គ្រូបង្វឹកក្រុមព្រះខ័នរាជស្វាយរៀងលោក Conor Nestor រំពឹងឃើញវត្តមានលោក មាស ចាន់ណា គ្រូបង្វឹកណាហ្គាវើលដ៍ និងថ្នាក់ដឹកនាំក្លិបបឹងកេតនៅពហុកីឡដ្ឋានជាតិ ពេលក្រុមខ្លួនប៉ះជាមួយក្រុម Master 7 របស់ឡាវក្នុងវគ្គជម្រុះ Playoff នៅល្ងាចថ្ងៃទី២២ មករា ឆ្នាំ២០២០នេះ។ ទាំងគ្រូបង្វឹកព្រះខ័នរាជស្វាយរៀង និង Master 7 សុទ្ធតែបានអះអាងពីការត្រៀមខ្លួនរួចរាល់ និងប្តេជ្ញាស្វែងរកជ័យជម្នះរៀងៗខ្លួន។ ដូច្នេះការជូបគ្នារវាងក្រុមទាំងពីរនឹងក្លាយជាការប្រកួតដ៏អស្ចារ្យសម្រាប់អ្នកគាំទ្រកម្ពុជា។
លោក Conor Nestor គ្រូបង្វឹកក្រុមព្រះខ័នរាជស្វាយរៀង គឺជាអ្នកគាំទ្រមួយរូប ដែលបានទៅទស្សនាការប្រកួតផ្ទាល់នៅពហុកីឡដ្ឋានជាតិពេលក្រុមណាហ្គាវើលដ៍ និងបឹងកេតប្រកួតក្នុងវគ្គជម្រុះពានរង្វាន់ AFC Cup កាលពីពេលកន្លង។ កត្តានេះហើយ ដែលធ្វើឲ្យគ្រូបង្វឹកសញ្ជាតិអៀរឡង់រូបនេះរំពឹងថា ក្រុមខ្លួននឹងទទួលបានការលើកទឹកចិត្ត និងគាំទ្រដោយផ្ទាល់ពីសំណាក់ថ្នាក់ដឹកនាំក្លិបទាំងពីរ ពេលពួកគេប៉ះជាមួយ Master 7 របស់ឡាវ នាវេលាម៉ោង៦ល្ងាចថ្ងៃទី២២ មករា នេះនៅពហុកីឡដ្ឋានជាតិ។
«នៅឆ្នាំមុនខ្ញុំបានគាំទ្រណាហ្គាវើលដ៏ ហើយរដូវកាលមុនមួយទៀត ខ្ញុំបានអង្គុយទីនេះ គាំទ្រក្រុមបឹងកេត ដូច្នេះខ្ញុំសង្ឃឹមថា ថ្ងៃនេះ លោកគ្រូ មាស ចាន់ណា នឹងមកគាំទ្រពួកយើង ដូចអ្វីដែលខ្ញុំបានធ្វើកន្លងមក»។ លោក Conor Nestor លើកឡើងបែបនេះ នាសន្និសីទសារព័ត៌មានមុនការប្រកួត កាលពីថ្ងៃទី២១ ខែមករា ឆ្នាំ២០២០។
គ្រូបង្វឹកសញ្ជាតិអៀរឡង់រូបនេះបានអះអាងថា ក្រុមលោកត្រៀមខ្លួនបានយ៉ាងល្អក្នុងការតទល់ជាមួយ Master 7។ ជាក់ស្តែងមុនការប្រកួតមកដល់ក្រុមព្រះខ័នរាជស្វាយរៀងបានចេញទៅបោះជំរំហ្វឹកហាត់ពង្រឹងសមត្ថភាពនិងប្រកួតមិត្តភាពអន្តរជាតិនៅប្រទេសម៉ាឡេស៊ី។ អ្វីដែលគួរកត់សម្គាល់ក្រុមជើងឯកលីកកំពូលឆ្នាំ២០១៩មួយនេះ ទទួលបានជ័យជម្នះយ៉ាងត្រចះត្រចង់តាមរយៈយកឈ្នះបីប្រកួតជាប់គ្នា។ ពួកគេបានយកឈ្នះក្រុម Selangor FA ក្នុងលទ្ធផល ៤-០, Felda United ២-១ និងចុងក្រោយពួកគេបានវាយបកយកឈ្នះក្រុម Terengganu ដែលជាអតីតក្រុមរបស់ ធារី ចន្ថាប៊ីន ក្នុងលទ្ធផល ៤-៣។
ទោះបីជ័យជម្នះដ៏ធំធេងក្នុងការប្រកួត Pre-Season វាបានជួយលើកទឹកចិត្តនិងផ្តល់កម្លាំងចិត្តដល់កីឡាករឲ្យកាន់តែមានទំនុកចិត្តក៏ដោយ តែសម្រាប់លោក Conor Nestor មិនបានទន់ទោរ ឬផ្តេកផ្តួលជាមួយលទ្ធផលនេះឡើយ។ សម្រាប់លោក Conor ការប្រកួត Pre-Season នៅម៉ាឡេស៊ី ខុសប្លែកពីការប្រកួតជាមួយ Master 7 ព្រោះវាចាប់ផ្តើមពីលទ្ធផលសូន្យ។ តែយ៉ាងណាគ្រូបង្វឹករូបនេះប្តេជ្ញាថា លោកនឹងខិតខំដឹកនាំឲ្យអស់ពីសមត្ថភាព ដើម្បីស្វែងរកជ័យជម្នះពីការប្រកួតនេះ។
