ជាតិ
សុខភាព
កម្ពុជាដាក់ម៉ាស៊ីនស្កេន តាមអាកាសយានដ្ឋាន និងច្រកព្រំដែន បង្ការការឆ្លងកូរ៉ូណាវីរុស
រូបពីទំព័រហ្វេសប៊ុករបស់ក្រសួងសុខាភិបាល
×![]()
ដោយ: ឡាយ សុភាវតី
ភ្នំពេញ៖ ក្រសួងសុខាភិបាល បានដាក់ម៉ាស៊ីនស្កេនកម្ដៅ នៅតាមអាកាសយានដ្ឋានអន្តរជាតិភ្នំពេញ ខេត្តព្រះសីហនុ សៀមរាប និងតាមច្រកព្រំដែនអន្តរជាតិ បាវិត ប៉ោយប៉ែត និងព្រែកចាក ដើម្បីតាមដាន និងបង្ការការឆ្លងកូរ៉ូណាវីរុសថ្មី។ វិធានការនេះធ្វើឡើង ខណៈវីរុសថ្មីនេះ កំពុងរាតត្បាតនៅប្រទេសចិន និងបណ្ដាប្រទេសមួយចំនួនទៀត ក្នុងនោះក៏មានប្រទេសថៃផងដេរ។
លោក លី សូវ៉ាន់ អ្នកនាំពាក្យក្រសួងសុខាភិបាល បានពន្យល់ប្រាប់សារព័ត៌មាន ThmeyThmey តាមទូរស័ព្ទ នៅរសៀលថ្ងៃទី២២ មករាថា៖«ការដាក់ម៉ាស៊ីនស្កេនកម្ដៅនេះ គឺដើម្បីស្វែងជនសង្ស័យណាម្នាក់ ដែលមានបញ្ហាសុខភាពឬកម្ពៅខ្ពស់ សម្រាក់បង្ការនិងពិនិត្យស្វែងរកឲ្យអន្តសញ្ញាតនៃវីរុសថ្មីរលាកសួតនេះ។ ហើយមកដល់ពេលរសៀលនេះ មិនទាន់រកឃើញជនសង្ស័យណាម្នាក់ផ្ទុកជំងឺនេះឡើយ»។
ក្រៅពីដាក់ម៉ាស៊ីនស្កេនកម្ដៅ ជនឆ្លងដែននៅតាមអាកាសយានដ្ឋាន និងច្រកចេញចូលព្រំដែន ក្រសួងសុខាភិបាល ក៏បានត្រៀមក្រុមជំនាញជាង ២,០០០នាក់ ដើម្បីពិនិត្យ ព្យាបាល ព្រមទាំងត្រៀមកន្លែងសម្រាកព្យាបាលដាច់ដោយឡែក និងត្រៀមកន្លែងពិសោធន៍ ដើម្បីស្វែងរកអត្តសញ្ញាណវីរុសថ្មីនេះដែរ។ នេះបើតាមការបញ្ជាក់របស់លោក លី សូវ៉ាន់។
តាមក្រសួងសុខាភិបាល នៅយប់ថ្ងៃទី២១ មករា កូរ៉ូណាវីរុស ត្រូវបានរកឃើញចំនួន ២២២ករណី ក្នុងនោះនៅចិន ២១៨ករណី ប្រទេសថៃ២ករណី និងប្រទេសកូរ៉េខាងត្បូង១ករណី។ ជំងឺនេះ បានធ្វើមនុស្សស្លាប់៤នាក់ នៅក្នុងទីក្រុងវូហាន ខេត្តហ៊ូប៉ី ប្រទេសចិន។ ជំងឺនេះ បានកើតឡើងដំបូងបង្អស់ និងកំពុងបន្តផ្ទុះឡើងនៅទីក្រុងវូហាន ខេត្តហ៊ូប៉ី ប្រទេសចិន ហើយក៏បានកំពុងរាលដាលទៅប៉េកាំង សៀងហៃ ក្វាងចូវ ហុងកុង៕
Tag:
កូរ៉ូណាវីរុស
© រក្សាសិទ្ធិដោយ thmeythmey.com
