ជាតិ
×![]()
សៀមរាប៖ អ្នកភូមិបង្កោង នឹងរៀបចំពិធីចាប់ត្រីរួមគ្នានៅថ្ងៃទី២៥ មករា ដើម្បីត្រៀមរៀបចំពិធីឡើងមាឃនៅថ្ងៃ៣កើត ខែមាឃ។ ពិធីនេះគឺជាការអភិរក្សទំនៀមបុរាណដែលអ្នកភូមិនេះមានទំនៀមតាំងពីដូនតាមក។
ដូចសព្វមួយដង រាល់ថ្ងៃ១កើត ខែមាឃ អ្នកភូមិបង្កោងបានកំណត់វេលាមួយសម្រាប់រៀបចំពិធីចាប់ត្រីរួមនៅក្នុងបឹងអភិរក្សមួយកន្លែងក្នុងភូមិ ឈ្មោះថា «បឹង»។ នៅឆ្នាំនេះ ពិធីធ្វើចំថ្ងៃទី២៥ មករា ឆ្នាំ២០២០ ដើម្បីត្រៀមរៀបចំពិធីឡើងមាឃឬឡើងអ្នកតា នៅថ្ងៃ៣ កើត ខែមាឃ ដែលត្រូវនឹងថ្ងៃទី២៧ មករា។
មេភូមិបង្កោងលោក ពេជ្រ ឃិន បានឱ្យដឹងថា ពិធីនេះចាប់ផ្តើមនៅព្រឹកម៉ោង៦ ដោយមានការចាក់ភ្លេង មីក្រូ ធុងបាស ដើម្បីញុំាងឱ្យពិធីនេះកាន់តែអធឹកអធម។ បឹង ត្រូវបានអ្នកភូមិបង្កោងប្រើប្រាស់រួម និងអភិរក្សមិនឱ្យមានការនេសាទអ្វីទាំងអស់ គឺទុកសម្រាប់ថ្ងៃពិធីចាប់រួមគ្នាតែម្ដង ហើយឧបករណ៍ចាប់ត្រីក៏អនុញ្ញាតតែឧបករណ៍បុរាណមាន សំណាញ់ ឈ្នាង និងអង្រុកតែប៉ុណ្ណោះ។ នេះជាការបញ្ជាក់ពីលោកមេភូមិបង្កោង។
តាមការលើកឡើងរបស់លោក ពេជ្រ ឃិន ពិធីចាប់ត្រីនេះគឺទំនៀមទម្លាប់របស់អ្នកភូមិបង្កោង ដែលលោកមិនដឹងថាមានប្រភពពីណាមកដែរ។ លោកបន្ថែមថា អ្នកភូមិចាប់ត្រីនិងហូបជុំគ្នានៅកន្លែងបឹង ហើយទុកខ្លះសម្រាប់ធ្វើទឹកសម្លនំបញ្ចុក ដើម្បីយកទៅសាលាឆទាននៅថ្ងៃឡើងមាឃឬឡើងអ្នកតា។ លោកមេភូមិបញ្ជាក់ថា អ្នកភូមិបន្តធ្វើទំនៀមនេះមិនដែលខានឡើយ៕
Tag:
ចាប់ត្រី
ភូមិបង្កោង
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