ប្រធានក្រុមព្រះខ័នរាជស្វាយរៀងកីឡាករ សឿយ វិសាល ក៏បានអះអាងពីការត្រៀមខ្លួនបានយ៉ាងល្អសម្រាប់ការប្រកួតនេះផងដែរ ហើយរូបគេប្តេជ្ញាប្រឹងប្រែងប្រកួតឲ្យអស់ពីសមត្ថភាពក្នុងការស្វែងរកជ័យជម្នះជូនក្រុម អ្នកគាំទ្រ និងប្រទេសជាតិ។ វិសាល អះអាងថា ក្រុមព្រះខ័នរាជស្វាយរៀង នឹងធ្វើឲ្យការប្រកួតជាមួយ Master 7 ក្លាយជាការប្រកួតដ៏អស្ចារ្យសម្រាប់អ្នកគាំទ្រ។
«វាជាការប្រកួតមួយដ៏សំខាន់សម្រាប់ព្រះខ័នរាជស្វាយរៀង ដូច្នេះយើងប្តេជ្ញាថានឹងប្រឹងប្រែងប្រកួតឲ្យអស់ពីសមត្ថភាពដើម្បីរកផលវិជ្ជមានមួយជូនក្រុម និងប្រទេសរបស់ពួកយើង ជាពិសេសអ្នកគាំទ្រទាំងក្នុងស្រុក និងក្រៅស្រុក។ យើងប្តេជ្ញាថា នឹងខិតខំធ្វើឲ្យការប្រកួតនេះ វាក្លាយជាប្រកួតដ៏អស្ចារ្យសម្រាប់ពួកយើង»។ នេះជាការលើកឡើងរបស់កីឡាករ សឿយ វិសាល។
ទោះបីក្រុម Master 7 ទទួលបានលទ្ធផលមិនសូវល្អក្នុងការបោះជំរំហ្វឹកហាត់ និងប្រកួត Pre-Season នៅលើទឹកដីថៃក៏ពិតមែន តែក្រុមជើងឯករងលីគកំពូលឡាវមួយនេះបានខិតខំប្រឹងប្រែងហ្វឹកហាត់យ៉ាងខ្លាំង និងបានត្រៀមខ្លួនយ៉ាងល្អក្នុងការតទល់ជាមួយព្រះខ័នរាជស្វាយរៀង។ នេះបើតាមការអះអាងរបស់លោក Catalin Mi Hai Dina គ្រូបង្វឹកក្រុម Master 7។
គ្រូបង្វឹករូបនេះប្តេជ្ញាថា លោកនឹងខិតខំប្រឹងប្រែងឲ្យអស់ពីសមត្ថភាពក្នុងការដឹកនាំក្រុម ដើម្បីស្វែងរកលទ្ធផលមួយដ៏ល្អប្រសើរ ទោះបីព្រះខ័នរាជស្វាយរៀងមានសមត្ថភាពខ្លាំងនិងទើបទទួលបានជោគជ័យក្នុងការប្រកួត Pre-Season នៅម៉ាឡេស៊ីក៏ដោយ។ លោកជឿជាក់ថា ការប្រកួតនៅថ្ងៃនេះនឹងក្លាយជាកាប្រកួតមួយដ៏តានតឹង និងជាការប្រកួតមួយដ៏ល្អ។
ជាមួយការបង្ហាញក្តីរំពឹងនឹងអាចដឹកនាំក្រុម Master 7 ឡើងទៅវគ្គបន្តពីការចូលរួមលើកដំបូងជាប្រវត្តិសាស្ត្រ គ្រូបង្វឹកសញ្ជាតិរ៉ូម៉ានីរូបនេះបានលើកឡើងដូច្នេះថា៖«ទោះបីព្រះខ័នរាជស្វាយរៀងទទួលបានលទ្ធផលក្នុងការប្រកួត Pre-Season ហើយក្រុមយើងទទួលលទ្ធផលមិនល្អក៏ដោយ តែវាគ្រាន់តែជាការប្រកួតវាស់ស្ទង់សមត្ថភាពរបស់កីឡាករក្នុងការរៀបចំក្រុមតែប៉ុណ្ណោះ។ ប៉ុន្តែការប្រកួតនៅថ្ងៃនេះ គឺជាការប្រកួតមួយផ្សេង យើងនឹងប្រឹងប្រែងឲ្យអស់ពីសមត្ថភាព ដើម្បីស្វែងរកជ័យជម្នះជូនក្រុម»៕