អាជ្ញាធរចិន ប្រកាសបិទច្រកចេញចូលទាំងអស់ក្នុងទីក្រុងវូហាន ដែលចាត់ទុកជា សម្បុកនៃការផ្ទុះវីរុសថ្មីដែលបានសម្លាប់មនុស្ស ១៧ នាក់ និងឆ្លងកាន់ទៅកាន់មនុស្សជិត ៦០០នាក់។ ការប្រកាសនេះ ធ្វើឡើងខណៈអាជ្ញាធរសុខាភិបាលជុំវិញពិភពលោក ដុតដៃដុតជើងបង្ការការរាតត្បាតវីរុសនេះជាសកល។
វីរុសឆ្លងដែលមិនស្គាល់ពីមុនមកនេះ ត្រូវបានគេជឿថាបានកើតឡើងកាលពីចុងឆ្នាំមុនពីការជួញដូរសត្វព្រៃខុសច្បាប់នៅឯទីផ្សារសត្វមួយក្នុងទីក្រុង វូហាន ភាគកណ្តាលនៃប្រទេសចិន។ ករណីឆ្លងជាបន្តបន្ទាប់បានរកឃើញមិនត្រឹមតែក្នុងទីក្រុងនេះប៉ុណ្ណោះនេទេ ក៏ប៉ុន្តែទៅដល់សហរដ្ឋអាមេរិក ដែលបង្កជាក្តីព្រួយបារម្ភថា វីរុសនេះ អាចឆ្លងរាលដាលទូទាំងសាកលលោករួចហើយ។
តាមការចុះផ្សាយរបស់ប្រព័ន្ធផ្សព្វផ្សាយក្នុងស្រុកចិន រដ្ឋាភិបាលមូលដ្ឋានរបស់ក្រុង វូហាន បានប្រកាសថា ខ្លួនបានបិទបណ្ដាញដឹកជញ្ជូនប្រជុំជនទាំងអស់ និងផ្អាកជើងហោះហើរចេញទៅក្រៅត្រឹមម៉ោង ១០ព្រឹក ថ្ងៃ ២៣ ខែមករា ។ បើតាមទីភ្នាក់ងារព័ត៌មាន Reuters ដែលដកស្រង់ប្រភពព័ត៌មាននេះ រដ្ឋាភិបាល ក៏ទទូចឲ្យប្រជាពលរដ្ឋកុំចាកចេញពីទីក្រុងនេះ ប្រសិនបើគ្មានកាលៈទេសៈពិសេសណាមួយទេនោះ។
ផ្ទុយពីករណីវីរុស SARS អំឡុងឆ្នាំ២០០២-០៣ ដែលសម្លាប់មនុស្សជិត៨០០នាក់ ហើយក្រុងប៉េកាំងព្យាយាមបិទបាំងនោះ រដ្ឋាភិបាលកម្មុយនីស្តចិន ឥឡូវនេះ បានផ្តល់បច្ចុប្បន្នភាពទៀតទាត់ដើម្បីបង្ការភាពតក់ស្លុត ខណៈមនុស្សរាប់លាននាក់ រៀបចំធ្វើដំណើរសម្រាប់ថ្ងៃបុណ្យចូលឆ្នាំចិន។
ត្រឹមថ្ងៃពុធ ២២ មករា អាជ្ញាធរចិន បានបញ្ជាក់ករណីវីរុសផ្លូវដង្ហើមថ្មីនេះ ចំនួន ៥៧១ ករណី និងអ្នកស្លាប់ ១៧នាក់។ តាមរបាយការណ៍កន្លងទៅ វាមាន ៨ករណីផ្សេងទៀត នៅជុំវិញពិភពលោក។ ប្រទេស ថៃ មាន ៤ ករណី ខណៈសហរដ្ឋអាមេរិក តៃវ៉ាន់ កូរ៉េខាងត្បូង និងជប៉ុន មាន១ករណីរៀងៗខ្លួន។
អំឡុងទស្សនកិច្ចមួយទៅកាន់ក្រុង វូហាន ឧបនាយករដ្ឋមន្ត្រីចិន Sun Chunlan គូសបញ្ជាក់ថា អាជ្ញាធរត្រូវតែជូនដំណឹងជាសាធារណៈអំពីការរីករាលដាលនៃវីរុសនេះ ហើយបង្កើ់នកិច្ចប្រឹងប្រែងទប់ស្កាត់វា។ នេះបើតាមទីភ្នាក់ងារព័ត៌មាន Xinhua កាលពីថ្ងៃ ២៣ មករា ។
ក្រោយជំនួបមួយនៅទីស្នាក់ការកណ្ដាលខ្លួនក្នុងទីក្រុង ហ្សឺណែវ ប្រទេសស្វីស កាលពីថ្ងៃពុធ អង្គការសុខភាពពិភពលោក (WHO) បានបញ្ជាក់ថា ខ្លួននឹងសម្រេចចិត្តនៅថ្ងៃព្រហស្បតិ៍ថាតើគួរប្រកាសការផ្ទុះឡើងនូវភាពអាសន្ននៃសុខភាពសាកល ឬយ៉ាងណា ដែលនឹងទទួលការឆ្លើយតបជាអន្តរជាតិ។ ប្រសិនបើដូច្នេះមែននោះ វីរុសឆ្លងប្រភេទថ្មីនេះ នឹងក្លាយជាភាពអាសន្នសុខភាពសាធារណៈអន្តរជាតិលើកទី ៦ ដែលត្រូវប្រកាសក្នុងទសវត្សរ៍ចុងក្រោយនេះ។
សូមបញ្ជាក់ថា ការផ្ទុះរាលដាល់នៃវីរុសរលាកសួតប្រភេទថ្មី (អម្បូរកូរ៉ូណាវីរុស) បានចាប់ផ្តើមក្នុងទីក្រុង វូហាន ដែលជាមជ្ឈមណ្ឌលដឹកជញ្ជូនដ៏សំខាន់មួយ ក៏ដូចជាមជ្ឈមណ្ឌលពាណិជ្ជកម្ម និងឧស្សាហកម្មដ៏ចម្បងផងដែរ ហើយបច្ចុប្បន្ន វាក៏បានឆ្លងទៅកាន់ទីក្រុងធំៗរបស់ចិនផ្សេងទៀត ដូចជា ប៉េកាំង សៀងហៃ និងហុងកុង។
អាជ្ញាធរចិន កំពុងស៊ើបអង្កេតឫសគល់វីរុសនេះ ទោះបីពួកគេបានបញ្ជាក់ថា ការផ្ទុះឡើងបានផ្តើមចេញពីផ្សារមួយកន្លែងក្នុងក្រុង វូហាន ដោយមានដោះដូរសត្វព្រៃ ហើយវាអាចឆ្លងពីមនុស្សទៅមនុស្សតាមរយៈដំណកដង្ហើម។ ប្រជាជនចិនជាច្រើន បានសម្រេចលុបចោលដំណើរកម្សាន្តពួកគេ ទិម៉ាស់បិទមុខ និងលែងចេញដើរហើរទៅទីសាធារណៈមួយចំនួន ដូចជា កន្លែងមើលកុន និងផ្សារទំនើប ជាដើម៕