អន្តរជាតិ
ក្រសួងសុខាភិបាលថៃ រកឃើញជនជាតិខ្លួនទីមួយដែលឆ្លងកូរ៉ូណាវីរុស មនុស្សពាក់ម៉ាស់ ក្នុងទីក្រុង បាងកក នៃប្រទេសថៃ ថ្ងៃ២២ មករា ឆ្នាំ២០២០ (AFP)
× ក្រសួងសុខាភិបាលថៃ បានបញ្ជាក់នៅថ្ងៃពុធ ២២ ខែមករាថា ស្ត្រីវ័យ៧៣ឆ្នាំម្នាក់ដែលកំពុងសម្រាកព្យាបាលនៅមន្ទីរពេទ្យមួយក្នុងទីក្រុង Nakhon Pathom គឺជាជនជាតិថៃទី១ ដែលរកឃើញថាបានឆ្លងកូរ៉ូណាវីរុស។ អម្បូរវីរុសនេះហើយ បង្កទៅជាជំងឺរលាកសួតម្យ៉ាងស្រដៀង SARS ។
ស្ត្រីថៃម្នាក់ បានធ្លាក់ខ្លួនឈឺ ក្រោយត្រលប់មកពីទីក្រុងវូហាន ប្រទេសចិន កាលពីចុងឆ្នាំ២០១៩កន្លងទៅ។ គាត់កំពុងសម្រាកព្យាបាលក្នុងមន្ទីរពេទ្យ ហើយមន្ត្រីសុខាភិបាលថៃបានបញ្ជាក់ថា ស្ត្រីរូបនេះ បានឆ្លងកូរ៉ូណាវីរុស ។ នេះបើតាមកាចុះផ្សាយរបស់កាសែត បាងកកប៉ុស្តិ៍ ។
គិតមកទល់ពេលនេះ វាមានករណីចំនួន៤ហើយដែលត្រូវបានរាយការណ៍ពាក់ព័ន្ធនឹងករណីឆ្លងកូរ៉ូណាវីរុសនេះ ក្នុងប្រទេសថៃ ។ ក្នុងនោះគឺ ៣នាក់គឺជាអ្នកទេសចរជនជាតិចិន និងជនជាតិថៃម្នាក់។ នាយកដ្ឋានគ្រប់គ្រងជំងឺថៃ បានប្រកាសនៅថ្ងៃពុធថា ភ្ញៀនទេសចរចិន២នាក់ ដែលត្រូវបានរកឃើញថាបានឆ្លងកូរ៉ូណាវីរុសនេះ បានធូរស្បើយពីជំងឺនេះទាំងស្រុង ហើយបានត្រលប់ទៅកាន់ផ្ទះខ្លួនវិញ។
ម្យ៉ាងទៀត ប្រធាននាយកដ្ឋានគ្រប់គ្រងជំងឺថៃ លោក Sophon Iamsirithaorn បានអះអាងថា ស្ត្រីជនជាតិចិនអាយុ៧៤ឆ្នាំម្នាក់ បានធ្វើដំណើរពីទីក្រុងវូហាន ប្រទេសចិន មកដល់ប្រទេសថៃ កាលពីថ្ងៃ ១៣ មករា ។ ស្ត្រីរូបនេះ ត្រូវបានដាក់ឲ្យនៅដោយឡែក ខណៈរូបគាត់មានអាការៈក្តៅខ្លួន ហើយការធ្វើតេស្តបានបញ្ជាក់ថា ស្ត្រីរូបនេះមានផ្ទុកកូរ៉ូណាវីរុស។ ក្រោយមកបានសម្រាកព្យាបាលក្នុងមន្ទីរពេទ្យខេត្ត ជនជាតិចិនរូបនេះ ត្រលប់ទៅកាន់ប្រទេសកំណើតវិញកាលពីថ្ងៃ ២១ មករា។
ទាក់ទិនបញ្ហានេះ រដ្ឋមន្ត្រីក្រសួងសុខាភិបាលថៃ បានបញ្ជាក់ប្រាប់អ្នកសារព័ត៌មានថា៖«យើងអាចគ្រប់គ្រងស្ថានការណ៍នេះបាន។ វាពុំទាន់មានករណីឆ្លងពីមនុស្សទៅមនុស្សក្នុងប្រទេសថៃនៅឡើយទេ ព្រោះថាយើងតាមដានអ្នកជំងឺភ្លាមៗនៅពេលពួកគេមកដល់»។ នេះបើតាមទីភ្នាក់ងារព័ត៌មាន Reuters ។
សូមបញ្ជាក់ថា វីរុសថ្មីពូជកូរ៉ូណាវីរុស ដែលបង្កទៅជាជំងឺរលាកសួតម្យ៉ាងស្រដៀង SARS ត្រូវបានគេរាយការណ៍ថា អាចឆ្លងពីមនុស្សទៅមនុស្សបាន។ ចំណែករោគសញ្ញានៃអ្នកមានផ្ទុកវីរុសនេះ គឺមានដូចជារោគសញ្ញាផ្លូវដង្ហើម គ្រុនក្ដៅ ក្អក ដង្ហើមខ្លីនិងពិបាកដកដង្ហើម។ បើករណីធ្ងន់ធ្ងរ វីរុសនេះអាចបណ្ដាលឲ្យមានជំងឺរលាកសួត ជំងឺសាសន៍ ជំងឺខ្សោយតម្រងនោម និងរហូតដល់ស្លាប់ក៏មាន ។
បច្ចុប្បន្ននេះ វីរុសដែលផ្ទុះចេញពីក្នុងទីក្រុងវូហាន នេះ បានឆ្លងរាលដាលទៅទីក្រុងផ្សេងទៀតក្នុងប្រទេសចិន រួមទាំង ប៉េកាំង និងសៀងហៃ ហើយក៏ទៅកាន់សហរដ្ឋអាមេរិក កូរ៉េខាងត្បូង ជប៉ុន និងកោះតៃវ៉ាន់ផងដែរ៕
© រក្សាសិទ្ធិដោយ thmeythmey.com