ឱកាសសម្រាប់យុវជន! បុប្ផាណាបង្កើតគម្រោងភាពយន្តឯកសារស្តីពីជនជាតិដើមភាគតិច និងការអភិរក្សដំរី

ជាតិ

ឱកាសសម្រាប់យុវជន! បុប្ផាណាបង្កើតគម្រោងភាពយន្តឯកសារស្តីពីជនជាតិដើមភាគតិច និងការអភិរក្សដំរី

22, Jan 2020 , 9:59 pm

រូបភាព

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ មជ្ឈមណ្ឌលធនធានសោតទស្សន៍បុប្ផាណា ប្រកាសជ្រើសរើសយុវជនកម្ពុជាចំនួន ១២នាក់ ដើម្បីចូលរួមក្នុងគម្រោងរបស់ The Arts and Humanities Research Council និង Global Challenges Research Fund ស្ដីពី «ការអភិរក្សសត្វដំរី និងបទពិសោធន៍របស់ជនជាតិដើមភាគតិចនៅកម្ពុជា»។ បើតាមសេចក្ដីជូនដំណឹងរបស់មជ្ឈមណ្ឌលបុប្ផាណា វគ្គបណ្ដុះបណ្ដាលផ្នែកផលិតភាពយន្តឯកសារ និងពហុប្រព័ន្ធផ្សព្វផ្សាយនេះ នឹងផ្ដោតការយកចិត្តទុកដាក់លើបរិស្ថាន តាមរយៈការបង្កើតភាពយន្ត។

សាកលវិទ្យាល័យ University of Bath របស់ចក្រភពអង់គ្លេស និង Elephant Livelihood Initiative Environment សហការជាមួយមជ្ឈមណ្ឌលធនធានសោតទស្សន៍បុប្ផាណា នឹងជ្រើសរើសយុវជនកម្ពុជាចំនួន ១២នាក់ ដើម្បីចូលរួមវគ្គបណ្ដុះបណ្ដាលផ្នែកផលិតភាពយន្តឯកសារ និងពហុប្រព័ន្ធផ្សព្វផ្សាយ។

សេចក្ដីជូនដំណឹងខាងលើ បញ្ជាក់ថា គម្រោងនេះ នឹងអភិវឌ្ឍធនធានផ្នែកភាពយន្ត ដោយផ្សាភ្ជាប់ជាមួយសាធារណជននៅកម្ពុជា និងពិភពលោកពីបញ្ហាប្រឈមទាក់ទងនឹងការអភិរក្សដំរី បញ្ហាដែលសហគមន៍ជនជាតិដើមភាគតិចកំពុងជួបប្រទះ។ ជាមួយគ្នានេះ គម្រោងនេះ នឹងផ្ដោតលើទំនាក់ទំនងរវាងបរិស្ថានធម្មជាតិ និងផលប៉ះពាល់ពីការបំផ្លាញបរិស្ថានធម្មជាតិ។

លក្ខខណ្ឌក្នុងការជ្រើសរើស យុវជន ១២រូប ត្រូវមានអាយុចាប់ពី ១៨ ដល់ ២៥ឆ្នាំ និងចំណេះដឹងកម្រិតវប្បធម៌ចាប់ពីសញ្ញាបត្រមធ្យមសិក្សាទុតិយភូមិឡើងទៅ។ បេក្ខជន ជាអ្នកដែលមានចំណង់ចំណូលចិត្តខ្ពស់ផ្នែកភាពយន្ត និងជាអ្នកស្រឡាញ់បរិស្ថាន ជាពិសេសមានពេលវេលាគ្រប់គ្រាន់សម្រាប់វគ្គបណ្ដុះបណ្ដាលទាំងអស់ ចាប់ពីខែកុម្ភៈ ឆ្នាំ២០២០ ដល់ខែមករា ឆ្នាំ២០២១។ ដោយឡែក បេក្ខជន ដែលមានចំណេះដឹងភាសាអង់គ្លេស និងកុំព្យូទ័រ រួមទាំងស្ត្រីជនជាតិដើមភាគតិច ត្រូវបានផ្ដល់អាទិភាព។

តាមរយៈវគ្គបណ្ដុះបណ្ដាលនេះ យុវជនទាំង១២ រូប នឹងទទួលបានការអភិវឌ្ឍជំនាញ និងការបណ្ដុះបណ្ដាលផ្នែកដំណើរការផលិតភាពយន្តក្នុងពេលផលិត និងក្រោយពេលផលិត។ បន្ថែមលើនេះ មានឱកាសផលិតស្នាដៃភាពយន្តឯកសារនៅខេត្តមណ្ឌលគិរី និងចូលរួមផ្សព្វផ្សាយភាពយន្តរបស់ខ្លួនក្នុងខេត្តមណ្ឌលគិរី និងរាជធានីភ្នំពេញ។

សម្រាប់យុវជនដែលមានចំណាប់អារម្មណ៍អាចដាក់ពាក្យនៅមជ្ឈមណ្ឌលធនធានសោតទស្សន៍បុប្ផាណា។ កាលបរិច្ឆេទឈប់ទទួលពាក្យនៅថ្ងៃទី ១០ កុម្ភៈ ឆ្នាំ២០២០ និងចាប់ផ្ដើមចូលរៀននៅថ្ងៃទី ១៧ ខែកុម្ភៈ ឆ្នាំ២០២០នេះ៕