ជាតិ
×![]()
ដោយ: ថ្មីៗ
របាយការណ៍សកលទាក់ទងនឹងសន្ទស្សន៍នៃការយល់ឃើញពីអំពើពុករលួយ (The Corruption Perceptions Index 2019) ដែលផ្សាយដោយអង្គការតម្លាភាពអន្តរជាតិនៅថ្ងៃទី២៣ ខែមករា ឆ្នាំ២០២០ នេះ បានបង្ហាញឲ្យឃើញថា កម្ពុជាស្ថិតក្នុងចំណាត់ថ្នាក់ទី១៦២ ក្នុងចំណោម១៨០ប្រទេស ស្មើប្រទេសឆាត និងអ៊ីរ៉ាក់។ កាលពីឆ្នាំ២០១៨ កម្ពុជាស្ថិតក្នុងចំណាត់ថ្នាក់ទី១៦១ ក្នុងចំណោម១៨០ប្រទេសដដែល។
បើតាមតម្លាភាពអន្តរជាតិ កម្ពុជាទទួលបាន២០ពិន្ទុ សម្រាប់សន្ទស្សន៍នៃការយល់ឃើញពីអំពើពុករលួយឆ្នាំ២០១៩ ពោលគឺដូចគ្នានឹងឆ្នាំ២០១៨ដែរ។ ដូច្នេះចំណាត់ថ្នាក់ទី១៦២ ត្រូវអង្គការមួយនេះ វាយតម្លៃថា កម្ពុជានៅមានកម្រិតអំពើពុករលួយខ្ពស់ និងនៅតែជាប់ចំណាត់ថ្នាក់ទាបបំផុតក្នុងចំណោមប្រទេសជាសមាជិកអាស៊ាន និងចំណាត់ទាបបំផុតទី៣នៅក្នុងតំបន់អាស៊ីប៉ាស៊ីហ្វិក។ ក្នុងប្រទេសអាស៊ាន ប្រទេសសិង្ហបុរីឈរនៅចំណាត់ថ្នាក់ខ្ពស់ជាងគេដោយមានពិន្ទុ៨៥ តាមពីក្រោយដោយព្រុយណេមានពិន្ទុ៦០ រីឯប្រទេសឡាវ និងមីយ៉ាន់ម៉ា មានពិន្ទុ២៩ ដូចគ្នា ដែលនាំឲ្យមានចំណាត់ល្អជាងកម្ពុជាផងដែរ។ គួរបញ្ជាក់ថា សន្ទស្សន៍វាយតម្លៃកម្រិតពុករលួយនេះ គឺប្រើមាត្រដ្ឋានពិន្ទុពី០ ដល់១០០ ដែលសូន្យពិន្ទុមានន័យថាពុករលួយខ្លាំងបំផុត ហើយពិន្ទុ១០០គឺស្អាតស្អំខ្លាំងបំផុត។
ក្នុងចំណោម១៨០ប្រទេសក្នុងតារាងសន្ទស្សន៍នេះ ចំណាត់ថ្នាក់លេខ១ស្ទូន គឺប្រទេសដាណឺម៉ាក និងនូវែលសេឡង់ ដែលមានពិន្ទុ៨៧ ខណៈចំណាត់ថ្នាក់អន់បំផុតគឺប្រទេសសូម៉ាលីដែលមានត្រឹម៩ពិន្ទុ។
ក្នុងចំណោម១៨០ប្រទេសក្នុងតារាងសន្ទស្សន៍នេះ ចំណាត់ថ្នាក់លេខ១ស្ទូន គឺប្រទេសដាណឺម៉ាក និងនូវែលសេឡង់ ដែលមានពិន្ទុ៨៧ ខណៈចំណាត់ថ្នាក់អន់បំផុតគឺប្រទេសសូម៉ាលីដែលមានត្រឹម៩ពិន្ទុ។
លោក ប៉ិច ពិសី នាយកប្រតិបត្តិស្ដីទីអង្គការតម្លាភាពកម្ពុជា បានឲ្យដឹងថា នៅកម្ពុជា ការកាត់បន្ថយអំពើពុករលួយតូចៗដូចជាការចេញលិខិតស្នាមនៅមូលដ្ឋានជូនប្រជាពលរដ្ឋជាដើម ត្រូវបានកាត់បន្ថយឲ្យប្រសើរឡើង តែពុករលួយធំៗនៅតែជាបញ្ហាគួរឲ្យកត់សម្គាល់។
