អន្តរជាតិ
តៃវ៉ាន់ទទូចឲ្យ WHO បញ្ចូលខ្លួនជាសមាជិក ព្រោះពិបាកទទួលព័ត៌មានពីកូរ៉ូណាវីរុស ប្រធានាធិបតីតៃវ៉ាន់ លោកស្រី Tsai Ing-wen ធ្វើសន្និសីទសារព័ត៌មាននៅថ្ងៃទី២២ ខែមករា ឆ្នាំ ២០២០។ រូបភាព៖ AFP
× ប្រធានាធិបតីតៃវ៉ាន់នៅថ្ងៃទី២២ ខែមករា បានទទូចឲ្យអង្គការសុខភាពពិភពលោក (WHO) សហការជាមួយខ្លួន ជុំវិញបញ្ហាផ្ទុះវីរុសថ្មី បន្ទាប់ពីតៃវ៉ាន់ បានរកឃើញមានអ្នកជំងឺ១នាក់មានផ្ទុកវីរុសនេះ។ ប៉ុន្តែខាងទីក្រុងប៉េកាំងឯណោះវិញ បានទាត់ចោលសំណើតៃវ៉ាន់ទៅអង្គការសុខភាពពិភពលោក និងអះអាងថា ចិនអាចទទួលបន្ទុកនេះ ដោយផ្អែកទៅតាមគោលនយោបាយ «ចិនតែមួយ»។
កូរ៉ូណាវីរុស បានរាតត្បាតយ៉ាងខ្លាំងនៅក្នុងប្រទេសចិន និងបានទៅដល់អាមេរិក ជប៉ុន ថៃ កូរ៉េខាងត្បូង និងតៃវ៉ាន់ជាដើម។ ដោយមិនមែនជាសមាជិកអង្គការសុខភាពពិភពលោក (WHO) និង មានការព្រួយបារម្ភពីបញ្ហានេះ តៃវ៉ាន់បានទទូចឲ្យអង្គការអន្តរជាតិមួយនេះ ជួយអន្តរាគមន៍ក្នុងបញ្ហាវីរុសថ្មីនេះ ។
បើតាមប្រធានាធិបតីតៃវ៉ាន លោកស្រី Tsai Ing-wen អង្គការសុខភាពពិភពលោក មិនត្រូវទុកតៃវ៉ាន់ចោលទេ ទាក់ទិនទៅនឹងករណីឆ្លងវីរុសអម្បូរកូរ៉ូណាវីរុស ព្រោះដែនកោះមួយនេះ មានប្រជាជនរស់នៅរហូតដល់ ២៣លាននាក់។ ក្នុងន័យនេះ ប្រធានាធិបតីតៃវ៉ាន់ បានស្នើឲ្យអង្គការអន្តរជាតិខាងលើ ទុកបញ្ហានយោបាយនៅដោយឡែក ហើយគិតគូរពីអាយុជីវិតរបស់ប្រជាជន ខណៈពេលតៃវ៉ាន់កំពុងប្រឈមគ្រោះថ្នាក់។
ប្រាប់អ្នកកាសែតនៅថ្ងៃទី២២ ខែមករា លោកស្រី Tsai បានជំរុញឲ្យអង្គការសុខភាពពិភពលោកបើកផ្លូវឲ្យតៃវ៉ាន់ផង ស្របពេលដែនដីមួយនេះ កំពុងស្ថិតនៅក្នុងពីសមរភូមិមុខនៃការផ្ទុះវីរុសថ្មីនេះ។ មិនត្រឹមតែប្រាប់អង្គការសុខភាពពិភពលោកប៉ុណ្ណោះទេ ប៉ុន្តែលោកស្រីប្រធានាធិបតី ក៏បានអំពាវនាវឲ្យចិន «បើកចំហ និងតម្លាភាព» ផងដែរ លើការចែករំលែកព័ត៌មាននៃការផ្ទុះវីរុសថ្មីនេះ ដោយភ្ជាប់ជាមួយព័ត៌មានត្រឹមត្រូវ និងពេញលេញ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ជាការឆ្លើយតបទៅនឹងប្រមុខតៃវ៉ាន់ អ្នកនាំពាក្យក្រសួងការបរទេសចិន លោក Geng Shuang អះអាងថា ចិន នឹងមិនទុកប្រជាជនតៃវ៉ាន់ចោលទេ ហើយរដ្ឋាភិបាលទីក្រុងប៉េកាំង ព្រួយបារម្ភពីបញ្ហាសុខភាព និងការរស់នៅរបស់ប្រជាជនតៃវ៉ាន់ច្រើនជាងនរណាទាំងអស់។ ប៉ុន្តែអ្នកនាំពាក្យរូបនេះ ក៏បានទាត់ចោលសំណើតៃវ៉ាន់ ដែលចង់ឲ្យអង្គការសុខភាពពិភពលោកចូលមកអន្តរាគមន៍ផងដែរ។ លោក Geng បានបន្តថា ដោយគោរពទៅតាមគោលនយោបាយ «ចិនតែមួយ» រដ្ឋាភិបាលទីក្រុងប៉េកាំង គឺជាតួអង្គតែម្នាក់គត់ ដែលអាចអនុញ្ញាតឲ្យកោះតៃវ៉ាន់ចូលរួមក្នុងអង្គការអន្តរជាតិបាន។
សូមបញ្ជាក់ថា ករណីឆ្លងវីរុសថ្មីអម្បូរកូរ៉ូណាវីរុស ដែលបង្កទៅជាជំងឺរលាកសួតម្យ៉ាងស្រដៀង SARS បានកើនឡើងរហូតដល់៤៤០នៅក្នុងប្រទេសចិន ខណៈពេលអ្នកស្លាប់បានកើនឡើងរហូតដល់ ៩នាក់។ចំណែកមនុស្សជាង២០០០នាក់ ត្រូវបានគេធ្វើរោគវិនិច្ឆ័យតាមដានជំងឺយ៉ាងម៉ត់ចត់៕
Tag:
ចិន
តៃវ៉ាន់
កូរ៉ូណាវីរុស
© រក្សាសិទ្ធិដោយ thmeythmey.com