វគ្គទី២ ខណៈការប្រកួតដំណើរការដល់នាទី៦៣ ខ្សែប្រយុទ្ធវ័យក្មេង Gabriel Martinelli បានអូសបាល់តាំងពីក្រោមយកទៅបញ្ចូលសំណាញ់ទីក្រុមតោខៀវដើម្បីជួយកាំភ្លើងធំតាមស្មើ ១-១ វិញ។ យ៉ាងណាក៏ដោយ ក្រុមដែលដឹកនាំដោយអ្នកចាត់ការទូទៅលោក Frank Lampard នៅតែជាក្រុមមានប្រៀប និងបានរកគ្រាប់បាល់នាំមុខសារជាថ្មី តាមរយៈការស៊ុតបញ្ចូលទីរបស់ខ្សែការពារនិងជាប្រធានក្រុម Cesar Azpilicueta នៅនាទី៨៤។
រឿងនឹកស្មានមិនដល់បានកើតឡើងជាថ្មី។ Arsenal ដែលសល់តែគ្នា១០នាក់តាំងពីវគ្គទី១ មិនបានធ្វើឲ្យអ្នកគាំទ្រខ្លួនខកចិត្តឡើយ បន្ទាប់ពីរកគ្រាប់បាល់តាមស្មើក្រោយការនាំមុខជាថ្មីរបស់ Chelsea ត្រឹមរយៈពេល៣នាទីប៉ុណ្ណោះ។ ខ្សែការពារស្លាបស្តាំ Hector Bellerin តាមរយៈការបញ្ជូនបាល់ពីដៃគូ Lucas Torreira បានស៊ុតបញ្ចូលទីយ៉ាងអស្ចារ្យនៅនាទី៨៧ ដើម្បីជួយ Arsenal យកស្មើ Chelsea ដោយលទ្ធផល ២-២។
លទ្ធផលស្មើគ្នានេះ បានជួយកាត់បន្ថយគម្លាតពិន្ទុរបស់ Chelsea ពី Manchester United ក្នុងការដណ្តើមចំណាត់ថ្នាក់ Top4 រដូវកាលនេះ សម្រាប់កៅអីលេងនៅក្របខណ្ឌ Champions League រដូវកាលក្រោយ។ ឆ្លងកាត់២៤ប្រកួត Chelsea រកបាន៤០ពិន្ទុ ឈរលេខរៀងទី៤ នាំមុខពិន្ទុបិសាចក្រហមដែលនៅលេខ៥ និងទើបប្រកួត២៣លើក ចំនួន៥ពិន្ទុ។
Arsenal ដែលមានលោក Mikel Arteta ជាអ្នកចាត់ការ បានឡើងទៅកាន់ចំណាត់ថ្នាក់ទី១០ ក្នុងតារាង Premier League ដោយរកបាន៣០ពិន្ទុ ពីការប្រកួត២៤លើក។
ដោយឡែកក្នុងជំនួបថ្ងៃជាមួយគ្នានេះ Manchester City បានបន្តជ័យជម្នះរបស់ខ្លួនដោយយកឈ្នះ Sheffield United ១-០។ ខ្សែប្រយុទ្ធ Sergio Aguero ជាអ្នកសម្រេចទីក្នុងប្រកួតនេះ តាមរយៈការបញ្ជូនបាល់យ៉ាងល្អរបស់ Kevin De Bruyne។
Aston Villa បានគេចផុតពីតំបន់ត្រូវកាត់ចោល ក្រោយយកឈ្នះ Watford ២-១។ Aston ឡើងទៅចំណាត់ថ្នាក់ទី១៦ វិញដោយរកបាន២៤ពិន្ទុ ស្របពេល Watford ស្ថិតនៅតំបន់គ្រោះថ្នាក់ដោយរកបាន២៣ពិន្ទុ។ AFC Bournemouth បើទោះយកឈ្នះ Brighton & Hove Albion ៣-១ តែពួកគេមិនទាន់គេផុតតំបន់គ្រោះថ្នាក់នៅឡើយ ដោយឈរនៅលេខរៀងទី១៨ មាន២៣ពិន្ទុ។ Norwich City នៅបាតតារាង មាន១៧ពិន្ទុ៕
Tag:
Arsenal
Premier League
Chelsea
© រក្សាសិទ្ធិដោយ thmeythmey.com