អន្តរជាតិ
លោក ពូទីន តែងតាំងគណៈរដ្ឋមន្ត្រីថ្មីដោយរក្សាមនុស្សជំនិតឲ្យកាន់តំណែងសំខាន់ៗ ប្រធានាធិបតីរុស្ស៊ី វ៉ា្លឌីមៀ ពូទីន ជជែកជាមួយនាយករដ្ឋមន្រ្តី មីខាអ៊ីល មីហ៊ូស្ទីន។ រូបភាពវេបសាយប្រធានាធិបតីរុស្ស៊ី
× ប្រធានាធិបតីរុស្ស៊ី វ៉ា្លឌីមៀ ពូទីន នៅថ្ងៃទី២១ ខែមករា បានតែងតាំងសមាសភាពគណៈរដ្ឋមន្ត្រីថ្មីដើម្បីដឹកនាំកិច្ចការជាតិ បន្ទាប់ពីលោកប្រកាសកែរដ្ឋធម្មនុញ្ញដ៏គួរឲ្យភ្ញាក់ផ្អើលមក។ លោក ពូទីន បានរក្សាមនុស្សជំនិតរបស់ខ្លួនក្នុងតំណែងសំខាន់ៗដូចជារដ្ឋមន្ត្រីការពារជាតិ ការបរទេស និងហិរញ្ញវត្ថុ។ រដ្ឋមន្ត្រីផ្នែកកិច្ចការសង្គមជាច្រើនរូប ត្រូវបានផ្លាស់ប្ដូរក្នុងរដ្ឋាភិបាលដែលដឹកនាំដោយនាយករដ្ឋមន្ត្រីថ្មី លោក មីខាអ៊ីល មីហ៊ូស្ទីន ។
ជិតមួយសប្ដាហ៍ក្រោយប្រកាសកែរដ្ឋធម្មនុញ្ញដែលនាំរដ្ឋាភិបាលលោក ឌីមីទ្រី ម៉េដវ៉េដេវ សុំលាលែងគ្មានសល់ ប្រធានាធិបតីរុស្ស៊ី វ្ល៉ាឌីមៀ ពូទីន ក៏បានតែងតាំងរដ្ឋាភិបាលថ្មីមួយវិញដើម្បីបន្តដឹកនាំប្រទេស។ កាលពីសប្ដាហ៍មុន លោក ពូទីន បានតែងតាំងនាយករដ្ឋមន្ត្រីថ្មីហើយ គឺលោក មីខាអ៊ីល មីហ៊ូស្ទីន ដែលមុននេះជាប្រធានសេវាកម្មពន្ធដាររុស្ស៊ី។ នៅថ្ងៃទី២១ ខែមករា លោក ពូទីន បន្តតែងតាំងរដ្ឋមន្ត្រីថែមទៀត។
មនុស្សជំនិតៗរបស់លោក ពូទីន នៅតែរក្សាតំណែងរបស់ខ្លួនដដែល។ រដ្ឋមន្ត្រីការបរទេស លោក សេហ្គេយ៍ ឡាវរ៉ូវ (Sergei Lavrov) និងរដ្ឋមន្ត្រីការពារជាតិ សេហ្គេយ៍ ស្ហយហ្គូ (Sergei Shoigu) ដែលជាមន្ត្រីជំនិតបំផុតរបស់លោក បន្តកាន់តំណែងរៀងៗខ្លួនដដែលដូចគ្នានឹងរដ្ឋមន្ត្រីហិរញ្ញវត្ថុ អាន់តុន ស៊ីលូណូវ (Anton Siluanov) និងរដ្ឋមន្ត្រីថាមពល អាឡិចសាន់ឌ័រ ណូវ៉ាក់ (Alexander Novak)។ នេះបើតាមការផ្សាយរបស់ទីភ្នាក់ងារព័ត៌មាន AFP ។
យ៉ាងណាមិញ រដ្ឋមន្ត្រីដែលទាក់ទងនឹងកិច្ចការសង្គមដូចជារដ្ឋមន្ត្រីសុខាភិបាល អប់រំ ការងារ និងអភិវឌ្ឍសេដ្ឋកិច្ចជាដើម សុទ្ធតែត្រូវបានផ្លាស់ប្ដូរទាំងអស់។ នាជំនួបជាមួយគណៈរដ្ឋមន្ត្រីថ្មីដែលដឹកនាំលោក មីហ៊ូស្ទីន លោក ពូទីន និយាយថា ការងារសំខាន់បំផុត គឺបង្កើនសុខមាលភាពប្រជាជន និងពង្រឹងរដ្ឋ។ នាយករដ្ឋមន្ត្រីថ្មី លោក មីហ៊ូស្ទីន អះអាងថា រដ្ឋាភិបាលលោក នឹងផ្ដោតលើការជំរុញកំណើនសេដ្ឋកិច្ច និងជីវភាពប្រជាជន។
លោក មីហ៊ូស្ទីន ក៏សន្យាថា នឹងនាំមកការផ្លាស់ប្ដូរពិតប្រាកដសម្រាប់រុស្ស៊ី។ លោក ពូទីន ផ្ទាល់ ហៅគម្រោងកែប្រែរដ្ឋធម្មនុញ្ញរបស់លោក ជាការនិងឆ្លើយតបនឹងអ្វីដែលលោកចាត់ទុកថា ការទាមទារឲ្យមានការផ្លាស់ប្ដូរផងដែរ។
យ៉ាងណាមិញ ក្រុមប្រឆាំង បានរិះគន់ថា អ្វីដែលលោក ពូទីន ចង់បាន គឺការបន្តរក្សាអំណាចរបស់ខ្លួនពេលចប់អាណត្តិនៅឆ្នាំ២០២៤ ខាងមុខ។ អ្វីដែលពួកគេចង្អុលចំៗនោះ គឺការបង្កើនអំណាចក្រុមប្រឹក្សារដ្ឋ ដែលបច្ចុប្បន្នត្រឹមជាស្ថាប័នផ្ដល់យោបល់ធម្មតា។ ក្នុងគម្រោងកែរដ្ឋធម្មនុញ្ញ ក្រុមប្រឹក្សាដែលគេជឿថា លោក ពូទីន នឹងធ្វើជាប្រធាននោះ នឹងក្លាយជាស្ថាប័នមួយមានអំណាចលើកិច្ចការការបរទេស សន្តិសុខ និងផ្ដល់យោបល់លើកិច្ចការក្នុងស្រុកផងដែរ៕
Tag:
រុស្ស៊ី
វ្ល៉ាឌីមៀ ពូទីន
© រក្សាសិទ្ធិដោយ thmeythmey.com