លោកថ្លែងដូច្នេះថា៖«កម្ពុជាបានបោះជំហានជាវិជ្ជមានមួយចំនួនក្នុងការលុបបំបាត់អំពើពុករលួយតាមវិស័យនានា ដែលបាននាំមកនូវលទ្ធផលគួរឲ្យពេញចិត្តខ្លះដូចជា ការកាត់បន្ថយអំពើពុករលួយទ្រង់ទ្រាយតូច និងការបង្កើនចំណូលថវិកា តាមរយៈការប្រមូលសារពើពន្ធ និងសេវាកម្មគយ។ ទោះយ៉ាងណា ប្រសិនបើអំពើពុករលួយទ្រង់ទ្រាយធំ និងអំពើពុករលួយផ្នែកនយោបាយ(បក្សពួក ខុបឃិតគ្នាជាប្រព័ន្ធ) មិនត្រូវបានដោះស្រាយឲ្យត្រឹមត្រូវទេ អំពើពុករលួយនឹងបង្កើតភាពអយុត្តិធម៌សង្គម និងបង្កហានិភ័យដល់ការអភិវឌ្ឍប្រទេសកម្ពុជា»។ លោកប្រាប់ថា អំពើពុករលួយធំៗដូចជាអំពើពុករលួយក្នុងការដេញថ្លៃ គម្រោងកសាងហេដ្ឋារចនាសម្ព័ន្ធធំៗ អាជ្ញាបណ្ណរ៉ែ ការសុំច្បាប់អនុញ្ញាតផ្សេងៗ ជាដើម នៅមិនទាន់ត្រូវបានកែលម្អឲ្យប្រសើរឡើងនោះទេ។
បើតាមលោក ប៉ិច ពិសី សន្ទស្សន៍កម្រិតអំពើពុករលួយនេះ គេមិនវាយតម្លៃត្រឹមតែការសូកប៉ាន់ប៉ុណ្ណោះទេ។ លោកថ្លែងប្រាប់សារព័ត៌មានថ្មីៗថា៖«សន្ទស្សន៍យល់ឃើញពីអំពើពុករលួយហ្នឹង គេមិនផ្ដោតតែទៅលើអំពើសូកប៉ាន់តូចតាចប៉ុណ្ណឹងទេ តែគេផ្ដោតលើទិដ្ឋភាពចម្រុះក្នុងប្រទេសហ្នឹង ទី១ការអនុវត្តច្បាប់ឬនីតិរដ្ឋ ប្រជាធិបតេយ្យ ទី២ប្រព័ន្ធយុត្តិធម៌ និងទី៣ គេមើលថាឧបសគ្គនៃការធ្វើធុរកិច្ចក្នុងប្រទេសនោះវាធំដែរឬទេ»។
សារព័ត៌មានថ្មីៗបានទាក់ទងតាមទូរសព្ទទៅលោក ផៃ ស៊ីផាន អ្នកនាំពាក្យរដ្ឋាភិបាល ដើម្បីឆ្លើយតបនឹងរបាយការណ៍ដែលចេញផ្សាយនេះដែរ តែលោកជាប់រវល់។
សន្ទស្សន៍នៃការយល់ឃើញពីអំពើពុករលួយឆ្នាំ២០១៩ ធ្វើចំណាត់ថ្នាក់ ដោយផ្អែកលើលទ្ធផលស្ទង់មតិ ១៣ ដែលឆ្លុះបញ្ចាំងពីការវាយតម្លៃ និងទស្សនៈការយល់ឃើញរបស់ធុរជន និងអ្នកជំនាញនានា។ ចំពោះប្រទេសកម្ពុជា ប្រភពទិន្នន័យសរុបចំនួន៨ គេប្រើដើម្បីគណនាពិន្ទុនៃកម្រិតពុករលួយនេះ ដែលមានប្រភពទិន្នន័យជាអាទិ៍ ចំណាត់ថ្នាក់ហានិភ័យប្រចាំប្រទេសរបស់ទីភ្នាក់ងារសេដ្ឋវិទូឆ្នាំ២០១៩, សន្ទស្សន៍ស្ដីពីនីតិរដ្ឋសម្រាប់គម្រោងយុត្តិធម៌ពិភពលោកឆ្នាំ២០១៩, ការស្ទង់មតិពីធុរជនរបស់វេទិកាសេដ្ឋកិច្ចពិភពលោក(EOS)ឆ្នាំ២០១៩៕
© រក្សាសិទ្ធិដោយ thmeythmey.com
